«109 бірыңғай байланыс орталығы» – тұрғындарға туындаған мәселелер бойынша ақпарат пен көмекті жылдам алу мүмкіндігін беретін, барлық коммуналдық мәселелер бойынша облыс тұрғындарының өтінімдерін қабылдайтын желі. Осы қызмет түрімен танысу мақсатында «Жедел әрекет ету орталығына» арнайылап барған едік.
– «109 бірыңғай байланыс орталығы» тәулік бойы жұмыс істеп, тұрғындар мен әртүрлі мемлекеттік және коммуналдық ұйымдар арасындағы үздіксіз байланысты қамтамасыз етеді. Байланыс қызметкерлері өтініштерге тиімді жауап беру, жедел қызметтердің жұмысын үйлестіру, тұрғын үй қызметтері және қоғам өмірінің басқа да аспектілері бойынша нақты ақпарат беру үшін арнайы дайындалған. 2020 жылда 42 мыңнан аса өтінім қабылданса, қазіргі уақытта 2024 жылдың 1-ші қаңтар мен 30 маусым аралығында 89 мыңнан аса өтінім қабылданды. Оның ішінде оқыс оқиға, кеңес беру, шағым, ұсыныс, алғыс және ақпаратқа сұрау салу бойынша қоңыраулар қабылданды, – дейді орталық директоры Руслан Бейбітбекұлы.
Орталық жаңа технологиялармен жабдықталған. Бұл қоңырауларды тез қабылдауға мүмкіндік беріп, мәселенің шұғыл шешімін табуға көмектеседі.
– Бірыңғай байланыс жүйесі заманауи технологиялармен, автоматтандырылған жүйелермен жабдықталған, бұл сұраныстардың басымдығын анықтауға және оларды тиісті мекемелерге бағыттауға көмектеседі. Бұл қоңырау шалушылардың күтіп қалмауын қамтамасыз етіп, қызмет тиімділігін арттырады. Облыс тұрғындары мен қонақтары барлық мәселелер, шағымдар, ұсыныстар бойынша немесе шұғыл көмек алу үшін орталыққа 109 нөміріне, әлеуметтік желілер, чат-бот немесе мобильді қосымша арқылы хабарласа алады. Байланыс орталығы 4 ауысым бойынша 24/7 режимінде жұмыс істейді. Уақытпен санаспай, қызметкерлер сапалы қызмет көрсетуге дайын. Туындаған мәселелерді жедел шешіп, азаматтардың өтініштерін тиісті ұйымдарға жібереміз. Орталық қызметкерлері облыс тұрғындарының барлық қажеттіліктері мен мәселелерінің назарға алынуын және мүмкіндігінше тезірек шешілуін қамтамасыз ете отырып, әрбір сұраныстың сапалы және жылдам өңделуін қамтамасыз етеді. Қызмет көрсетудің одан да жоғары деңгейін қамтамасыз ету үшін қызметтерімізді жақсарту үшін үнемі жетілдіріп отырамыз, – дейді Руслан Бүркітбаев.
Сонымен қатар орталық басшысы өтінімдер қабылданып, тиісті мекемеге жіберілетіні жайлы айтты.
– 109 операторы қоңырауды қабылдап, мәселені анықтайды және деректер негізінде сұранысты қажетті бөлімге немесе қызметке жібереді. Өтініш беру кезінде хабарлаушының аты-жөнін, байланыс деректерін, өтінім мазмұнын, уақыты мен күнін, мекенжайы сұралады. Бұл халыққа қолайлылықты жақсартып қана қоймай, азаматтардың өтініштеріне жылдам әрі мақсатты түрде жауап беруді жеңілдетеді. 109 Бірыңғай байланыс қызметі – қоғамдық қауіпсіздік пен халыққа көмек көрсету жүйесінің маңызды буыны. Бірыңғай байланыс орталығынан басқа, біз халықтан түскен ұсынысты жіберудің ыңғайлы жолдарын ұсынамыз. WhatsApp +7(771)7000109 нөміріне хабарлама жіберіп, өтініміңіз арқылы жауап ала аласыз. Сондай-ақ Telegram-да @kyzylorda109_user_bot чат-бот бар, ол өтінішті тез және оңай жіберуге мүмкіндік береді. Егер сіз мобильді қосымшаны пайдаланғыңыз келсе, KOMEK 109 қосымшасын AppStore немесе Playmarket арқылы жүктеп алып, жүйеге кіріп, мекенжайды, мәселенің сипаттамасын және фотосуретті көрсете отырып, өтініш формасын толтыра аласыз. Сіздің өтінішіңіз тез арада тиісті органға жіберілетініне және мәселе шешілетініне кепілдік береміз. Біздің мақсатымыз – кез келген туындаған мәселелерді тез және тиімді шешу үшін облыстың әрбір тұрғынына ең қарапайым және тиімді байланысты қамтамасыз ету, – дейді орталық директоры Руслан Бейбітбекұлы.
Сонымен қатар, 109 колл орталығына тәулігіне келіп түсетін өтінімдердің орташа саны қалыпты жағдайда 500-550-ге жетсе, төтенше жағдайлар кезінде 1500-2000-ға артады.
«iorda» порталы
Биыл өтініштерді қабылдау мен тіркеудің тәуліктік орташа саны 498 өтінімді құрады. Бұл тұрғындар арасында осы қызметтерді белсенді пайдалану мен сұранысқа тез қол жеткізу мүмкіндігіне ерекше мән береді. Сұхбат барысында орталық басшысы 2023 жылы ашылған «iorda» порталының жұмысы туралы да ақпарат берді. Бұл сайт өз жұмысын жақында бастағанымен, өзін пайдалы қызмет ретінде қала тұрғындарының көңілінен шықты. Ол қызметтердің кең ауқымын қамти отырып, қала тұрғындарын өзекті ақпаратпен қамтамасыз етеді. Іске қосылған сәттен бастап портал пайдаланушылардың саны 1400-ге дейін жетті.
– «Smart City» жобалары аясында Қызылорда облысында қала қызметі бойынша 2023 жылдың 20 қыркүйегінен бастап «Іorda» порталы іске қосылды. Қызылорда қаласының тұрғындары қала қызметі «Іorda» порталы арқылы электр жарығы, сумен жабдықтау, жылумен жабдықтау және қоқыс шығару бойынша шарттарды проактивті қызметтің көмегімен жасай алады. Қала қызметіне қатысты ақпаратты толығырақ қалалық және ұялы телефондардан «109» қысқа нөміріне тегін қоңырау шалу арқылы білуге болады. «orda» порталы 5 негізгі қызмет түрін көрсетеді. Атап айтқанда, жылжымайтын мүліктің меншік иесі ауысқан кезде коммуналдық қызметтер көрсетуге шарттар жасасу, электр желілеріне қосылуға техникалық шарттар беру, тұрмыстық тұтынушыларды жылу энергиясымен қамтамасыз етуге арналған келісім шарт жасау немесе қайтадан жасау, жеке үй тұрғындарының тұрмыстық қатты қалдықтарын тасымалдау, орталықтандырылған ауызсумен жабдықтау және кәріз жүйелеріне қосылуға шарттарды алу қызметтері қолжетімді, – дейді «Жедел әрекет ету орталығы» директоры.
«Қауіпсіз аула» жобасы
Орталықтың тағы бір жобасы – «Қауіпсіз аула». Жоба аясында қала тазалығын және құқық бұзушылықтың алдын алу, дер кезінде анықтау мақсатында демеушілік есебінен 10 көпқабатты тұрғын үй ауласына 50 дана бейнебақылау камераларын қою жұмыстары жүргізілуде, шілде айының соңында аяқтау жоспарланып отыр. 1 аулаға 7 бейнебақылау камерасы орналастырылып, қоқыс жәшіктерінің толып кетуі, уақытылы тазалануы немесе құрылыс қалдықтарын тастап кету жағдайлары «109 Бірыңғай байланыс орталылығына» және құқық бұзушылық жағдайлары анықталған жағдайда «102» желісіне хабарланады.
– Қаладағы қауіпсіздік пен тазалықты арттыруға бағытталған «Қауіпсіз аула» жобасы демеушілердің қолдауының арқасында белсенді түрде дамып келеді. Осы бастама аясында он көпқабатты тұрғын үй кешеніне бейнекамералар орнатылуда. Бұл қоғамдық тәртіпті бақылауға ғана емес, кез келген оқиғаға жедел жетуге мүмкіндік беретін қауіпсіздік шараларын айтарлықтай күшейту. Барлық камераларды орнату шілде айының соңына дейін аяқталып, тұрғындардың өмірін жайлы әрі қауіпсіз етеді деп жоспарлануда. Әр аулада қоқыс жәшіктерін шамадан тыс толтыру және құрылыс қалдықтарын заңсыз тастау сияқты түрлі жағдайларды жан-жақты қамтып, бақылайтын камералар бар. Заң бұзушылықтар анықталса, тұрғындар «109 бірыңғай байланыс орталығының» немесе 102 нөміріне хабарлай алады. Бұл тәртіпті сақтауға көмектесіп қана қоймай, азаматтардың өз аймағына деген жауапкершілік сезімін оятады. Бейнебақылау камерасы қылмыстың алдын алу стратегиясының маңызды элементі. Ол құқық бұзушылықтарды тіркеуге ғана емес, сонымен қатар тәртіпсіздіктің алдын алудың тамаша құралы ретінде қызмет етеді. Камералардың арқасында көптеген құқық бұзушылықтардың алдын алуға болады. «Қауіпсіз аула» жобасы да қаладағы экологиялық жағдайды жақсартуға септігін тигізеді. Қоқыс мәселесін уақытылы анықтау және жою оның жиналуын болдырмайды, сонымен қатар тазалық пен тәртіпті сақтауға көмектеседі. Бұл, өз кезегінде, тұрғындардың жалпы әл-ауқаты мен жағдайына оң әсер етіп, қоршаған ортасын таза ұстауға мүмкіндік береді. Тұтастай алғанда, «Қауіпсіз аула» жобасы азаматтардың бірлескен күш-жігері қоғамды айтарлықтай жақсартуға ықпал етеді. Ол заманауи технологиялардың көмегімен және азаматтардың белсенді қатысуы арқылы ортадағы қауіпсіздік пен тазалық мәселелерін тиімді шешуге болатынын көрсетеді. Камераларды толық орнату жұмыстары аяқталғаннан кейін тұрғындар оң өзгерістерді байқайды, – дейді орталық директоры.
Қоңырау
шалатындар көп
«109-Бірыңғай байланыс орталығының» сарапшысы Ақбота Атимбекқызы 109 желісіне түсетін ең көп шағым туралы айтты. Айтуынша, 2024 жылдың қаңтар-маусым айлары аралығында Қызылорда облысы тұрғындарынан 109-call орталығына барлығы 89739 хабарлама келіп түскен.
– Өтінім санатқа бөлгенде: оқыс оқиға бойынша – 20143, кеңес беру – 14355, шағымдар – 2916, ұсыныстар – 36, алғыс – 137, ақпаратқа сұрау салу бойынша – 52152. Қазіргі уақытта өтінімдердің ең көбі электрмен жабдықтау бойынша келуде. Қаңтар-маусым аралығында 38990 өтініш келіп түсті. Өтінім берушілер электр қуатымен қамтамасыз ету желісі бойынша бағана ауыстыру, қаржы экономикалық негіздеу жұмыстары, абоненттің арызы бойынша монтаждық жұмыстар жүргізу, трансформаторлар орнатуға және жоспарлы жөндеу жұмыстарын шешу туралы сұрақтармен хабарласады. Жедел желі операторлары тәулік бойы жұмыс істеп, әрбір мәселелерді тиісті мекемелерге жедел жібереді. 2020 жылдың 6 айында 42137 өтінім, 2021 жылы 52765, 2022 жылы 47414 өтінім, 2023 жылы 76 мыңнан аса өтінімдер қабылданды, – дейді Ақбота Атимбекова.
Сонымен қатар 109 Бірыңғай байланыс қызметіне су жүйесі мәселелеріне байланысты көптеген қоңырау келеді. Бүгінге дейін 16 мыңнан аса өтінім келіп түскен.
– 2024 жылдың қаңтар-маусым айлары аралығында су жүйесі бойынша Шанхай, Бейбітшілік, Титов, Астана, Мерей, Шұғыла, Арай, Арай-2, Арай-3, ЦОН, Арай-Шұғыла шағын аудандарында судың болмауы, сондай-ақ қаланың бірнеше шағын аудандарында ауызсудың ластануы, жертөледен су кету, лай сулардың ағуы сынды апатты және жоспарлы жөндеу жұмыстарының болуына байланысты өтінім тіркелді. «Көгілдір отын» мәселесі бойынша да көп қоңырау келіп түседі. Бұл электр және сумен қамтамасыз етуден кейінгі үшінші орындағы мәселе. Әр ауданның тұрғындары газбен қамтамасыз ету, тарифтер, табиғи газдың болмай қалуы, газ иісінің шығуы бойынша хабарласуда. Жылу қызметі бойынша 2024 жылдың қаңтар-маусым айлары аралығында 2601 өтінім келіп түскен. Өтінімдердің басты себептерінің бірі – көпқабатты үйлердің басым көпшілігінің жылу құбырларының ескіруі, істен шығуы, – дейді сарапшы Ақбота Атимбекқызы.
109 бірыңғай байланыс қызметі халықтың өмір сүру сапасын жақсартуға көмектесіп, коммуналдық мәселелерді жедел шешуде беруде маңызды рөл атқарады. Ақпаратты орталықтандырылған жүйеде жинақтау және іс-әрекеттерді тиімді үйлестіру арқасында 109 бірыңғай байланыс орталығы облыс тұрғындары мен коммуналдық мекемелер арасындағы сенімді көпір қызметін атқарады. Бұл мәселелерді жылдам шешу ғана емес, сонымен қатар инфрақұрылым мен қызметтерді жақсарту бойынша ұзақ мерзімді шараларды жоспарлауға, сұраныстарды талдауға мүмкіндік береді.
София
Хайруллақызы
Жылдам ақпарат алу үшін Facebook, Instagram желілері мен Telegram каналымызға жазылыңыз!