Алматының «Қайрат» футбол клубы үш апталық демалыстан кейін өтетін халықаралық оқу-жаттығу жиынының орнын және жоспарланған жолдастық кездесулерін жариялады, деп хабарлайды Egemen.kz.
Клубтың баспасөз қызметі Telegram-арнасында хабарлағандай, 4 қаңтар күні таңертең «Қайрат» Біріккен Араб Әмірліктеріне аттанып, 15 қаңтарға дейін оқу-жаттығу жиынын өткізеді.
«Жиынның басты мақсаты футболшыларды оңтайлы физикалық қалыпқа келтіру және ресми матчтарға сапалы дайындық жүргізу», делінген клуб мәлімдемесінде.
Сондай-ақ алматылық клуб екі жолдастық кездесу өткізетінін мәлімдеді. Атап айтқанда,
- 9 қаңтарда Әзербайжанның «Нефтчи» клубына қарсы,
- 14 қаңтарда Хорватияның «Вараждин» командасымен ойнайды.
Айта кетейік, жұма күні команда клуб базасында жиналып, бастапқы медициналық тексеруден өтуді жоспарлап отыр.
Қазіргі таңда «Қайрат» Чемпиондар лигасының турнирлік кестесінде 36-орында тұр. Алматылық клубтың еншісінде бір ғана ұпай бар, ол Кипрдің Пафос командасымен өткен матчтағы тең ойын (0:0).
Ал қалған бес кездесуде қазақстандық клуб жеңіліс тапты.
Алда «Қайратты» 20 қаңтарда Бельгияның «Брюгге», сондай-ақ 28-нен 29 қаңтарға қараған түні Лондонның «Арсенал» клубтарына қарсы матчтар күтіп тұр.
Жылдам ақпарат алу үшін Facebook, Instagram желілері мен Telegram каналымызға жазылыңыз!