Қалалық орталықтандырылған кітапханалар жүйесіне қарасты А.С.Пушкин атындағы орталық кітапхана мен №17 Қызылжарма ауылдық кітапханасының ұйымдастыруымен журналист, жазушы Сақтапберген Әлжіковтің өмірі мен шығармашылығына арналған «Сара сөздің семсері» атты әдеби кеш өтті.
Сыр халқының ыстық ықыласына бөленген Сақтапберген Әлжіковтің өнегелі өмір жолын өскелең ұрпаққа өнеге тұтып, жастардың кітап оқуға деген құлшынысын арттыру мақсатындағы шараны ҚМУ студенті, кітапхана оқырманы Санақұл Бексұлтан С.Әлжіковке «Арнау» өлеңімен ашты.
Әдеби кешке Қызылжарма ауылдық округінің тұрғыны, зейнеткер Қожахмет Ыдырысов, республикалық «Әлімсақ» журналының бас редакторы Нұрлан Көбегенұлы, С.Әлжіковтің немересі Жәнібек Орынбасарұлы Әлжіков қатысты.
Рухани шарада «Сатира саңлағы» атты кітап көрмесі ұйымдастырылды. Сондай-ақ көрермендерге экраннан Сақтапберген Әлжіковтың өмірі мен шығармашылығына арналған бейнебаян көрсетілді. Қарап отырсақ, сықақ әңгімелері қоғамдағы белең алып отырған кейбір келеңсіз құбылыстарды, адам психологиясындағы, олардың күнделікті қарым-қатынасындағы ерсі қылықтарды сын садағына ілген. Әрбір мәселені сатира тілімен жеткізген.
Кеште сықақ әңгімелерінен мәдениет қызметкерлері көрініс көрсетті. Қаламгердің адалдық, адамгершілік, намыс, батылдық, еңбекқорлық қасиеттердің қоғам дамуы үшін қажет құндылықтар екенін көркем тілмен бейнелеген шығармалары бойынша қойылған қойылымда оқырманға ой салатындай шынайы көрсетілді.
Кеш қонақтары сөз алып қаламгер шығармашылығының қоғамдағы маңызы мен шынайылығы туралы естеліктер айтты.
С.Әлжіковтер әулеті өзінің еңбегімен, білімімен, өнерімен Сыр жеріне танымал. Сақтапберген ағамыз оқырман жанын қаламымен емдесе, немересі Жәнібек адамның тәнін емдеп, халықтың ризашылығына бөленіп жүрген ақ халатты абзал жан.
Шара барысында Қызылжарма мәдениет үйінің қызметкерлері Мирамбек Көшеков, Қуаныш Ахметқызы қатысушыларға әннен шашу шашты. Аталған кешті қалалық орталықтандырылған кітапханалар жүйесінің директоры Гүлмира Шамсутдинқызы қорытындылады.
Жылдам ақпарат алу үшін Facebook, Instagram желілері мен Telegram каналымызға жазылыңыз!