Жұмысшы мамандықтары жылы аясында биыл агро-индустриялық жобаларға қажет мамандар даярлау үшін мемлекеттік тапсырыс саны 5308 орынға дейін ұлғайды. Әрине, бұл өз кезегінде өндірістегі маман тапшылығын жоюға үлкен ықпал болары сөзсіз.
С.Ықсанов атындағы Қызылорда ІТ техникалық жоғары колледжі жұмысшы мамандықтар жылына тың бастамамен кіріскен. Биыл оқу орнына әрбір мамандыққа сай жаңа техникалар алдырылуда. Колледждің материалдық-техникалық базасы нығайтылып жатыр. Техник-механик, техник-слесарь, химиялық лаборант, дәнекерлеуші тәрізді мамандық даярлауда ұстаздар алдыңғы қатарда келеді. Шәкірттерінің өзі шыңға шығып, өз ісінің майталман мамандарына айналған.
– Мың рет естігеннен, бір рет көрген жақсы. Студенттеріміздің әрқайсысы өз мамандығы жайлы білсін, көзбен көрсін деп өңірдегі зауыттар мен фабрикаларға, мекемелерге апарып жүреміз. Тіпті өндірістік тәжірибеден өту дегеніңіз қазір біздің шәкірттеріміз үшін жұмысқа дейінгі сынақ тәрізді. Тыңғылықты дайындалып, өздерінің мамандыққа деген құрметі мен ықыласын танытып жүр, – дейді оқытушы Самат Мұқанов.
Ашығын айту керек, қазір күріш зауытының өзінде иығына қап салып, арқалап бара жатқан жұмысшыны көрмейсіз. Барлық жұмыс автоматтандырылған. Тетік арқылы басқарып отырған оператордың жұмысына байланысты. Ал көлікке жүк артуда тағы да арнайы техника көмекке келеді. Қазір оқу орны мұндай бағыттың әрбірін студенттерге тәптіштеп түсіндіріп, аралап көрсетіп жүр.
– Әрине, автоматтандырылған жүйеде жұмысшыға жағдай жасалған. Қазір біздің өзімізде арнаулы мекемедегідей жағдай бар. Іште сабақ барысында студентке түсіндіретін, қолмен ұстатып, көзбен көрсететін құрылғылар жетерлік. Мысалы, бір ғана дәнекерлеуші мамандығын алсақ, металды кесіп, тесіп, дайындап, тіпті ою да сала алатын деңгейдегі дәнекерлеу аппараттары қолданыста. Қазір әрбір мамандықтың арнаулы кабинеті жасақталған, студент толыққанды маман болып шығады, – дейді Самат Күзембайұлы.
Абай Бекмырзаұлы бұрын қаладағы кәсіптік лицейлердің бірінде білім алған. Десе де ол мамандықпен жұмыс істемейді. Ол қазір де дәнекерлеуші мамандығы бойынша еңбек етіп жүр.
– Рас, өмірден өз жолымды табамын деп бірнеше мамандықты ойладым. Алдымен құрылысшы мамандығы бойынша білім алдым. Бірақ дәнекерлеу ісіне қызығушылығым ауды. Кейін қайтадан құжат тапсырып, дәнекерлеу ісі бойынша білім алдым. Қазір отбасымның нәпақасын осы саладан тауып жүрмін. Қызығушылығың болса, бәрі де қолдан келеді. Ал қазіргі таңда сол біз оқыған оқу орындарында жасалып жатқан жағдайды көргенде қайтадан оқығың келеді. Біз жұмыс барысында қолға ұстап көрмеген құрал-жабдықтар бүгінгі студенттің алдында тұр. Олар қандай бақытты, – дейді ол.
Жұмысшы мамандықтардың қоғам үшін маңызы зор. Көптің қолынан келмейтін іс осы кісілердің құрыш қолымен бітіп жатыр. Зәулім ғимараттардың қасбетінен бастап, ішкі жабдықтарына дейін сіз осы кісілердің көмегімен қол жеткізесіз.
Аян СПАНДИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!