Қала әкімі Асылбек Шәменов тұрғындармен кездесіп, талап-тілегін тыңдады. Дүйсенбіде Белкөл мен Тасбөгет кентінен басталған кездесу қалаға қарасты ауылдарда жалғасты. Тұрғындар жол, су, жарық сынды басқа да мәселелерді көтерді.
Қызылжарма: Су мәселесі шешілген күн
Осы орайда қала әкімі Асылбек Шәменов Қызылжарма ауылдық окурігінің халқымен кездесіп, ауылдағы атқарылған жұмыстармен танысты. Сондай-ақ тұрғындардың түйіткілді мәселесін тыңдады.
Қала іргесіндегі Қызылжарма ауылында аяқ су ең өзекті мәселенің бірі еді. Бүгін міне, округке бір емес үш дренажды су ұңғымасы орнатылып, пайдалануға берілді. Олар ауылдағы Ұстабаев, Н.Ілиясов, №63 көшелерге орнатылды.
Қызылжармалықтар ең алдымен ауыл жолдарының қашан жөнделетінін сұрады. Жасыратын несі бар, жаңбыр жауған күндері батпақтан қанша бала мектепке жете алмай, үстері бүлініп, үйіне жылап бара жатқанын көзіміз көріп жүр. Бұл – ауылдағы өзекті мәселенің бірі. Сондай-ақ халық жаңа мектеп салу керегін де жыл сайын айтудан жалыққан емес. Себебі ауылдағы бір мектепте бала саны белгіленген нормадан екі есе артық. Бұл жерде әңгіме сыйымдылыққа байланысты
Сонымен қатар мұндағы жатақхана тұрғындары көпқабатты үйдің кәріз жүйесінің күрмеулі мәселесін көтерді. Қала басшысы бұл мәселеден хабардар екенін айтып, жан-жақты зерттеу жүргізіп, алдағы уақытта осыған байланысты жұмыс істейтінін жеткізді.
Ауыл тұрғындары қоғамдық көлік мәселесін де сөз етті.
– Қазіргі кезде бұл жағдай облыс әкімі Н.Нәлібаевтың жіті қадағалауында. Ең күрделі мәселенің бірі. Көліктің жетіспеушілігі барын мойындау керек. Сондай-ақ «Автобус паркі» мекемесінің жұмысын да күшейту қажет. Бүгінде 150 заманауи автобусқа тиісті қаражат бөлінді. Алдағы оқу жылына дейін 20-30-ын әкеліп, іске қосамыз. Ал қазан айына дейін жаңа автобустарды толық жеткіземіз. Содан кейін бұл мәселе толық шешіледі деген үміттеміз. Бізге келетін көліктер қытайлық емес, заманауи Қазақстанның өзінің жинап жатқан автобустары. Онда барлық жағдай қарастырылған. Ең бастысы, мүмкіндігі шектеулі жандарға да қолайлы. Алған соң, дұрысын, сапалысын алғанды жөн көрдік, – деді қала әкімі.
Айта берсең мәселенің шеті бітпес. Десе де жақсы жаңалық та аз емес. Мәселен, «Балалар жылына» орай Досхожин көшесінде балалар ойын алаңы салынып жатыр. Бүгінде «Сапақ» ӨК мердігер мекемесінің директоры Бекболат Есанов өз қаражаты есебінен құны 17,5 млн теңгені құрайтын құрылысты бастап кетті. Сонымен қатар қасына қосымша спорттық «Воркаут» алаңы салынады. Осылайша жеке кәсіпкер қыркүйек айының басында көптен күткен Қызылжарманың кішкентай бүлдіршіндеріне тосын сыйын тарту етпек.
Бүгінде Қарауылтөбе ауылдық округіне баратын жолдың құрылысы қарқынды жүріп жатыр. Мұны да қала әкімі көзбен көріп, жұмыс барысымен танысты. Қазіргі кезде орташа жол жөндеу, асфальт төсеу жұмыстарымен «Қызылорда жолдары» ЖШС мердігер мекемесі айналысуда. Құрылысқа 87 млн теңге қаражат бөлінді. Бұл жұмыстар қазан айында бітіп, ел игілігіне толық пайдалануға берілмек. Сонымен қатар жыл соңына дейін 8 көшеге тас төселеді. Екі сағатқа созылған кездесуде ауыл тұрғындары базынасын айтып, халықпен етене жақын араласқан қала әкіміне алғысын білдірді.
– Нарықтық заманда ел үшін еңбек етіп, халықтың қошеметіне бөлену үлкен ерлікпен пара-пар. Ел басқару екінің біріне бұйыра бермейтін бақ. Сондықтан осы бақты ұстап тұру, халыққа адал қызмет ету әкімдерге үлкен сынақ. Әрбір ісіңе береке тілейміз, – деді ауыл ақсақалы Қожахмет қажы.
Қосшыңырау: Түйінін тарқатар мәселе көп
Қала әкімі Асылбек Шәменовтің тұрғындармен кезекті кездесуі Қосшыңырау ауылдық округінде өтті. Оған қалалық мәслихат хатшысы Ибадулла Құттықожаев қатысты.
Кездесуде Қосшыңырау ауылының байырғы тұрғыны, зейнеткер Кеңесбай Ақбергенов ауыл тұрғындарының атынан округке көгілдір отын қашан жеткізілетінін сұрады. Қазіргі таңда бұл ауылдағы ең өзекті мәселе осы болып тұр. Қала әкімі газ тартудың жоба-сметалық құжаттары дайын екенін атап өтіп, жуық арада жұмысы басталатынын мәлім етті.
Тұрғындардың билікке айтар базынасының бірі – Досан ауылындағы медициналық қызмет сапасын арттыру. Яғни осында ауыл тұрғындарына қажетті дәрігерлік амбулатория салынса деген ұсыныс.
– Елдің ұсынысы орынды. Мәселені жан-жақты зерделеп, тиімді шешім қабылдайтын боламыз, – деді қала әкімі.
Тағы бір өзекті мәселе – жол инфрақұрылымын дамыту. Ауыл тұрғындары әкімге жолдарға жөндеу жүргізу туралы өтініш білдірді. Әкім жұмыс басталғанын, аяқталуы күзге жоспарланғанын жеткізді. Есепті кездесуде шешімін күткен мәселелер жайлы жан-жақты айтылды. Ауыл тұрғындары «барлығы жақсы» деп жаба тоқымай жандарына қажетті деп танығандарын бүкпесіз баяндады. Билікте тізгін тартып, томаға тұйық үнсіз қалмады. Тұрғындардың талабын тыңдап, шаруаны ширатып, шемін табуы тиіс істерді ілгерілететінін тілге тиек етті.
Ауыл тұрғындарының айтар мәселелері толастамады. Соның бірі – аяқ су мәселесі. Тұрғындардың тіршілігі мал шаруашылығымен тығыз байланысты. Сондықтан оның жем-шөбі мен суы ойландыратын һәм ойланатын түйткіл. Тағы бір проблемалық мәселе – мектепті күрделі жөндеуден өткізу. Әкім қала көлеміндегі мектептерге жөндеу жұмыстары реттілігімен жасалып жатқанын жеткізді. Тұрғындардың сұрақтарын саралап, аяқ су мәселесі де толыққанды қаралатынын, екі су тарту насосы орнатылатынын айтты.
Қарауылтөбе: Мәдениет үйі салынуда
Қарауылтөбе ауылындағы кездесу жаңадан салынып жатқан клуб үйі алдында өтті. Қалаға жапсарлас орналасқан бұл елді мекенде екі жарым мыңдай халық тұрады. Халықтың басым бөлігі егін және мал шаруашылығымен айналысады. «Өңірлерді дамыту» мемлекеттік бағдарламасы аясында көшелерге жарық бағаналары орнатылды. Ауылдың басты жаңалығы «Ауыл – ел бесігі» мемлекеттік бағдарламаы аясында 150 орындық клуб салынуда. Оған республикалық бюджеттен 286,4 млн теңге қарастырылып, «Өмірзақ» ЖШС мердігер мекемесі құрылыс жұмыстарын жүргізуде. Жыл соңына қарай толығымен аяқталып, заманауи талапқа сай жаңа мәдениет үйі халық қажетіне ұсынылмақ.
– Халқымызда қанағат ету деген жақсы сөз бар. Ауыл ажары жыл өткен сайын жаңарып, жасарып келе жатыр. Оны айту керек. Инфрақұрылым игілігін де көріп келеміз. Көптеген ауылдармен салыстырсам даму динамикасы көңіл құсын көкке шарлатады. «Ел болғасын жақсылық, жамандық бар, ескіретін кезі бар жаңаның да» деп бекер айтылмаған. Елдің ендігі ұсынысы ауылда әлеуметтік дүкен салынса деген ой. Тұрмыстық қолданысқа қажетті өнімдерді арзандатылған бағада сатып алар едік. Жеке саудагерлер көтерме бағамен сатады. Оны барлық тұрғынның бірдей қалтасы көтере бермейді. Осыны назарға алсаңыз, – деді ауыл тұрғыны Оразбек Бейісов.
Қала әкімі ұсыныс орынды екенін жеткізіп, заңдылықтарына сәйкес жолдарын қарастырып, мүмкіндігінше жақын арада қолға алатынын айтты.
Ауыл халқы мдециналық пункт халықты қабылдауға қауқарсыз екенін айтып, заманауи талапқа сәйкес жаңа амбулатория салынса деген тілегінде білдірді.
– Тұрғындардың денсаулығы басты назарда болуы тиіс. Сондықтан қажетті шараларды қабылдап, заңнамаға сәйкес тұрғындардың тілектерін ескеріп, жергілікті халықтың әлеуметтік мәселелерін шешуге белсене атсалысу біздің басты борышымыз. Нақты шаралар әзірленетін болады, – деді қала әкімі.
Есеп беру жиынында тұрғындар ауылдағы бірқатар әлеуметтік мәселелерді шешіп бергені үшін де қала әкіміне алғыстарын білдірді. Тұрғындар сонымен қатар қоғамдық көлік қатынасы мен балалар ойын алаңы салынса деген ұсыныстарын айтты.
АҚЖАРМА: Дәрігерлік амбулатория қажет
Қала басшысы Асылбек Шәменов аптаның сейсенбі күні Ақжарма ауылдық округінде болып, тұрғындардың өтішін-тілегін тыңдады. Атқарылып жатқан жұмыстарды өзі барып көрді.
Қала әкімі алдымен ауылдағы кәсіпкерлікті дамытып, шаруасын дөңгелетіп отырған кәсіпкер Серік Жанайдаровтың шаруа қожалығымен танысты. 2018 жылы кәсіпкер Талдыарал елді мекенінен мал басын көбейту және бордақылау алаңын салу мақсатында кәсібін бастаған. Ал 2021 жылы «Өңірлік инвестициялық орталығы» арқылы кәсіпкерлерге берілетін шағын несиелендіру бағдарламасы аясында оның ішінде «жылқы, мүйізді ірі қара малын өсіру және көбейту, бордақылау» бағытындағы жобасы негізінде 5 млн теңге қаржы алған. Бүгінгі таңда шаруашылық қала халқына ет және сүт өнімдерін ұсынып келеді. Қала басшысы кәсіпкердің жұмысына сәттілік тілеп, алдағы уақытта жұмысы жандануына тілектестігін жеткізді.
Кездесуде тұрғындар қала әкіміне дәрігерлік амбулатория салынса деген өтініштерін жеткізді.
– Баймұрат батыр ауылына дәрігерлік амбулатория салуға жобалау-сметалық құжаты дайындалып, мемлекеттік сараптаманың оң қорытындысы алынған. Дәрігерлік амбулатория салу үшін облыстық бюджеттен 422 млн теңге қаржыға өтінім берілді. Алдағы уақытта жаңа нысанның иігілін ауыл тұрғындары көреді деп сенеміз, – деді қала әкімі.
Сонымен қатар жаңадан салынып жатқан үйлерге электр желілерін тарту мәселесі сөз болды. Интернет жылдамдығының баяу екені де айтылды. Шаһар басшысы көтерілген мәселелер кезең-кезеңімен іске асуы үшін тиісті бөлім басшыларына тапсырма берді. Биыл Ақжарма ауылында бірқатар іс атқарылған. Мәселен, округ және Талдыарал елді мекені бойынша маусымдық аяқ сумен қамтамасыз ету мақсатында республикалық бюджеттен 29,6 млн теңгеге ұңғыма орнату жұмыстары жүргізілген. Сондай-ақ Тоғай көшесіне түнгі жарық шамдарын орнату бойынша қалалық бюджеттен 2,5 млн теңге бөлініп, «Энергия Нұр» ЖШС түнгі жарық шамдарын орнатуды бастап кеткен.
Қызылөзек: Бақшалы ауылға қосымша насос керек
Қызылөзек ауылдық округіндегі кездесуін қала әкімі Асылбек Шәменов №175 мектептің автономды қазандығының құрылысымен танысудан бастады. Бұған дейін көмірмен жылытылған мектеп биылдан бастап автономды бу қазандығы арқылы жылытылмақ. Жалпы құны 42,6 млн теңгені құрайтын жобаның мердігері − «Компания Газ Строй» ЖШС. Құрылыстың жай-күйімен танысқан шаһар басшысы жауапты мамандарға қазандық құрылысын кешіктірмей және сапалы салуды тапсырды.
Мұнан соң қала әкімі ауылда картоп өсірумен айналысып жатқан ауыл тұрғындармен кездесті. Бұл ауылдық округте жалпы көлемі 507 гектар егіс алқабы бар. Оның 180 гектарына бақша өнімдері, 187 гектарға көкөніс, 140 гектарға картоп және 70 гектарына жоңышқа егілген. Мәселен, «ДСУ» учаскесіндегі 15 гектар жерге ауылдағы 30 отбасы картоптың «Гала» сорты мен көкніс еккен. СНП-500/10 насостық су қондырғысы арқылы су келетін бұл жерден алдағы уақытта гектарынан 200 центнер өнім алуды жоспарлап отыр. Қала басшысы еңбек етіп жатқан тұрғындарға алғыс айтып, өнім мол болсын деген тілегін жеткізді.
Ал ауылдық клуб арнасында еркін форматта өткен кездесуде ауыл тұрғындары шаһар басшысы мен жауапты мамандарға өз сұрақтарын қойды. Мәселен, Бақтияр Айтжанов ауылды аяқ сумен қамтитын «Шегіртке» шабындығына су әкелуді сұрады. Себебі бұл мәселе шешілсе ауылда мал жайылымдық жері көбейер еді. Бұл сұраққа «Қазсушар» ШЖҚ РМК Қызылордадағы филиалы «Қызылордасушар» мекемесінің басшысы Жорабек Нұрымбетов: «Левая ветка» каналының аяғын «Шегіртке» шабындығына дейінгі аралықты тазарту бойынша зерттеу жұмыстары жүргізіліп, жоба-сметалық құжаттары әзірленді. Алдағы уақытта республикалық, облыстық бюджеттен қаржы бөлу туралы бюджеттік өтінім беріледі», − деп жауап берді.
Ал Тұрсынкүл Ибраеваның СНП-500/10 насос қондырғысына тағы қосымша насос алу туралы өтінішіне қала әкімі тиісті заңдылықтарға сәйкес бюджеттік өтінім ұсынылғанын, келесі жылға сатып алу жоспарланып отырғанын жеткізді. Ауылға газ жүргізу мәселесі де кезең-кезеңімен атқарылатыны айтылды. Сондай-ақ кездесуде зейнеткер Тоқтарбай Дүрманұлы ауылдағы жайылымдық жерлерді сатпау керектігін және пайдаланылмай жатқандарын қайтару қажеттігін ескертті. Бұл сұраққа қала басшысы елді мекен аумағынан 5 шақырым жерге дейін жайылымдық және басқа да жерлер жекеге берілмейтінін айтты. Айнаш Мыханованың Қараөзектегі Арғын көшесін жөндеу жұмысы жайлы сұрағына әкім «Арғын көшесін орташа жөндеу жүргізу үшін жоба-сметалық құжаттары әзірленіп, облыс пен қала бюджетінен қаражат күтілуде», − деді. Ауылға балалар алаңын салу туралы Әмірғали Өмірғалиевтің ұсынысына «Балалар жылына» байланысты кәсіпкерлер демеушілігімен ойын алаңын салу қала мен ауылдарда да қатар жүретіні айтылды.
Талсуат: Клуб құрылысы қатаң бақылауда
Қала әкімі Асылбек Шәменов Талсуат ауылдық округінің халқымен кездесуден бұрын елді мекендегі Ә.Байкенжеев көшесіндегі ұңғыманы көрді. Қалалық тұрғын үй коммуналдық шаруашылығы, жолаушылар көлігі және автомобиль жолдары бөлімінің тапсырысымен салынған ұңғыма 90 метр тереңдіктен су шығаруда.
«Бақ-Береке 2003» жауапкершілігі шектеулі серіктестігі ұңғыманы 10 маусымда аяқтаған. Ауылды көгалдандыруға және бақша егуге септігін тигізетін бұл ұңғыма көп уақыттан бері аяқ сусыз отырған ауылдың мәселесін шешкендей. Ауылда қазіргі кезде 2 ұңғыма іске қосылып, халық игілігіне қызмет етуде.
Одан бөлек биыл ауылда 150 орындық клуб құрылысы басталды. Келесі жылға өтпелі жобаның жалпы құны 281 млн теңге. Қала әкімі мердігер мекемеге құрылысты сапалы, Қазақстан Республикасының заңы мен нормаларына сай жасауды тапсырды. Сондай-ақ құрылыс барысында тұрғындардың талап-тілектерін және ескертулерін ескерусіз қалдырмауды да талап етті.
Халықпен кездесу кезінде ауыл тұрғыны Жұмахан Нұрсейітов ауылдағы аяқ су мәселесі қашан шешілетінін сұрады. Кездесуге келген жауапты мамандар бұл мәселеге байланысты қайтадан ұсыныс беріп, аяқ су берудің басқа жолын қарастыратынын жеткізді.
Жиында ауыл тұрғындары жол қауіпсіздігі мәселесін де көтерді. Қалааралық автожол бойында орналасқан ауылға кіреберіске жақын жерде арнайы белгі қою туралы ұсыныс айтылды. Сонымен қатар ауыл ішіндегі көлік қатынасына да бақылау керек екені сөз болды. Бұл мәселеге байланысты қала әкімі полиция басқармасына ұсыныс берілетінін айтты. Ал ауыл ішіндегі көліктердің жол-ережесін бұзбауын учаскелік полицияға тапсырды.
АҚСУАТ: Газ келетін күн жақын
Аптаның сәрсенбісінде қала әкімі Асылбек Шәменов Ақсуат ауылының тұрғындарымен кездесті. Бұл ауылдық округте айшықты істер бар. «Ауылға газ келді» деп сүйіншілейтін күн де алыс емес. Қала басшысы ең алдымен газ тарту бойынша жасалып жатқан жұмыстарды аралап көрді. Газ тарту жұмыстары өткен жылы басталған. 2023 жылға дейін аяқтап, ел иігілігіне беру жоспарланған. Орташа қысымды 900 шақырым газ құбыры толығымен аяқталған. Ал төменгі қысым 120 шақырымның 50 шакырымы қалып тұр. Осы кезге дейін 10 жұмысшы топ жұмыс істеген. Техника қызметкерлері мекеме есебінен келгенмен, жұмысшыларға ауыл азаматтары тартылған.
– Қолға алған іс – үлкен жоба. Сондықтан жауапкершілік қажет. Жоба негізінде қалып қойған үйлер болса газ тарту кезінде есепке алынсын. Ауылга келіп тұрған газдың игілігін көре алмайтындай мәселе болмасын. 5 млрдқа жуық қаржы қаралған. Бұл жұмыстың соңынан қателіктер шықпауы керек. Сонымен қатар қазылған көшені қайта тегістеп, екі жұмыс болмайтын іс істеу қажет, – деді қала әкімі.
Ауыл тұрғындары күннен күнге көбейіп, жаңадан қоныс аударғандар бар. Сондықтан да инфрақұрылым мәселесі назардан түспей тұр. Жаңадан көше қосылғандықтан жол мен жарықтан қиындық болады. Кездесу барысында инфрақұрылым төңірегінде сұрақтар қойылды. Манабаев көшесін асфальттау мәселесі айтылды.
– Жол салу деген керіп тартып, жасай салатын кір жаятын жіп емес. Алдымен жоба жасаймыз. Ол эксперттік тексеруден өтіп зерттеледі. Құжаттары бойынша 5-6 ай уақыт кетеді. Осыны тұрғындар түсінуі керек. Кейбір тұрғындардың айтуынша, айтты-бітті орындалуы тиіс. Олай болмайды. Жол салу жуапкершілікті талап етеді. Біздің сіздермен кездесудегі мақсатымыз да – осы. Ең алдымен тұрғындардың мұң-мұқтажын, талап-тілегін тыңдап, сол мақсаттағы жұмыстарды қол алу, – деді қала әкімі.
Ал округ тұрғыны Өмірсерік Әбуов мұнда учаске бастығы жиі ауыса беретінін айтып өтті. «Ауылға нақты бір адамды тағайындасын. Енді ауылмен танысып, жұмыс жасай бастағанда ауысып кетеді. Оның себебі неде?» – дейді ауыл тұрғыны.
Қала әкімі маңызды мәселелерді шешу жолында бірлесе жұмыс істеуге шақырды. Тұрғындарды қоғамдық көліктің де мәселесі шаршатып отыр. Жарты сағаттап күтетін №12 бағыттағы көліктің уақыты реттелгенін қалайды. Бұл мәселе бойынша қала әкімі жұмысты нақтылауды тапсырды.
– Ауылымыздың жағдайы жақсы. Халық шүкір деу қажет. Елдің күткені газ. Қала әкімі кездесуде осы жылдың аяғында немесе 2023 жылдың басында ауылға газ берілетінін айтты. Тұрғындар қуанып жүр. Сонымен қатар елді мекен болған соң жарық, жол секілді мәселелер болатыны анық. Бұл проблемалар да кезең-кезеңімен орындалады деп сенеміз, – дейді ауыл тұрғыны Сейтенбай Төребаев.
Ақмарал ОЛЖАБАЕВА,
Тұрар Бекмырзаев,
Айтолқын БАТЫРБАЙҚЫЗЫ,
Аслан НҰРАЗҒАЛИ
Жылдам ақпарат алу үшін Facebook, Instagram желілері мен Telegram каналымызға жазылыңыз!