Тәуелсіз ел тірегі – білімді ұрпақ десек, жаңа дәуірдің күн тәртібіндегі өзекті мәселе – сапалы білім. Бүгінде оқу мен тәрбие жүйесіне тың жаңалықтар енгізе отырып, жас ұрпаққа сапалы білім беруде Қызылорда қаласы, Қарауылтөбе ауылдық округіндегі №179 Айтбай Хангелдин атындағы білім ошағының орны бөлек. Облыстық, республикалық тіпті халықаралық деңгейдегі білім сайыстарында оқу ордасының оқушылары үнемі алдыңғы қатарда. Сан мыңдаған шәкірттің жүрегіне білім шамшырағын жағып, бала жанының бағбаны болу қызық та қиын екенін жіті түсінген білім ұясының директоры Асқар Садықов бұл жауапкершілікті абыроймен арқалап келеді. Ауылдағы мектептің жайын білмек үшін арнайы ат басын бұрдық.
Мектеп тарихы сыр шертеді
№179 Айтбай Хангелдин атындағы мектепке әр жылдары білім саласына бүкіл ғұмырын арнаған ұстаздар басшылық етті. 60 жылдан астам тарихы бар мектеп 1948 жылы бастауыш білім беру ошағы болып ашылады. Мектептің алғашқы директоры Құдайберген Әбдіғалиев.
1964 жылы білім ошағы 8 жылдық мектеп болып өзгерді. Бұл жылдары мектепке Ақтай Мұстафаев, Махамбетжан Әлімбетов басшылық етті.
1970 жылы «Үлгі тірек» мектебі болып аталса, 1973 жылдан бастап орта мектеп болып қайта құрылады. 1971-1988 жылдары Мәлік Науанов, 1988-1998 жылы Сақтапберген Бермағанбетов, 1998-2004 жылы Әбсаттар Әбдіғаппаров, 2007 – 2013 жыл жылы Зухра Абибуллаева, 2013 жылы Мұхтар Беркімбай, 2018 жылы Гүлзада Нұртасова білім ордасына басшы болды.
Білім ошағында директордың орны бөлек. Ұрпақ тәрбиесімен қатар ұжымды да тәрбиелеу үшін білім мен біліктілік, іскерлік қажет. Ұжымның әрбір мүшесін, тіпті баланың да жай-күйін жанарынан байқайтын сергек басшы ұжымның бақыты. Бүгінде осы үдеден шығып жүрген ұлағатты ұстаз, білікті басшы Асқар Садықов отыз жыл ұстаздық ғұмырында қыруар еңбек етіп, елдің құрметіне бөленіп келеді. Еңбек жолын мұғалім болудан бастап, мектеп директорының оқу ісі жөніндегі орынбасары, 2002 жылдан бастап мектеп директоры қызметін басқарып келеді. №179 Айтбай Хангелдин атындағы орта мектепке келгелі білім сапасының артуына өз үлесін қосып, қажырлы еңбек етуде.
– Шәкірт өз балаңдай жақын. Халық ұстазды бекерден-бекерге анаға теңемеген ғой. Ұстаз – жай ғана бір кәсіптің, мамандықтың иесі емес, ізгіліктің, адамзатқа тән қымбат қасиеттің жиынтығына айналған ұғым. Ұстаз – келешекті қалыптастырушы. Білесіз бе, сан жылдар өтсе де, әрбір оқушы мұғалім жадында сол балалық аңғал мінезімен, аппақ көңілімен, риясыз пейілімен, мәңгілік бала бейнесінде жатталып қалатыны бар. Олардың әрқайсысының қылығы, кескін-келбеті, оқу үлгерімі, бәрі-бәрі есіңде жатталып қалады, – дейді Асқар Әнуарұлы.
Мектеп жетістігі көпке ортақ
Елбасы Нұрсұлтан Назарбаев «Еліміздің ертеңі бүгінгі жас ұрпақтың қолында, ал жас ұрпақтың тағдыры ұстаздардың қолында», – деп мұғалімдер қауымына үлкен сенім, жауапкершілік артқан болатын. Олай болса, адам баласын ұлы мақсаттарға жеткізетін ұлы күш білім, оны жас ұрпақтың бойына дарытушы ұстаздар қауымы екені сөзсіз. 60 жылдан астам тарихы бар білім ордасының жеткен жетістігі аз емес. Бұл мектептегі бізді қызықтырғаны – күрес үйірмесі. Үйірмеге қатысушылар республикаға шығып облыс намысын қорғап жүр. Жаттықтырушы Аязбек Шүкір – қазақ күресінен Еуразия ойындарының жеңімпазы, спорт шебері. Үйірмеде 40-тан астам бала жаттығады.
– Күрес десе ішер асын жерге қояр халықпыз. Күш атасы Қажымұқанды, Балуан Шолақтай бабамызды мақтан еткен елміз. Күрес спорт түрі ғана емес, баланы еңбекке тәрбиелейтін орта. Мұндағы жеткіншектер алдағы уақытта әлемдік додаларда бақ сынайды, – дейді спорт шебері.
Оқушылар үшін мектепте үйірмелер жетерлік. Хор үйірмесі, домбыра дейсіз бе, сурет салғысы келеді ме, әркім қабілетіне қарай таңдай алады.
Білім ордасының жетістігі аз емес. Мұғалімдер де республикалық жарыстарда топ жарып жүр. Қалалық «Үздік тәлімгер» байқауында Қазына Ниязова үздіктер қатарынан көрінді. Абай Құнанбайұлының 175 жылдық мерейтойына арналған «Ұлттың ұлы мұрасы» халықаралық өнер және білім фестивалінің өтуіне үлес қосып, шәкірттері жоғары нәтиже көрсеткені үшін Гүлфира Кенжебекова «Үздік жетекші» атанса, «Суретшілер салтанаты» көрмесінде шығармашылығымен ерекшелген Айжан Ештай жүлделі I орынды иеленген.
Айта кетейік, пандемия кезінде ауыл баласы білімнен қол үзіп қалмады. Демеушілердің көмегімен қашықтықтан білім алуға қажетті құрал-жабдық алынды. Бір сөзбен айтқанда сабақтан үзілген кезі жоқ.
Мектеп директоры Асқар Әнуарұлының «жақсылық жаса, қайтарымын күтпе» ұстанымын екенін әңгімелесу барысында байқадық. Ауылдағы тұрмысы төмен отбасыларға әрдайым көмек көрсететініне көзіміз жетті. Ал мектеп ұжымы әрдайым аз қамтылған балаларға қол ұшын созуға дайын.
Балабақша – бақыт баспалдағы
Тәрбие мен білімнің алғашқы дәні мектепке дейінгі тәрбие ошағында беріледі. Жас ұрпаққа тәрбие беруде балабақшаның маңызы зор. Осы орайда №179 Айтбай Хангелдин атындағы білім ошағында «Нұрбөбек» балабақшасы бар. Мектепке дейінгі білім беру мекемесінің заманға сай жабдықталуы бізді қатты қуантты. Мекемеде 10 қызметкер жұмыс жасап, балалардың білім алу жолында аянбай еңбек етіп келеді. Балабақшаның мұнтаздай таза бөлмелерінен олардың тазалықты бірінші орынға қоятынын аңғардық. Бастысы – балғындардың тәлімді тәрбие алып, шығармашылықпен айналысуына барлық жағдай жасалыпты. Балабақшаның мекеменің атқарар ісі ұшан-теңіз екені рас. Қоғамның кішкентай мүшелерінің ертеңгі күні елдің нағыз отансүйгіш, елжанды азаматы болып қалыптасуына алдымен ата-ана жауапты десек, сол тәрбиені ары қарай ұштап, бала санасына сіңіруде балабақша тәрбиешісінің де төгер тері аз еместігі белгілі. Ал «Нұрбөбек» балабақшасының меңгерушісі Серіккүл Шаукиева осы жолда аянбай еңбек етіп келеді.
Оқушыға қарап, мектебін таны…
Қазақы оюмен тігілген мектеп формасы – білім ұжымы мен ата-ана таңдауы. Еліміз бойынша оқушылар үшін бірдей форма болмаса да, әр мектеп өз мектеп формасын тіктіріп киюде. Бұл балалардың бірдей киінуі үшін әрі мектеп тәртібі үшін де қажет. Оюмен өрнектелген мектеп формасы балаларға сондай жарасымды.
Жылдам ақпарат алу үшін Facebook, Instagram желілері мен Telegram каналымызға жазылыңыз!