Келешек ұрпақ қамы үшін жасалған игі істің бірі – балалар жылындағы «Ұлттық қор –балаларға» бағдарламасы. Бұл өскелең ұрпақтың болашағы жарқын болып, білім алып, баспаналы болуы үшін жасалуда. Мемлекет басшысы бұрынғы Жолдауында «Ұлттық қор – балаларға» атты бағдарламасының қалай жүзеге асатынын баяндаған.
– Біз Ата заңымызда жер мен табиғи ресурстар халықтың меншігі деген басты қағидатты бекіттік. Бұл – құр сөз емес. Бұл – барлық реформаның арқауы. Әрбір отбасы еліміз пайдаланып жатқан ұлттық байлықтың игілігін көруі керек. Сондықтан мен жариялаған Балалар жылының аясында «Ұлттық қор – балаларға» атты мүлде жаңа бағдарламаны жүзеге асыру өте маңызды деп санаймын. Ұлттық қордың жыл сайынғы инвестициялық табысының 50 пайызын балалардың арнаулы жинақтаушы есепшотына аударуды ұсынамын. Қаржы әр бала 18 жасқа толғанға дейін аударылып тұрады, оны мерзімінен бұрын есепшоттан шығарып алуға болмайды. Жинақталған қаржы балалар кәмелет жасына толғаннан кейін олардың баспана немесе білім алуына жұмсалады. Бұл қаражат өскелең ұрпақтың үлкен өмірге қадам басуына мүмкіндік береді. Қор шын мәнінде, ұлттық мәртебеге ие болып, халқымыздың игілігіне қызмет етеді. Бастаманы мұқият әзірлеу қажеттігін ескере отырып, жобаны 2024 жылғы 1 қаңтардан бастап іске қосуды тапсырамын, – деді Президент.
Мемлекет басшысының бұл сөзі халықтың көңілінен шықты. Бүгінгі күні «бұл бағдарлама қалай іске қосылады? Әр балаға қанша қаражат түседі?» деген сұрақтар көпшілікті толғандыруда. Бұл жөнінде Президенттің бұрынғы баспасөз хатшысы Руслан Желдібай Facebook-тегі парақшасына шамамен қанша қаражаттың жиналатыны жөнінде жазба қалдырған.
– Президенттің бастамасымен Балаларға арналған «Ұлттық қор – балаларға» атты жаңа бағдарлама іске қосылады. Үкімет пен Ұлттық банктің есебі бойынша елімізде жыл сайын 400 мың сәби дүниеге келеді. Әр бала 18 жасқа толғанша олардың есепшотында кемі 3 мың АҚШ долларына тең қаражат жиналады – деді Руслан Желдібай.
Есепшотқа аударылатын қаржы ұлттық қордың кірісіне байланысты өзгеруі мүмкін екенін жеткізді.
Егер бағдарламаға 17 жастан бастап қосылған болса, онда баланың есеп шотына бір жыл ішінде шамамен 100-150 доллар түседі.
Айта кетейік есепшотқа аударылатын қаржы доллармен есептеледі және 18 жасқа толғанда да бұл қаражат доллармен беріледі. Сондай-ақ Ұлттық қордың қаражатына салық салынбайды.
Аталған қор бойынша Ұлттық экономика министрі Әлібек Қуантыров Tengrinews.kz-ке сұхбат берген. Онда 2022 жылдың қорытындысы бойынша Қазақстанның Ұлттық қоры теріс табыс көрсеткенін айтып, балаларға берілетін соманың негізгі параметрі үшін бірнеше жылдағы инвестициялық табыс алынатынын айтқан.
Яғни әлемдік қор және Қазақстанның Ұлттық қоры үшін 2022 жыл табысты жыл болмағанын жеткізді. Осыған сәйкес сарапшылармен Ұлттық банк пікірталас кезінде бірнеше жылдағы орташа инвестициялық табысты алу бойынша қорытындыға келген. Сондықтан бірқалыпта және өсім тұрақты болу үшін ұлттық балалар қорын 18 жыл деп қорытынды жасаған.
– Егер орташа жылдық кірісті алсақ, ол әрқашан оң болады. Жыл бойынша бір жерде 7 пайызға, бір жерде одан да жоғары, бір жерде теріс болады. Бірақ көбінесе – оң нәтиже. Сондықтан, лайықты және тұрақты табыс болады деп күтеміз. Жыл сайын балалардың шотына есептелген 50 пайыз оң кірістілік қамтамасыз етіледі, – деді Ұлттық экономика министрі
Сонымен қатар ұлттық қорға арнайы есепшотты ата-ана өздігінен ашпайды. Ол еліміздегі базада тіркелген әр балаға шот автоматты түрде ашылып, кәмелет жасына толғанға дейін қаржы түсіп отырады. Егер қорға түскен қаражатты 18 жасқа толғаннан кейін де алмаса, онда ол қорда 10 жыл сақталады. Сол он жылдың ішінде де қаражатқа сұраныс болмаса, бірыңғай жинақтаушы зейнетақы қорына аудару қарастырылған. Ал бала қайтыс болған жағдайда есепшоттағы қаражат туған бауырларына үлестіріледі немесе ата-анасына беріледі.
Одан бөлек қордағы есепшотты қадағалау үшін арнайы веб-сайт немесе құрылғылар арқылы көру қарастырылуда. Ол жерде бала қанша қаражаттың түскенін көре алады. Алайда оны пайдалана алмайды. Бұл қаражатты тек кәмелеттік жасқа толған соң бала оқуға немесе жылжымайтын мүлік сатып алуға пайдалана алады. Осы тұста бір ескеретін жайт, жылжымайтын мүлікті Қазақстан аумағынан ғана ала алады. Ал университетті шетелде оқитын болса, онда қаражаттағы сомманы игілігіне қолдана алады. Заң бойынша емге жұмсау мүкіндігі де қарастырылған.
Айта кетейік, ұлттық қор балаларға жобасы 2024 жылдың 1 қаңтарынан бастап іске қосылады.
Нәзира МҰҚАТАЕВА
Жылдам ақпарат алу үшін Facebook, Instagram желілері мен Telegram каналымызға жазылыңыз!