Апта басында футболдан Қазақстан біріншілігі соңғы ойындарын өткізіп, биылғы маусымды аяқтады. Бұл сында қызылордалық «Қайсар» 6 жеңіс, 6 тең, 8 жеңіліс көрсеткішімен 24 ұпай еншілеп, турнирлік кестеде 7-ші орынға тұрақтады. Биылғы маусым «қасқырлар» үшін сәтті маусым болды деп айта алмаймыз. Жыл басында команда алдына үздік алтылыққа ену жоспары қойылған еді. Алайда Стойчо Младенов жаттықтырған команда бұл межені бағындыра алмады. Сондықтан болгар маманы қызметінен кетуге мәжбүр. Енді қызылордалық «Қайсарды» келер жылы жергілікті бапкер жаттықтырады деп күтілуде. Бұл туралы өңірлік коммуникациялар қызметінде өткен брифингте облыстық дене шынықтыру және спорт басқармасының басшысы Жақсылық Оспанов мәлімдеді.
– Қазіргі таңда бапкерлік қызметке үш үміткер бар. Атап айтсақ, осы уақытқа дейін «Қайсардың» аналитик жаттықтырушысы қызметін атқарған Қанат Шерімбетов, «Байқоңыр» командасының бас бапкері Ерлан Шойтымов және жергілікті жаттықтырушы Сұлтан Әбілдаев бар. Осы үш бапкердің жұмыс жоспарын анықтап, лайықтысын жауапты қызметке тағайындаймыз. Жергілікті мамандар Премьер-лигада команданы жақсы нәтижеге жетелейтініне сеніммен қараймын, – деді басқарма басшысы. Сонымен қатар «Қайсар» футбол клубының жаңа маусымдағы бюджеті 1 млрд 600 млн теңге болады деп жоспарлануда. Команданың 60 процентін жергілікті ойыншылар құрайтын болады.
– Бас бапкер тағайындалғаннан кейін «Қайсар» футбол клубы жаңа маусымға дайындығын бастайды. Команданың негізгі фронтын жергілікті ойыншылар құрайды. Бүгінде Думан Нәрзілдаев, Ілияс Әмірсейтов, Нұрымжан Салайдын, Шоқан Абзалов, Иван Граф, Марсель Исламқұловпен келер жылға келісім шартымыз бар. Сондай-ақ Александр Марочкин, Бағдат Қайыров, Александр Заруцкий, Элгуджа Лобжанидзе секілді футболшылармен келіссөздер жүргізудеміз, – деді клуб директоры Серік Досманбетов.
Жылдам ақпарат алу үшін Facebook, Instagram желілері мен Telegram каналымызға жазылыңыз!