Аймағымызда білім саласына ерекше назар аударылған. Елдің болашағы білім саласымен тікелей байланысты болғандықтан, ол әрдайым қырағы қадағалауды, айрықша мән беруді талап етеді. Бұл бағытта жаңа әдістер, тың тәсілдер қолдану қажет-ақ.
Осы үдерістен шығу үшін Сыр өңірінде білім сапасын көтеру бағытындағы іс-шаралар жалғасын тауып келеді.
Өркениеттің өлшемі, қоғам дамуының басты көрсеткіші – білім Сондықтан да ұстаздарды қолдау, оқушылар мен түлектерге барынша жағдай жасау – қашанда ең басты міндет. Аймақтың білім саласын сөз еткенде, алдымен ойға ұлттық бірыңғай тестілеу оралады. Биыл облыс оқушылары сынақтан сүрінбей өтті. Көрсеткішке көңіл толды. Бұл – әрбір ұстаздың жемісі. Облыс бойынша 7506 оқушы мектеп бітірсе, сынақ тапсыруға ниет білдірген түлектердің 6 452-і немесе 87% ҰБТ-ға қатысты. ҰБТ қорытындысы 815 оқушы 100-ден жоғары балды жинаса, бұл өткен жылғы көрсеткіштермен салыстырғанда бір деңгейде қалып отыр. Ал 416 түлек 49 балдан төмен алып, шекті деңгейден өтпеген. Аймақ бойынша ең жоғары 137 балды қаламыздағы №101 мектеп-лицейдің түлегі Дәулет Омаров иеленді.
Одан бөлек өрендердің сапа көрсеткіші олимпиадалық жетістігімен бағаланады. Өңірдің дарынды балалары бұл тұрғыда үнемі жақсы нәтижеге қол жеткізіп, аймақ абыройын арттырып келеді. Мәселен, биылғы оқу жылында жалпы білім беретін пәндер бойынша 101 оқушы халықаралық және республикалық олимпиадалар мен ғылыми жобалар конкурсында жүлделі орындарға ие болған. Сыр дарындары аймақ қоржынына 16 алтын, 29 күміс, 56 қола әкелген. Атап айтсақ, халықаралық олимпиада мен ғылыми жобаларда 4 оқушы күміс, 9 оқушы қола медальді иеленді. Олар математикадан қашықтан өткен халықаралық Азия-Тынық мұхиты олимпиадасы, математикадан халықаралық «Жібек жолы» олимпиадасы, Халықаралық Жәутіков, Түймаада олимпиадасы мен халықаралық «Ғылым әлеміне жол ашамыз» және Ө.Жолдасбеков атындағы математикадан және механикадан зерттеу жұмыстары конкурсы сияқты беделді олимпиадаларда облыстың намысын қорғаған. Сондай-ақ жалпы білім беретін пәндер бойынша республикалық олимпиадалар мен ғылыми жобаларда 88 дарынды оқушы оқ бойы оза шауып, 16 алтын, 25 күміс, 47 қола медальді иеленген. Сонымен қатар 2-4 сыныптан басталатын «Бастау» математикалық турнирінде Сыр өңірі командалық есепте ІІІ орынға ие болған.
Еліміздің дамуына өзіндік үлес қосатын білімді дарындылар өсіп келе жатқанына қуануымыз қажет. Сондықтан да оларды мақтан ету – біздің парызымыз. Қазіргі уақыт – білімділердің заманы. Бәсекеде тек білімді жеңетіні анық. Сол үшін де балалардың жан-жақты дамуы, толықтай білім алуы үшін мемлекет барлық жағдайды жасауда. Ал берілген мүмкіндікті пайдалану жастарға берілген міндет. Соның айғағы ретінде Мемлекет басшысының тапсырмасы бойынша дарынды балаларды қолдауға ерекше көңіл бөлінетінін айтып кеткен жөн. Мәселен, алдағы уақыттан бастап халықаралық зияткерлік олимпиадалардың жеңімпаздары қазақстандық ЖОО-да білім алу үшін ақшалай сыйлықтар мен гранттарға ие болады. Оның ішінде алтын медаль алған оқушыға 1 500 АЕК, күміс медальға 1 000 АЕК, қола медальға 500 АЕК көлемінде ақшалай сыйлық беріледі. Сонымен қатар оқушыларды байқауға дайындаған ұстаздарға да біржолғы сыйақы төленеді. Сондықтан оқушы барлық зейінді білімге аударып, озық ойлы азамат атануға мүмкіндік зор.
Өркениет биігіндегі мемлекеттер өмірін зерделесек, табысқа жетудің бірден-бір жолы – білім экономикасының дамуы. Яғни, сол елдер ғана көшбасшы бола алатыны дәлелденген. Бүгінде жастардың шет елдерде оқуына барынша жағдай жасалуда.
Жалпы білім саласындағы сапа мәселесі жылдан-жылға жоғарылауда. Сапаны көтеру мақсатында бөлінген қаржы көлемі де артып келеді. Биыл жалпы бюджет 204,4 млрд теңгеге жетіп, былтырғы жылмен салыстырғанда 17% артқан. Облыста инклюзивті білім беруді дамыту мақсатында 2020-2022 жылдарға арналған арнайы «Жол картасы» іске асырылуда. Оған 4 млрд теңге қаржы қаралған. Биыл 28 инклюзивтік кабинет, 2 ресурстық орталық, 47 логопункт ашылады.
Робиндранат Тагор деген үнді ғұламасы «Ұстаз шәкіртті өзінің білімі мен қабілетінің құрбаны етпеуі тиіс» деген екен. Яғни алдында жүрген балалардың білімі мен дағдысы олардың білгенінен әлдеқайда артық болуы тиіс. Ол үшін ұстаздар қауымы мен білім беру жүйесіне қойылатын талаптар да арта береді. Яғни, өрендердің білім сапасы педагог мамандардың біліктілігіне де байланысты. Қазіргі таңда аймақтың барлық білім беру ұйымдарында 23 мыңнан аса мұғалім қызмет етеді. Олардың 21 851-і жоғары білімді.
Аймақта жастардың толыққанды білім алуына жан-жақты жағдай жасалған. Өмірлік азық берер заманауи оқу ошақтары жыл сайын көбеюде. Әлі де көбейе берері сөзсіз. Экономикалық жағдайға қарамастан, қаламызда жаңа балабақша мен мектептердің көптеп ашылуын мемлекеттің білім мен бала тәрбиесіне деген ерекше көзқарасының, шынайы қамқорлығының айғағы ретінде бағалаймыз.
Биылғы оқу жылында бірінші сыныпқа 19568 оқушы келеді деп күтілуде. Оқушылар саны 2021-2020 жылмен салыстырғанда 6812-ге артады деп жоспарлануда.
Аймақтағы балалар санының өсу динамикасын ескере отырып, апатты және үш ауысымды мектептерді болдырмау мақсатында 2025 жылға дейін 34 мемлекеттік, 18 жеке мектеп салынатын болады.
Сапалы білімнің қолжетімділігін арттыруға жағдай жасау арқылы жүйенің серпінді дамуына ықпал етуге болады. Өйткені бәсекеге қабілетті білім бәрін жеңеді.
А.АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!