Басына түскен қиындыққа қарсы тұрып, қайсарлығы талайды тәнті еткен жанның бірі – Нұрлыбек Байменов. Ол ойда жоқ та бір қолынан айырылып қалған. Қажырлы да қайсарлы жан оған қажымады. Керісінше алға ұмтылды. Бала-шағасын ешкімге мұқтаж етпеуді мақсат етті. Еңсесін көтеріп, көлік жөндеу орталығын ашты.
– Бала кезгі көлік айдап жүрсем деген арманым орындалмай қалды. Әйтсе де оған деген құмарым басылған емес. Бұзылған автокөліктерді өзім жөндей аламын. Техника тілін түсінгесін жаныма жаттығы жоқ. Осының өзі көлік жөндеу орталығын ашуыма сеп болды, – дейді ол.
Ол өзінен бөлек екі адамды тұрақты жұмыспен қамтып отыр. Еңбекақылары да жаман емес. Біз Нұрлыбектің қарамағында жұмыс істейтін Ғабит Әбдіқадыровты әңгімеге тарттық.
– Осында жұмыс істеп жатқаныма екі айға жуықтады. Еңбегімді адал тапқаныма дән ризамын. Нұрлыбек білмей жатқан жерімізді үйретіп, кеңес беріп отырады. Жұмыс уақытымыз да көңілге қонымды. Таңғы 9-дан кешкі 6-ға дейін жұмыс істейміз. Түскі ас барлығы қамтылған. Қазіргі өндірістен шығып жатқан техникалар дерлік заманауи үлгіде. Кей кезде автобөлшектерді басқа өңірлерден алдыртамыз. Сондай сәттерде көлік сәл тұрып қалады. Әйтпесе келген көлікті дер кезінде жөндейміз. Біз үшін ең маңыздысы уақыт үнемдеу, – дейді Ғабит Әбдіқадыров.
Нұрлыбек – Қармақшы ауданына қарасты Дүр Оңғар ауылының тумасы. Сол жерде өсіп, жетіліп, отбасын құрған. Өзі жеті ағайынды. Жұмыс таппай сенделіп жүрген кездері де жоқ емес. Шымкент қаласына дейін барып, біреудің жөндеу орталығында жалданып жұмысшы да болды. Алған ақшасы мардымсыз болғасын, өзі кәсіп ашуды мақсат тұтады. Сөйтіп ойлана келе Қызылорда қаласына қайта келіп, аукцион арқылы шағын жер алды. Бүгінде осында өз кәсібін жүргізіп жатыр.
– Жасыратыны жоқ, үкіметтен бір тиын ала алмадым. Бармаған жерім жоқ. Әрқайсысы әртүрлі сылтау айтады. Өзім үшінші топ мүгедегімін. Бала-шағамды асырау керекпін. Үйдің ер азаматы болғасын барлық жауапкершілік жүгі маған түседі. Балаларымның жүзіне қарап қажыр-қайрат аламын. Олар менің өміріме күш-қуат береді, – дейді Нұрлыбек бізбен әңгімесінде.
Екі қолы сау жігерлі жігіттердің жүрегі дауалай бермейтін зілдей темірлерді Нұрлыбек бір қолымен көтеріп кете береді. Оның бұл қайсарлығына таңданасың. Автокөліктің сан құраулы бөлшектерін жазбай танып, түрлі детальдан тұратын қосындыларын жаңылыспай іске қосып, ұршықша үйіріп жұмыс істеп жүр. Кәсіпкердің жұмысына қолдау көрсетіп отырған – отбасы, анасы, жұбайы, бауырлары. Әрқайсысы өз аттарынан несие алып берген. Барлығын Нұрлыбектің өзі төлеп отыр. Айына алты жүз мың теңге несие төлейтінін де айтып қалды. Өздері ашқан көлік жөндеу орталығы орналасқан көше жөнделсе деген бұйымтайын айтты. Біз көпке үлгі боларлық іспен айналысып жүрген азаматтың базынасын осылайша айна-қатесіз жеткізгенді жөн санадық.
Тұрар БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!