ҚР Премьер-Министрі Әлихан Смайыловтың төрағалығымен өткен Үкімет отырысында «Ауылдық денсаулық сақтауды жаңғырту» ұлттық жобасын іске асыру жоспарлары мен биылғы агроөнеркәсіп кешенін сумен қамтамасыз ету мәселелері кеңінен қаралды.
Селекторлық жиында облыс әкімі Нұрлыбек Нәлібаев баяндама жасады. Облыс әкімі Мемлекет басшысының және Үкіметтің қолдауымен су тапшылығын төмендетуге нақты шаралар қабылданғанын жеткізді.
– Президент Сырдария өзенінің жоғары ағысында орналасқан мемлекеттермен келіссөздер жүргізіп, тиісті көлемде су бөлінуіне жағдай жасады. Үкімет резервінен 3,6 млрд теңге қаржы бөлініп, каналдар тазаланып, гидротехникалық нысандар жөндеуден өткізілді. 156 дана насос қондырғысы алынып, 52 ұңғыма бұрғыланды.
Нәтижесінде егістік жерлер сумен толық қамтамасыз етіліп, табиғи мал азығымен қамтылу деңгейі жақсарып, көлдер жүйесі суландырылды. Осыған орай, Сыр жұртшылығының Мемлекет басшысына және Үкіметке алғысы шексіз, – деді Н.Нәлібаев.
Өңірде су тапшылығының алдын алу мақсатында биыл күріш егісінің көлемі 5 мың гектарға қысқартылған. Ал орнына суды аз қажет ететін мал азықтық, майлы дақылдармен қатар картоп, көкөніс, бақша егісінің көлемі ұлғайған. Сонымен қатар ирригациялық жүйелердің техникалық жағдайын жақсартуда жерді тегістеу арқылы су пайдалану мөлшерін азайту жұмыстары жүргізілген.
Аймақ басшысы өңірде тамшылатып, суару секілді су үнемдеу технологиясын қолдану арқылы 793 гектар жерге ауыл шаруашылығы дақылдары егілгенін айтып өтті. Бұл ретте шетелдік ғалымдармен жаңа тәсілдерді енгізу жұмыстары бастау алған.
– Бүгінде біз украиндық ғалымдармен әріптестік орнатып, тиісті жұмыстарды бастадық. Сонымен бірге 16 магистралды және шаруашылық каналдарды цифрландыру қолға алынуда. Өңірде егіс көлемінің 60 пайызын сумен қамтамасыз ететін негізгі магистралды каналға су бөлуді автоматтандыру үшін Австралияның «Рубикон» компаниясы зерттеу жұмыстарына кірісті. Аталған шараларды жүзеге асыру арқылы суды пайдалану тиімділігін арттыруға және инженерлік жүйеге келтірілген жерлерді сақтап қалып, егін саласын одан әрі дамытуға мүмкіндік жасалады, – деді облыс әкімі.
Селектордан кейін облыс әкімі Үкімет тапсырмаларын орындау бойынша жиын өткізді. Онда қала, аудан әкімдері мен басқарма басшыларына бірқатар тапсырма берді. Мәселен, денсаулық сақтау басқармасына 2025 жылға дейін салынуға жоспарланған 27 медициналық нысан бойынша жұмыстарды тиімді түрде үйлестіріп, уақытылы пайдалануға берілуін қамтамасыз етуді жүктеді.
Сондай-ақ алдағы жылы егін егу маусымына дайындық шараларын алдын-ала пысықтауды тапсырды. Қыс мезгілінде Шардара су қоймасынан Сырдария өзеніне құйылатын суды қауіпсіз өткізу үшін қажетті шаралар жасалу керектігін айтып өтті. Арал теңізіне қажетті мөлшерде су түсуін қамтамасыз ету үшін нақты шаралар қабылдап, ерекше бақылауда ұстауды міндеттеді.
А.БАТЫРБАЙҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!