Сыр өңірінің бас қаласы Қызылорда құрылыс қарқыны бойынша көш бастап тұр. Заманауи өркениетпен бой көтерген зәулім үйлер қала халқының сәулетті тұрмысын паш еткендей.
Саннан бөлек сапаға маңыз берген құрылысшылардың қолтаңбасымен ерекшеленген әсем үйлерге қоныстанған қызылордалықтардың да қуанышында шек жоқ.
Халықтың аз қамтылған тобына баспана беру, қамқорлық көрсету – еліміздің әлеуметтік-экономикалық даму бағдарының негізгі басымдығы екені белгілі.
Өткен жылы аймақта 4108 пәтерлік 300 тұрғын үй салынған. Нәтижесінде 2 400-ге жуық пәтер табысталып, 11 мыңнан астам тұрғынның баспана мәселесі шешімін тапқан. Биыл бюджет қаражаты есебінен 13,3 млрд теңгеге 1269 пәтерлік 67 тұрғын үй құрылысы жүргізілмек. Алдағы уақытта бұл көлем тағы да ұлғаяды. Жыл басынан бері Тасбөгет кентінде 172 отбасы баспаналы болса, наурыз мерекесі қарсаңында Жаппасбай батыр көшесіндегі көпқабатты үйден 80 отбасыға үй берілді. Жуырда ғана 150 отбасыға Жаппасбай батыр көшесінен пәтер кілті табысталды. Мұнан бөлек, алдағы уақытта «Сыр жастары» жеңілдетілген ипотекалық несие бағдарламасымен тағы да 60 шақты жас отбасы баспанамен қамтылмақ.
– Бүгін өзіміздің құтты қонысымызға келіп, риза болып отырмыз. Үй өте сапалы салынған. Баспалдақтары үлкен кісілерге лайықталып жасалыпты. Қабырғалары қалың. Подьездің ішіне жарық орнатылған. Есіктің алдына балалар алаңы салынған. Балаларымыз емін-еркін ойнап жүр. Енді үйді күтіп ұстап, тазалық сақтау тұрғындардың өзіне байланысты. Қызылордалықтар қазір қоныстойын көп тойлап жатқанын естіп қуанып жатырмыз. Қалада әсем ғимараттар, 7 қабатты тұрғын үй, әлеуметтік нысандар бой көтеруде. Үлкендер жағы осы өзгерістерге қуанып жатырмыз. Құрыш қолды құрылысшыларға мың алғыс, – дейді жаңа пәтерге ие болған көпбалалы ана Феруза Әбжанова.
– Жолдасым өмірден өткеннен бері үй кезегінде тұрғанмын. 17 жыл дегенде баспанаға қол жеткізіп отырмын. «Үйіңіздің кілтін алып кетіңіз» деген кезде қобалжыдым, сенбедім. Кілтті қолыма алған кезде ғана мұның рас екеніне көзім жетті. 3 бөлмелі пәтер алдым. Тасбөгеттің дәл орталығында. Күн салқын кезде көшіп келдік. Бірақ өте жылы, сапалы салынған. Көршілеріміз де сенімдерінің ақталып, жақсы баспанаға қол жеткізгеніне дән риза. Балаларымыз аулада асыр салып ойнап жүр. Бұдан асқан қуаныш бар ма? Алғысымыз шексіз, – дейді Роза Әбілдаева.
– Анам – мүгедек, әкем жоқ. Тек анамыздың зейнетақысымен күн кешіп отырмыз. Баспанаға зәру едік. Жақсы пәтерге қол жеткізіп, қуанышымызда шек жоқ. Өз үйің болғаны қандай жақсы. Анам да риза. Кезекке 2010 жылы тұрған едік. 14 жыл дегенде құтты мекенімізбен қауыштық. Ел ағаларының қамқорлығына рахмет! Облыс, қала әкімдеріне алғыс айтамын, – дейді 16 жастағы Бақдәулет Әбілдаев.
«Ел игілігіне қызмет ететін нысандардың құрылыс сапасына асқан жауапкершілікпен қарау керек. Сала басшылары өзіне қатысты әр жобаның уақытылы, әрі сапалы жүзеге асыруын бақылауда ұстауы қажет. Басталған құрылыс жұмыстарын тиянақты орындап, мерзімінде пайдалануға беруді тапсырамын», – деген болатын облыс әкімі Нұрлыбек Нәлібаев жуырда өткен жиында.
Бүгінде құрылысшылар өз жұмыстарын сапалы, тиянақты, мерзімінде орындап, ел алғысына бөленіп отыр
Г. ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!