Әлем тарихындағы ең керемет өнер қолөнер десек те болады. Шеберлік пен қызығушылықты талап ететін жұмыстың қиындығы жетерлік. Мұнда халықты таңғалдыру үшін қабілетті болу керек.
Ақпанның 10-шы жұлдызында Қызылорда облыстық тарихи-өлкетану музейі С.Айтбаев атындағы көркемсурет галереясының ұйымдастыруымен қолөнер шебері Пахриддин Садықовтың «Қолөнерден – өнеркәсіпке» атты көрмесінің ашылу салтанаты өтті.
Ұлттық өнерді насихаттау, қолөнер шеберіне қолдау көрсету шараның басты мақсаты болды. Көрмеге көптеген өнерсүйер қауым жиналды. Аталған шараның ашылу салтанатына Қызылорда облысының мәдениет және спорт басқармасының басшысы Мира Жомартқызы, Қазақстан Республикасы «Мәдениет саласының үздігі» Қазақстан Суретшілер, Қолөнершілер одағының мүшесі Жәнібек Маханбетов Асанұлы және Жаңақорған ауданының мәдениет және спорт бөлімінің басшысы Әбілқайыр Сыздықов, Павлодар облысы мәдениет, тілдерді дамыту және архив ісі басқармасының қызметкері Перизат Құрманәліқызы қатысты.
– Қолөнер – ықылым заманнан қазақ халқының өнері десек те болады. Бұл – біздің тарих. Қазіргі таңда сіздің туындыларыңызды республика көлемінде насихаттап жатырмыз. Біз сізге алдағы уақытта да қолдау көрсеткіміз келеді. Шеберлігіңіз арта берсін, ісіңіз берекелі болсын, – дейді Қызылорда облысының мәдениет және спорт басқармасының басшысы Мира Қазбекова.
Мұнан соң қолөнерші Пахриддин Садықовқа алғыс хат пен арнайы сыйлық табыс етілді.
Көрмеде 40-тан аса кәдесый мен ағаш бұйымдары болды. Шебер мүсіндерді керемет оюлап, өрнектеген екен. Көпшіліктің назары қобыз аспабына ауды. Мүсіншінің осы аспаппен байланысты туындылары астарлы мағынаға ие десек те болады. Мәселен, «Тұлға» атты мүсінін «қобыз – діліміз, домбыра – тіліміз, шаңырақ – дініміз» екенін түсіндіру мақсатында ойлап тапқан.
Қолөнер – мәдениетіміз. Кешеден бүгінге, бүгіннен ертеңге өмір бар. Бұл дегеніміз атадан балаға мирас болған – аманат. Әрбір қазақтың салт-дәстүрі, ар-ұжданы, қадір-қасиеті болмысы басты арманымыз болуы керек. Осы мақсатқа жету үшін ұлттық болмысты сақтап, жас ұрпаққа насихаттау біздің парызымыз, – дейді Пахридфдин Шәмшідінұлы.
Қолөнер шебері 37 жылдан бері қасиетті өнерді серік етіп келеді. Бала кезіндегі қызығушылығы, уақыт өте келе кәсібіне айналған. Қазіргі таңда өзі шәкірт тәрбиелеуде.
Нұрдәурен ЖӘРДЕМХАН,
Қорқыт ата атындағы ҚУ
Жылдам ақпарат алу үшін Facebook, Instagram желілері мен Telegram каналымызға жазылыңыз!