Коронавирустың кезекті толқынында Бразилияда вирусты жұқтырушы және індеттен көз жұмушылар арасында жастар көбейген. Ауырып жатқан жастардың арасындағы өлім көрсеткіші желтоқсанмен салыстырғанда 7 процентке өскен. Эпидемиологиялық ахуалдың өзгеруіне байланысты CNN арнасының халықаралық тілшісі Мэтт Риверс «Неліктен Бразилияда жастар арасында Covid-19 жұқтыру дерегі көбейді?» атты репортаж-зерттеу материалын жариялады.
Тілші материалын індеттен қайтыс болған 28 жастағы Грасиан да Силваның отбасымен сұхбаттан бастайды. Силва тек 10 күн ғана ауырып, көз жұмған. Ауруханада жалғыз өзі қалған кезде қайтыс болған қызын анасы Мария да Пенья күнде ойлайды. «Қызым мұндай жағдайға тап болады деген ой үш ұйықтасам түсіме кірген емес. Бұл өте тез болды. Вирус бізге қоштасуға да мүмкіндік бермеуде», – дейді анасы.
Артында 4 жасар баласы қалған Силва өткен жылы маусым айында Covid-19 вирусынан қайтыс болған. Алайда ол қайтыс болады деп ешкім ойламаған. Себебі ол кезде вирус жұқтырғандар қатары күрт көбейіп, көбіне вирусты егде жастағылар жеңе алмаған болатын.
Бірақ жаңа жылдан кейін Бразилиядағы эпидемиологиялық ахуал нашарлап, індет жұқтырғандар мен қайтыс болғандар саны рекордтық көрсеткішке жетуде. Ал эпидахуалдың басты ерекшелігі жастардың вирусты ауыр өткеруі және олардың арасында өлімнің көбеюі болып тұр.
Осыған байланысты тілші өз мақаласында «Неге вирус жастар арасында көбейді?», «Жастардың жүріс-тұрысы мен сақтық шараларын сақтауы бұған әсер етті ме?» деген сұрақтарға жауап іздейді.
Автор жансақтау бөлімінің дәрігерлері «пациенттеріміз жасарып барады» деп дабыл қағуда дейді. Қаңтардан бастап Бразиялияның түрлі штатындағы ондаған дәрігермен сұқбаттасқан тілші олардың көбісінен науқастар арасында 30-59 жас аралығындағы адамдар көбейгенін естіген.
«Індетті жұқтырғандар арасында ауыр халде жатқандар қатары көп. Олардың жағдайы сіз ойлағаннан да қиын» деді интенсивті терапия дәрігері Луан Матос қаңтарда CNN арнасына сұхбат берген.
Сондай-ақ М.Риверс материалында денсаулық сақтау министрлігі жүргізген зерттеу жұмыстарының нәтижесін кірістірген. Зерттеу нәтижесінде 30-59 жас аралығындағы науқастар арасындағы өлім көрсеткіші 27 процентке жеткені көрсетілген. Ал 60 жастан жоғары науқастар арасында көз жұмғандардың көрсеткіші 7 процентке төмендеген.
«30 жастағы адамдардың вирустан қайтыс болуы өте ауыр тиюде. Олардың бар өмірі алда еді, бірақ вирус оған мүмкіндік бермеуде», – дейді интенсивті терапияның ардагері Мария Долорес да Силва.
Тілші өз репортажында «Не себеп?» деген сұрағына да жауап тапқандай. Ол бұл көрсеткіштің басты себебі вирустың жаңа «Р.1» түрі деп тұжырымдайды. Өйткені зерттеушілер «Р.1» нұсқалы вирустың жұғу көрсеткіші 2,2 есе көп деген мәлімдеме жасаған. Ең алғаш Ұлыбритания мен Оңтүстік Африкада пайда болған бұл вирус түрі Бразилияның 8 штатында таралғаны дәлелденген. «Вирустың бұл түрі өлімге алып келетін шығар. Бірақ бізде бұл тұжырымға зертханалық дәлел жоқ», – дейді бразилиялық эпидемиолог Джесем Орельяна.
Сонымен қатар зерттеушілер бұл көрсеткішке жастардың соңғы уақытта мерекелік кештерді көп ұйымдастырып, топтасып жиналуы да әсер етуі мүмкін деген тұжырым жасаған. Тілші репортажға бразилиялық микробиолог Н.Пастернактың тез тарайтын жаңа вирустың түрі барын және ол көп жас адамға жұғады деген ескертуін де кірістірген. Сондай-ақ тілші елдегі вакциналау науқаны туралы да сөз қозғайды. Оның айтуынша, жастар арасында вирус көбейгенімен, әзірге сылбыр жүріп жатқан вакцина егу алдымен егде жастағыларға жүргізіліп жатыр екен…
Түпнұсқадан аударып, шолу жасаған
Аслан НҰРАЗҒАЛИ
Жылдам ақпарат алу үшін Facebook, Instagram желілері мен Telegram каналымызға жазылыңыз!