Қаламызда «Edcrunch Headmaster» атты мектеп директорларының арасында ұйымдастырылған І республикалық байқау өтті. Бұл шара елімізде алғаш рет өткізілді. Білім бәсекесінде білім беру ұйымдарының басшылары бақ сынады. Аймақта ұйымдастырылған айтулы шараға облыстық білім басқармасының басшысы Ақзира Қасымова қатысып, мектеп басшыларына сәттілік тіледі.
– Облыстық білім басқармасы мен «Серіктес директорлар» лигасы ұйымдастырған байқау мектеп басшылары үшін үлкен серпіліс сыйламақ. Білім беру жүйесінде жүріп жатқан өзгерістер педагогтердің ғана емес, білім беру ұйымдары басшыларының да үздіксіз кәсіби дамуы қажеттігін айқындап отыр. Сондықтан да, лига өзге де облыстардың білім беру басшыларымен әріптестік тәжірибе алмасу бағытында алғаш рет конкурс өткізуді мақсат етті. Ортақ құндылықтарды дамыту, идеялар алмасу арқылы жаңа көзқарастағы азаматтарды қалыптастырамыз, – деді басқарма басшысы.
Байқау өзара тәжірибе алмасу және білім беру ұйымының озық инновациялық идеяларын насихаттауды мақсат еткен. Білім бәйгесіне Шығыс Қазақстан, Ақмола, Түркістан, Қызылорда облыстары мен Нұр-Сұлтан және Шымкент қалаларынан 6 директор қатысты. Олар 5 кезең бойынша біліктіліктерін көрсетті. Білім ұйымының басшылары І кезеңде соңғы 3 жылдағы жетістіктері бойынша «Мен табысты басшымын» тақырыбында бейнеролик дайындаған. ІІ кезеңнің шарты бойынша «Басқарудағы менің жетістіктерім» тақырыбында өз мектебі бойынша атқарған жұмыстарының таныстырылымы жасалды. Ал ІІІ кезеңде «Жаңа мектеп – жаңарған жоба тақырыбында өз жобаларын қорғаған. ІV кезеңде мектеп директорлары TedX форматында берілген тақырып бойынша ашық алаңда пікірін білдірді. Ең соңғы V кезеңде басқару жағдаяттарын шешу бойынша сайысқа түсті.
Байқаудың нәтижесі бойынша бас жүлдені қаламыздағы №101 мектеп-лицейінің директоры Айгүл Алтынбекқызы жеңіп алды. Ал ІІ орынды Ақмола облысының Щучинск қаласындағы №7 мектеп-лицей директоры Дамир Сураганов иеленді. Түркістан облысы, Ата түрік атындағы №17 мектеп-гимназия директоры Рахила Үрімова жүлделі ІІІ орынға ие болды. Жеңімпаздарға бағалы сыйлықтар мен арнайы алғыс хат табысталды.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!