Ел тәуелсіздігінің мерекесі қарсаңында облыс орталығында жаңа спорт кешені ашылды. Спорт кешенін ашу шарасына ҚР Парламенті Сенатының Төрағасы Мәулен Әшімбаев, облыс әкімі Гүлшара Әбдіқалықова қатысты.
«Naman ata» жаңа спорт кешенінің лентасын аймақ басшысымен бірге ауыр атлетикадан төрт дүркін әлем чемпионы Илья Ильин қиды. Әрі қарай спорттық нысанды салуға қолдау білдірген «Абай-Дәулет» ЖШС басшысы Мұрат Сәрсенбаев делегаттарға нысанның және «Syr Dami» спорт-кафесінің жұмысымен таныстырып, алдағы уақытта кешен аумағынан салынатын жобалар туралы баяндады.
Нысан құрылысы 2020-2023 жылдарға жоспарланған. Оның алғашқысы «Мерей» мен «Ақмешіт» шағын аудандарындағы спортпен айналысуға ниетті балалар мен жасөспірімдерге арналған. 2023 жылдың соңына дейін бассейн мен жатақхана құрылысы пайдалануға беріледі.
Ал жаңадан ашылған спорт кешенінде 19 азамат жұмысқа орналасқан. Мұнда 800 жасөсіпірімді 8 жаттықтырушы спорттың 10 түрі бойынша дайындайды. Оның ішінде қазақ күресі, дзюдо, самбо, таеквондо, бокс, грек-рим күресі, каратэ, грэпплинг, панкратион, муай-тай түрлері бойынша секциялар бар.
– Биыл біз ел Тәуелсіздігінің 30 жылдығы мерейтойы қарсаңында тұрмыз. Аталған уақыт аралығында барлық салада үлкен табыстарға қол жеткізілді. Мұндай жарқын көріністер спорт саласында да байқалды. Ұлт Көшбасшысы, Елбасы Нұрсұлтан Әбішұлы Назарбаев барша қазақстандықтарды салауатты өмір салтын ұстануға шақырды. Кәсіби деңгейде спорттың дамуына айрықша көңіл бөлінді. Біздің спортшылар халықаралық, әлемдік деңгейде үздіктер сапынан табылды. Олардың қатарында Сыр өңірінің талантты өрендері бар. Атап айтқанда, ауыр атлетикадан төрт дүркін Әлем чемпионы Илья Ильин, мәнерлеп сырғанаушы Элизабет Тұрсынбаева еліміздің мақтаныш тұтатын саңлақтарына айналды, – деді Мәулен Әшімбаев.
Спорт кешенінің құрылтайшысы Мұрат Сәрсенбаевтың айтуынша, Тәуелсіздік жылдарында елімізде спорттық инфрақұрылым нысандарының саны үш есеге, ал дене шынықтыру және спортпен тұрақты шұғылданушылар алты есеге артқан. Облыста биыл 2200-ге жуық баланы спортпен дамуына жағдай жасау үшін мемлекеттік тапсырыс негізінде 212 млн теңге бөлінген болатын. Енді келер жылы 4300-ден аса баланың спортпен шұғылдануы үшін қажетті жағдай жасауға қаржы көлемі 638 млн теңгеге ұлғайтылмақ.
А.Бердібайұлы
Жылдам ақпарат алу үшін Facebook, Instagram желілері мен Telegram каналымызға жазылыңыз!