Қаламызда қоғамдық даму министрлігінің бастамасымен жастарды әлеуметтендіруге бағытталған мүмкіндіктер керуені аясында республикалық «TULGA BOL» атты жәрмеңке өтті.
ҚР Мемлекеттік жастар саясатының 2023-2029 жылдарға арналған тұжырымдамасын іске асыру аясында ұйымдастырылған жылжымалы жәрмеңкеде жастарға арналған бос орындар ұсынылып, тиісті кеңес беріліп, жас түлектерге оқу орындары таныстырылды.
– Қазіргі таңда аймақта 250 мыңға жуық 19-35 жас аралығындағы жастар бар. Жастарымызды қоғамның белсенді азаматтар қатарына қосу, оларды әлеуметтендіру, қоғамға қажетті азамат ретінде тұлға етіп қалыптастыру – мемлекеттің маңызды саяси бағыттарының бірі. Бүгін өңірімізден бастау алып отырған жәрмеңке 30-шы маусымға дейін аудан және ауылдарда жалғасын табады, – деді облыстық қоғамдық даму басқармасы басшысының орынбасары Уәлихан Ибраев.
Жәрмеңке аясында «Кітап сыйла» акциясы, «Дәрігер қабылдауы» жылжымалы медициналық бекеті, спорттық ойындар (арқан тартыс, қол күрес, гір көтеру, шахмат, тоғызқұмалақ), «Art-class» шеберлік сағаты ұйымдастырылды.
Шараға жұмыспен қамтуды үйлестіру және әлеуметтік бағдарламалар басқармасынан, облыстық білім басқармасынан, «Тұрғын Үй Құрылыс жинақ Банкі» АҚ Қызылорда облысы бойынша филиалы, облыстық Жастар денсаулығы орталығынан, және басқа да мемлекеттік мекеме өкілдері қатысты. Жастарға, жас отбасыларға тұрғын үй алуға кеңес, мемлекеттік акциялар туралы, кәсіптік бағдар беру, жастар денсаулығы жайлы жан-жақты ақпарат берілді.
Назкерімсұлу ӘУБӘКІР,
Қорқыт ата атындағы
Қызылорда университетінің
3-курс студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!