Н.Бекежанов атындағы қазақ академиялық музыкалық драма театрында Қазақстан және КСРО Халық артисі, Қазақстанның Еңбек Ері Асанәлі Әшімовтің
85 жылдығына орай «Тағдыр тақтасы» спектаклі сахналанды. Мерекелік шараға облыс әкімі
Нұрлыбек Нәлібаев, өнер саласының ардагерлері мен зиялы қауым өкілдері қатысты.
Өнер қайраткерінің өмір жолына құралған «Тағдыр тақтасы» қойылымын Алматы қалалық «Жаңа ғасыр» театрының актерлері сомдап, көрермен көзайымына айналды.
Облыс әкімі Нұрлыбек Нәлібаев аңыз адам, біртуар өнер қайраткері Асанәлі Әшімовке Сыр жұртшылығы атынан құттықтауын жеткізіп, мерейтой иесінің иығына шапан жауып, Қызылорда облысының Құрмет грамотасын табыстады.
– Әлемге танылған дарабоз өнер иесін Сыр елі әрқашан құрмет тұтады. Өңірімізге өзіңіздің келуіңіз барша сырбойылықтарға үлкен қуаныш. Мемлекет басшысы Қасым-Жомарт Кемелұлы «Сізді аса көрнекті актер ретінде КСРО ғана емес, бүкіл әлемдік кинематография қауымдастығы мойындады», – деген болатын. Сізді Сыр жұртшылығы атынан мерейлі жасыңызбен шын жүректен құттықтап, зор денсаулық, отбасыңызға бақ-береке, амандық тілеймін, – деді Н.Нәлібаев.
– Бұл «Жаңа ғасыр» театры» 2018 жылы М.Әуезов атындағы қазақ ұлттық драма театр жанынан ашылған. Сол кезден бері көптеген қойылымдар көрерменге жол тартып келеді. Соның бірі – «Тағдыр тақтасы» спектаклі. Спектакль екі айға жуық әзірленді. Аңыз адамды сомдап шығу, және оны өзінің алдында ойнау, әрине, өте қиын. Әлі де болса өзімнің кейіпкерді сомдауыма көңілім толмайды. Бұл қойылған сайын толыға түседі деп есептеймін, – дейді Асанәлі Әшімовтің рөлін сомдаған актер Қуаныш Құдайберген бізбен әңгімесінде.
Салтанатты кеште Асанәлі Әшімов Ж.Ерманның сөзіне жазылған А.Қоразбаевтың «Жан балам» әнін орындап, Сыр жұртшылығына ризашылығын жеткізді.
Өнер иесінің мерейтойына орай өткізілген спектакльге қызылордалықтар алғаусыз алғысын айтып, тілектестіктерін білдіріп жатты.
– Асанәлі ағаны 1968 жылдан бері білемін. Ол өтірік пен сатқындықты кешірмейді. Биыл осы дарабоз өнер иесі 85 жылдық көктемін қасиетті Сыр топырағында да атап өтіп жатыр. Бұл өнерлі өңірге деген құрметі болса керек. Мұндағы көрермендерге деген ризашылық сезімінің көрінісі деуге болады. Қазақ театрының сахнасы алғаш рет 1926 жылы Сыр өңірінде ашылған болатын. Сондықтан жастарды да осында өнерлеріңді көрсетіңдер, шыңдалыңдар, жетіліңдер деп арнайы әкелді. Жастардың кейіпкерді сомдап шығуы өте әсерлі болды. Спектакль барысында Асанәлі ағаның аяулы анасы Тәжіхан анамыз, жұбайы Майра, балалары Мәди мен Сағидың бірінен соң бірі бақилық болуы актер шеберлігімен көркем бейнеленді. Спектакльде қайраткер жолы шебер суреттелген. Бұл боямасыз өмір шындығы еді, – дейді Қазақстанның еңбек сіңірген артисі Бақытбек Алпысбаев.
Айта кетейік, театрға келгендер Асанәлі Әшімовтің шығармашылығына арналған көрмені тамашалады.
Жылдам ақпарат алу үшін Facebook, Instagram желілері мен Telegram каналымызға жазылыңыз!