Қазақ халқының ұлы ойшылы Абай Құнанбаевтың мұрасын насихаттау иісі қазақтың рухын көтереді. Жыл сайын елімізде ұлт шамшырағы А.Құнанбаевтың туған күнінің кең көлемде аталып өтуі дәстүрге айналған. Біздің аймақта Абай күнін атап өтудің өңірлік іс-шаралар жоспары әзірленіп, 10-20 тамыз аралығында 200-ден астам танымдық шара ұйымдастырылмақ. Соның бірі облыстық қоғамдық даму басқармасы ұйымдастыруымен «Анаға тағзым» орталығында өткен «Мақсұтым – тіл ұстартып, өнер шашпақ…» атты облыстық байқау болатын. Бұл байқауға Қызылорда қаласы мен аудандардан көркемсөз оқу және ән айту шеберлігін қатар меңгерген 16-35 жас аралығындағы талапкерлер қатысқан еді.
Олар Абай шығармаларын мәнерлеп жатқа оқу, «Абай жолы» романынан үзіндіні көркем шеберлікпен жатқа айту, Абай әндерін орындау бойынша сынға түсті.
«Мақсұтым – тіл ұстартып, өнер шашпақ…» атты облыстық байқаудың «Абай аллеясында» жеңімпаздарды марапаттау шарасы өтті. Оған облыс әкімінің орынбасары Шахмардан Байманов арнайы келіп, қатысушыларды атаулы күнмен құттықтады.
«Біз Абай шығармаларынан елдің алға жылжуына, өсіп-өркендеуіне шын тілеулес болуды үйрендік. Өркендеудің негізі білім мен ғылымда екені анық. Абай қазақтың дамылсыз оқып-үйренгенін қалады.
Бұл тұжырымдар қазір де өзекті. Тіпті бұрынғыдан да зор маңызға ие. Себебі ХХІ ғасырдағы ғылымның мақсаты – биікке ұмтылу, алысқа құлаш сермеу. Ал біздің міндетіміз – осы ілгері көшке ілесіп қана қоймай, алдыңғы қатарда болу, – деді Шахмардан Асқарұлы.
Байқау жүлдегерлеріне арнайы Алғыс хат, бағалы сыйлықтар табысталды.
Г. АСҚАРҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!