Сәрсенбі күні А.Тоқмағамбетов атындағы қалалық мәдениет үйінде «Мерейлі отбасы-2022» ұлттық байқауының қалалық кезеңінің жеңімпаздарын марапаттау
шарасы өтті. Оған қала әкімі Асылбек Шәменов қатысты.
Биыл аталған байқаудың қалалық кезеңіне 15 отбасы өтінім берген. Әр отбасының еңбектегі, зияткерлік саладағы, ғылыми бағыттағы жетістігі, меценаттық, волонтерлық, қайырымдылықтағы белсенділігі ескеріліп, таңдау жасалған. Байқау талабына сай келген 5 отбасыны қала басшысы марапаттады.
– Мемлекет тірегі отбасы десек, әрбір отбасының бақытты, бақуатты өмір сүруі еліміздің әлеуетін арттырып, мықтылығын көрсетеді. «Мерейлі отбасы» байқауы еліміздегі отбасы құндылығын насихаттауға бағытталған. Ұлттық құндылығымызды насихаттайтын байқауға биыл 15 отбасы үміткер ретінде құжат тапсырса, тиісті комиссия шешімімен 5 отбасы іріктеліп алынды.
Қадірлі жерлестер, біз ата-анасын ардақтап, қариясын құрметтей білетін, отбасын Отанның тірегі санайтын елдің ұрпағымыз. Бүгінгі «Мерейлі отбасы-2022» ұлттық байқауының қалалық кезеңіне қатысып, белсенділік танытқан әрбір отбасыға шынайы алғысымды білдіремін. Әр шаңыраққа шаттық, бақ-береке тілеймін, – деді қала әкімі.
Үздік деп танылған бес отбасы марапат төрінен көрініп, оларға арнайы сый-сияпат табысталды. Сонымен «Мерейлі отбасы-2022» ұлттық байқауының жеңімпазы деп тасбөгеттік Ермановтар әулеті танылса, ІІ дәрежелі дипломмен қызылордалық Таңрақбаевтар, ІІІ-дәрежелі дипломмен Жақыповтар отбасы марапатталды. Ал «Өнерлі отбасы» номинациясы Тасбөгет кентінен Бөлегеновтер отбасына, «Өнегелі әулет» номинациясы Айнакөл ауылының Смағұловтар әулетіне табысталды.
А.СЕЙІЛ
Жылдам ақпарат алу үшін Facebook, Instagram желілері мен Telegram каналымызға жазылыңыз!