«Әкімге алты сауал» айдарының кезекті қонағы – Талсуат ауылдық округінің әкімі Жылқыбай Айбек Жамалұлы.
Біздің анықтама:
Жылқыбай Айбек Жамалұлы – Талсуат ауылдық округінің әкімі.
1979 жылы Қазалы ауданында дүниеге келген.
2002 жылы Қорқыт ата атындағы Қызылорда мемлекеттік университетін «Экономист-маркетолог» мамандығы бойынша бітірген.
Жалпы еңбек өтілі – 21 жыл.
2020 жылдан бері Талсуат ауылдық округінің әкімі болып қызмет атқарады.
– Талсуаттың тыныс–тіршілігі қалай болып жатыр? Тындырылған іс көп пе, әлде түйіткілді іс басым ба?
– 2022 жылы Талсуат ауылдық округінде біршама жұмыс атқарылды. Атап айтқанда, ауыл тұрғындарын жұмыспен қамтудың белсенді шараларына қатыстыру арқылы 1 адам жастар практикасына, 1 адам әлеуметтік жұмысқа, 15 адам ақылы қоғамдық жұмысқа тартылса, 17 адам тұрақты жұмыспен қамтылды. «Өңірлерді дамыту» мемлекеттік бағдарламасы аясында көшелерді жарықтандыру жұмыстары жүргізілді. Электр желілері талапқа сай жүргізілмеген 13 көшедегі ағаш бөренелерді ауыстыру мақсатында жобалау-сметалық құжаты әзірленіп, сараптаманың оң қорытындысы алынды. Аталған жоба республикалық бюджетке ұсынылып, қазіргі уақытта қаржысы күтілуде. Ауылдық округтегі арық жүйелері жүргізілген 3 көшені аяқ сумен қамту мақсатында 2 ұңғыма қазылып, пайдалануға берілді. Одан бөлек бизнесті қолдау мен дамытудың мемлекеттік бағдарламасы шеңберінде атқарылған жұмыстардың нәтижесінде ауылдық округте 18 ауыл тұрғыны әртүрлі бағытта кәсіпкерлікті дамытуға несие беру орталықтарынан 89,2 млн теңге несие рәсімдеді. Өткен жылы жоспарланған жұмыстардың барлығы атқарылды.
– Алдағы уақытта қай мәселе шешімін таппақ?
– Алдағы уақытта ауылдық округтегі 8 көше орташа жөндеуден өтеді. Атап айтқанда, О.Сауытбаев тұйығы, Құмкөл, Сейхун, Отырар, Сырдария, 7-ші көше, Көкшетау, Қазалы көшелері жөнделмек. Бүгінгі күні мемлекеттік сатып алу конкурсы жарияланды. «Өңірлерді дамыту» мемлекеттік бағдарламасы аясында ауылдағы Ақтөбе және №7 көшеге түнгі жарықтандыру жүргізілетін болды. Одан бөлек біраз жылдан бері мәселе болып көтеріліп жүрген ауылдық округ аумағында орналасқан әлеуметтік қызмет көрсететін 3 мекемеге жаяу жүргіншілер жолын салу үшін жобалау-сметалық құжаты сараптамасымен және Сығанақ көшесіне тас төсеу үшін жобалау-сметалық құжаты сараптамасымен әзірленетін болады. Сонымен бірге өткен жылы құрылысы басталған 150 орындық клуб биыл толығымен аяқталып, ел игілігіне беріледі деп күтілуде. Мұның барлығы талсуаттықтардың игілігі үшін жасалған жұмыс.
– Өткен жылы үлгере алмаған ісіңіз?
– 2022 жылы жоспарланған жұмыстардың барлығын мерзімінде аяқтадық. Дегенмен әрбір мезіретті мезгілдің өзіне сай жұмыс жоспары бекітіледі. Сонымен қатар уақыт талабына сай туындайтын мәселе де болып тұруы заңдылық. Сондықтан ел ішіндегі әрбір істі өз кезеңімен аяқтауға жұмыс жасалуда.
– Тұрғындар қабылдауыңызға қандай мәселемен келеді және қанша адамның мәселесі шешілді?
– Ауыл тұрғындары қабылдауға әртүрлі мәселемен келеді. Соның ішінде балалар ойын алаңын салу, ойын алаңдарына жөндеу жұмыстарын жүргізу, көшелерді асфальттау, жаяу жүргіншілер жолын салу, электр желілерін талапқа сай ауыстыру, көшелерге жарық шамдарын орнату сынды басқа да мәселелер кезең-кезеңімен шешімін табуда. Өткен жылы балалар ойын және тренажер алаңы демеушілік арқылы салынды. Биыл 1 ойын алаңына ағымдағы жөндеу жұмыстары жүргізіледі. Ауылда 8 көше орташа жөндеуден өтеді. 13 көшедегі электр желілерін талапқа сай ауыстыруға жобалау-сметалық құжаты әзірленіп, сараптаманың оң қорытындысы алынды. Бүгінгі күні ұсынылған жобаның қаржысын күтіп отырмыз. Ауылдағы 4 көшеге жаяу жүргіншілер жолын салу және 5 көшені жарықтандыру бойынша жобалау-сметалық құжаты жасалып, екі жобаның да сараптамалық оң қорытындысы алынды. Бұл жобаларды республикалық «Ауыл – ел бесігі» жобасына ұсындық. Халық тарапынан қойылатын қандай мәселе болсын біз үшін өзекті саналады. Ал оның орындалуы – басты талап. Өйткені әкім біткеннің басты мақсаты – ел үшін еңбек ету.
– Өзіңіз басқаратын ауылда тұрасыз ба, әлде қалада ма?
– Иә, ауылда тұрамын.
– Талсуаттағы түйіткілді мәселенің бірі – жол мен балалар ойын алаңы екені айтылып келеді. Бұл мәселе қалай шешіледі?
– Жоғарыда айтып өткендей, 2023 жылы 8 көшеге орташа жол жөндеу жұмыстары жүргізілмек. Қазіргі таңда мемлекеттік сатып алу конкурсы жарияланды. Ауылдағы балаларға арналған ойын алаңының мәселесін шешу мақсатында өткен жылдың қазан айында «Туран ВодСтрой» ЖШС демеушілігімен балалардың ойын және тренажер алаңы салынды. Сонымен қатар 2023 жылы А.Құнанбаев көшесінде орналасқан балалар ойын алаңына ағымдағы жөндеу жұмыстары жүргізілмек. Ауылдағы әрбір мәселе назардан тыс қалмайды.
Тұрар БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!