Адам бойындағы биік талғам мен сырбаз сезімді, нәзіктік пен нақтылықты айшықтайтын би өнеріне деген құрмет қашан да айрықша. Осынау ұлы өнерді мансабына балап, еңбек жолына жалғаған “Томирис” және “AI-ARU” би ансамблдері Сыр елінің бекзат болмысты би өнерін дамытуға үлес қосып келеді. Филармония жанынан құрылған қос ұжым, бірі — ұлттық бағытта, бірі — заманауи би бағытында өздерін ұдайы дамытып, кәсіби біліктіліктерін шыңдап отырады. Жан-жақтылық пен жинақылықты жөн көретін өнер иелері түрлі шеберлік сағаттарына қатысуды да әдетке айналдырған.
Бұл жолы “Мәдениет саласының үздігі” төсбелгісінің иегері, филармонияның бас балетмейстері Гүлбану Мырзабаеваның бастамасымен би ұжымдарына балет әртісі, хореография магистрі, классикалық би жанры бойынша халықаралық конкурстардың дипломанты, “AI-ARU” заманауи би ансамблінің репетиторы Шыңғыс Акижанов классикалық би бағыты бойынша шеберлік сағатын өткізді.
Әуезді әуен мен әдемі қимыл өзара үйлесім тапқан шарада өнер иелері өзара тәжірибе алмасып, жас бишілердің шығармашылық шыңдалуына септігін тигізді. Классикалық бағытта би элементтерін үйрету, негізгі қозғалыстарды меңгертуді мақсат еткен шеберлік сағаты екі күнге жалғасты.
Жылдам ақпарат алу үшін Facebook, Instagram желілері мен Telegram каналымызға жазылыңыз!