Жазушының айтуынша, «Жазушылық дегеніміз – шындыққа жүгіну, ал әдебиет дегеніміз – сол шындықты шырақ алып іздеудің бір формасы». Жазушы шығармаларының басты тақырыбы – адамның рухани ізденістері, табиғат пен адамның арасындағы байланыс, адамның ішкі жан дүниесінің күрделі қырлары. Оралхан Бөкей шығармаларында шынайылық пен терең философиялық ой ұштасып жатыр.
Өзінің ұшқыр да, өткір ойларымен танымал Әбіш Кекілбаев «Оралхан Бөкей жиырмасыншы ғасырдағы қазақ әдебиетінің ең сүлей суреткерінің бірі ретінде әлемдік танымалдыққа ие болды. Оралхан аз ғұмырында сондай асқаралы биікке өзін де, елін де, туған әдебиетін де шығарып үлгерді» деген бағасын берген.
Ал жазушының қарындасы Ғалия Бөкейқызы «Оралхан ағам жастайынан жазушы болуды армандайтын. Мектеп қабырғасында жүріп-ақ әдеби шығармаларды көп оқыды. Кейде кітаптан бас көтермей отырғанын көрген ата-анам «көзіңді құртасың, оқыма» деп тыйым салатын», – деп қаламгердің жастайынан әдебиетті құштарлықпен оқып, өз арманына жете білгенін жеткізді.
Оралхан Бөкей – ұрпаққа ұлағатты үлгі. Жазушының шығармашылығын насихаттауға арналған тәрбие сағаты үлкен әсерлі іс-шара ретінде ұйымдастырылды. Бұл шараның басты мақсаты – ұлы жазушының бай мұрасын жастарға таныту, оның шығармалары арқылы рухани тәрбие беру болды.
Тәрбие сағаты барысында Оралхан Бөкейдің танымал шығармаларының бірі – «Апамның астауы» атты шығармасынан спектакль қойылып, студенттерге ерекше әсер сыйлады. Бұл туындының көмегімен студенттерге ана мен бала арасындағы қарым-қатынасты көрсеттік. Балалар спектаклді үлкен ықыласпен тамашалап, шығарманың терең мағынасын түсініп, ой-пікірлерін айтты.
Сонымен қатар Оралхан Бөкейдің шығармаларына арналған кітап көрмесі ұйымдастырылды. Онда жазушының туындылары, өмірбаяны мен шығармашылық жолы туралы материалдар қойылып, студенттер жазушының бай мұрасымен жақын танысты. Көрмені тамашалаған оқушылар жазушының шығармаларына қызығушылық танытып, кітаптарды парақтап, сұрақ қойып, білімдерін толықтырды.
Іс-шараның ерекше сәттерінің бірі – домбырамен сүйемелденген әндердің орындалуы болды. Балалар Оралхан Бөкейдің шығармашылығы мен табиғат туралы ой-толғамдарын музыка арқылы сезінді. Әсіресе, домбыраның күмбірлеген үні мен өлең жолдарының үйлесімділігі оларға ерекше әсер етті.
Балалар тәрбие сағаты барысында көптеген мәліметтер алып, жазушының шығармаларының мағынасын түсінуге мүмкіндікке қол жеткізді. Оралхан Бөкейдің мұрасы – өскелең ұрпақ үшін шынайы тәрбие құралы. Рәбиға Сыздық «Жазушы Оралхан Бөкеев – туған өлкесі – әсем Алтайдың, асқақ Алтайдың жыршысы!» деп баға берген. Оралханның әрбір туындысында асқақтық пен ұлттық рух айқын сезіледі.
Бақытжан АХУНОВ,
М.Мәметова атындағы Қызылорда педагогикалық жоғары колледжінің қазақ тілі мен әдебитеті пәнінің мұғалімі
Жылдам ақпарат алу үшін Facebook, Instagram желілері мен Telegram каналымызға жазылыңыз!