«Әкімге алты сауал» айдарының бүгінгі қонағы – Ақсуат ауылдық округінің әкімі Мәмбетәлі Ақмырзаев.
– Ауылдық округтің бүгінгі қоғамдық-саяси ахуалы қандай?
– Ақсуат ауылдық округіне 1 елді мекен Жақыпбек Маханбетов ауылы кіреді. Ауылдық округтің бүгінгі қоғамдық-саяси ахуалы тұрақты. Ауылда атқарылған айшықты істер бар. Ауыл халқының тұрмысын көтеру үшін қолға алынған ауқымды жобалардың арқасында округтің келбеті ажарланып, абаттандырылды. Таза ауылға айналды.
– Жыл сайынғы әкім есебі сіз үшін несімен маңызды?
– Халық көкейіндегі жүрген сұрақтарын қойып, жауаптарын алып, ұсыныс, пікірлерін білдіре алады. Тұрғындардың талап-тілегін тыңдаймыз. Сол бойынша жұмыстарды қолға аламыз. Есеп беру мен үшін халықпен кездесіп, атқарылған жұмыстарды көрсетуімен маңызды. Елді мекендегі мәселелердің шешілу жолдары тұрғындармен бірге қарастырылады.
– Көптен күткен газ өткен жылы да берілмеді? Себеп қандай?
– Қолға алған іс – үлкен жоба. Сондықтан жауапкершілік қажет. Ауылдық округті газбен қамту жобасы 2021-2023 жылдарға жоспарланып, 2021 жылы құрылысын бастауға 500 млн теңге бөлінсе, 2022 жылға 2 млрд 439 млн теңге қаржы бөлініп, 16,5 шақырым болатын жоғары қысымды, 9,6 шақырым болатын орта қысымды газ құбыры мен автоматты газ тарату станциясына (АГТС -1- ГГТП -1) кеңейту жұмыстары жүргізіліп, қазіргі таңда, 123 шақырым болатын төменгі қысымды газ құбырын тарту жұмыстары мен үйлерге түтік шығару жұмыстары жүргізілуде. Жобаның жалпы құны – 4 млрд 775 млн теңгені құрап отыр. Халықтың игілігі үшін тиісті жұмыс атқарылып, газды қосу бағытында тиянақты тірліктер жасалды. Ауыл тұрғындарының сүйіншілейтін күні алыс емес.
– Ақсуат ауылдық округіндегі өзекті мәселенің бірі – қоғамдық көлік екені белгілі. Бұл мәселе қашан шешіледі?
– Тұрғындарды қоғамдық көлік мәселесі алаңдатып отырғаны рас. Бұл жөнінде қала әкімінің ауыл тұрғындарымен кездесуде де айтылды. Ауылға қатынайтын қоғамдық көліктер уақыты реттелсе деген талаптары орынды. Қазіргі уақытта тұрғындарға №12 және №2 қоғамдық көліктер қызмет көрсетуде. Жаңа жылдан бастап №12 маршрут қосымша маршруттармен толықтырылып қызмет көрсетуде.
– Елді мекендегі қылмыстық ахуал қандай деңгейде?
– Ауылда ең маңыздысы қоғамның тыныштығы, тұрғындардың қауіпсіздігі. Сондықтан да қылмысқа қарсы күресті күшейтуге, қоғамдық тәртіпті және қауіпсіздікті қамтамасыз етуге, қылмыстарды ашуға бағытталған жұмыстарды дер кезінде жүзеге асырып келеміз. Соның нәтижесінде 2022 жылы 9 қылмыс орын алған. Оның ішінде мал ұрлығы бойынша 3, пәтер ұрлығы бойынша 1, интернет алаяқтарға алданған 5 қылмыс тіркелген. Оның 7-і ашылған.
– Өзіңізге «мен не тындырдым?» деген сұрақ қойып көрдіңіз бе?
– Иә, «мен не тындырдым?» деген сұрақ, әрбір азаматтың атында тұрады. Алға қойған мақсатына жетуге ұмтылады деп ойлаймын. Ауылға әкім болғаннан кейін елді мекенді дамытуға арналған өзіндік жоспарларым кезең-кезеңімен орындалуда.
Мәселен, ауылдық округті газдандыру мәселесі болса, қазіргі таңда құрылыс жұмыстары қарқынды жүргізілуде. Биыл пайдалануға беру жоспарлануда. Ауызсу мәселесі бойынша, ауылдың жаңадан қоныстанушы тұрғындарын ауызсумен қамтудың 2019-2020 жылдарға арналған жоспарына сәйкес, бюджеттен қаражат бөлініп, «Мелиоратор» жауапкершілігі шектеулі серіктестігі құрылыс жұмыстарын жүргізіп, ауыл тұрғындары ауызсумен 100 пайызға қамтылды.
1982 жылы 624 орындық типтік жобада салынған №143 мектептің жылу қазандықтарының ескіруіне байланысты, 2019 жылы қатты отын түрінен, сұйық отын түріне ауыстырылса, 2020 жылы «Ауыл – Ел бесігі» жобасы аясында мектепке күрделі жөндеу жұмыстары жүргізілді.
2013 жылы 300 орындық №268 мектеп-лицейінде оқушылар санының жылдан-жылға артуына байланысты 2021 жылы 200 орындық қосымша ғимарат құрылысы пайдалануға берілді.
Сонымен қатар мемлекеттің шағын және орта кәсіпкерлікті дамытуға жасап жатқан қолдауының арқасында мемлекеттік бағдарламалар аясында 2020 жылы жеке кәсіпкердің «Аңсар – Каусар – 2020» жеке бастауыш мектебі ашылып, мемлекеттік бағдарлама аясында 93 бала білім алып, қосымша 65 бала әртүрлі үйірмелермен, 15 адам тұрақты жұмыспен қамтылды.
1983 жылы салынып пайдалануға берілген балабақша ғимараты 1994 жылдарға дейін жұмыс істеп, 2013 жылдан бастап пайдаланылмай тұрған балабақша ғимаратына 2019 жылы күрделі жөндеу жұмыстары жүргізіліп, 2021 жылы 130 баламен қамтылып жұмыс жасауда.
2021 жылы спорттық көше тренажерын орнату үшін жергілікті бюджеттен қаржы бөлініп, құрылыс жұмыстары жүргізіліп пайдалануға берілді.
«Samruk – Kazyna Trust» корпоративтік қоры ауыл орталығынан 239 млн теңгеге 720 м² болатын спорт кешені құрылысын салуды жоспарлап, қазіргі таңда жұмыстары жүргізілуде.
Сонымен қатар «Балалар жылы» аясында демеушілердің қаражаты есебінен ауылдық округтен екі спорттық ойын алаңдары құрылысын салу жоспарланып 20 х 40 кіші футбол алаңы мен тренажерлық құрылғылары орнатылып 1 спорт, ойын алаңы пайдалануға берілсе, екіншісінің құрылыс жұмыстары жүргізілуде.
Ауылдық округте 2017 жылдан осы кезеңге дейінгі аралықта 60,7 км болатын 55 көшеге жол жөндеу жұмыстары жүргізілсе, соның ішінде «Өңірлерді дамыту» бағдарламасы аясында 4 көшеге асфальт жұмыстары жүргізіліп, «Ауыл – ел бесігі» жобасы аясында 17 көшенің 5-і асфальт, 12-не тас төсеу жұмыстары жүргізілді.
2017 жылы кәсіпкерлердің демеушілігімен «Наурыз» саяжайы көшесінің бір шақырымнан асатын жаяу жүргіншілер жолы салынса, 2018 жылы орталық алаң, 2021 жылы Адыран Найзағараев, Үміт Тоқмағанбетова көшелеріне және №143 мектеп алдына ұзындығы 1,6 шақырым болатын қала көшелерінен ауыстырылған брусчаткалардан жаяу жүргіншілер жолы салынды. 2021 жылы Ақсуат ауылдық округіндегі жаңадан қоныстанушы тұрғындарды электр желілерімен қамтамасыз ету мақсатында, облыстық бюджеттен 184,9 млн теңге қаржы бөлініп, 28 көшеге электр желілері тартылып, 5 дана трансформатор орнатылса, 2022 жылы 22,5 шақырым болатын 32 көшені электр желілерімен қамту мақсатында қалалық бюджеттен бөлінген 4 млн 849 мың теңгеге жоба сметалық құжаттары әзірленіп, 1 млрд 65 млн теңгеге республикалық бюджетке өтінім ұсынылды.
2022 жылы маусымдық аяқ сумен қамту мақсатында республикалық бюджеттен 29 млн 599 мың 600 теңге қаржы бөлініп, №16-ТС техникалық 2 су тарту ұңғымасы пайдалануға берілді.
«Береке басы бірлікте» демекші, елдің бірлігінің, ынтымағының арқасында ауылдық округіміз 2018 жылдың қорытындысымен облыс бойынша 264 елді мекеннің ішінен «Үлгілі ауыл» байқауының жеңімпазы атанып, қоғамдық рейтинг қорытындысымен «Жаппай кәсіпкерлікті дамытуға қосқан үлесі үшін» номинациясына ие болса, 2019 жылдың қорытындысымен Ақсуат ауылдық округі Қызылорда қаласының әлеуметтік-экономикалық дамуына лайықты үлес қосып, өз саласындағы үздік жетістіктері үшін «Өркенді ауыл» номинациясымен марапатталды.
Сондай-ақ 2022 жылы Ақсуат ауылдық округі «Жаппай кәсіпкерлікті дамытуға қосқан үлесі үшін» номинациямен марапатталды.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!