Айтыскер депутат Ринат Зайытов Астана мен Алматы әуежайларына әйгілі «Адай» күйін орындайтын мың домбырашы апаруды ұсынды. Жуырда оңтүстік астана әуежайында болған оқиғаға мәжілісмен осылай пікір білдірді, – деп хабарлайды Tengrinews.kz тілшісі.
Үкімет сағатында депутат Индустрия және инфрақұрылымдық даму министрлігіне жүгінді.
«Домбыра ішінде бірде-бір металл жоқ. Онда қой ішегі мен ағаштан басқа ештеңе жоқ. Ұлттық аспаптың еш зияны жоқ», – деді мәжілісмен.
Сондай-ақ, Зайытов әуекомпанияларына сәлем жолдап, ақын, халық жазушысы Қадыр Мырзалиевтің «Нағыз қазақ қазақ емес, нағыз қазақ – домбыра» деген сөзін еске салды.
«Қазақтың 4-5 ұлттық аспабы бар. Ұшаққа кіргізуге рұқсат беріңіздерші. Ал бұдан кейін де рұқсат бермесе, Алматы мен Астананың әуежайларына кемінде мың домбырашы апарып, «Адай» күйін ойнап, жалынып сұрайық», – деді депутат.
Жылдам ақпарат алу үшін Facebook, Instagram желілері мен Telegram каналымызға жазылыңыз!