Қала әкімі Нұржан Ахатов және қалалық мәслихат төрағасы, партия филиалының жетекшісі Ибадулла Құттықожаев AMANAT партиясының қоғамдық қабылдау кестесіне сәйкес тұрғындарды жеке мәселелері бойынша қабылдады.
Қабылдауға алдын ала 40-қа жуық азамат тіркелген. Келушілер негізінен тұрғын үй кезегі, коммуналдық қызметтерге қол жеткізу және жұмыспен қамту мәселелерін көтерді.
Қала басшысы әрбір тұрғынның өтінішіне мұқият назар аударып, заң аясында түсіндірді. Қабылдау барысында айтылған мәселелердің басым бөлігі кезең-кезеңімен шешімін тауып келе жатқаны атап өтілді. Сонымен қатар тұрғындар айтқан әрбір мәселе бойынша жауапты сала басшыларына нақты тапсырма жүктеліп, бірқатар жұмыстың орындалу мерзімі белгіленді.
Айта кету керек, тұрғындар қала әкімінің қабылдауына eGov порталы арқылы, сондай-ақ e-Otinish базасы немесе әкімдікке барып жазбаша өтініш қалдыру арқылы жазыла алады.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!