Облыстық денсаулық сақтау басқармасының ұйымдастыруымен облыстық «Ана мен бала» перинаталдық орталығында акушер-гинеколог дәрігерлер арасында «Жедел акушерлік жағдайларда симуляциялық жабдықтарда мануальды дағдыларды игеру» атты халықаралық шеберлік сабағы өткiзiлді.
Жергілікті акушер-гинеколог мамандардың біліктілігін арттыру мақсатындағы шеберлік сабағын медицина ғылымдарының кандидаты, жоғары санатты дәрігер, акушер-гинеколог, Мәскеу денсаулық сақтау департаменті №67 перинаталдық орталығының басшысы Сергей Мартирососян және медицина ғылымдарының кандидаты, жоғары санатты дәрігер акушер-гинеколог, Мәскеу денсаулық сақтау департаменті №67 перинаталдық орталығы клиникалық-сараптамалық жұмыс бөлімінің меңгерушісі, халықаралық репродуктивті медицина мамандары қауымдастығының мүшесі Ольга Перевозкина жүргізді.
– Медицина саласындағы мамандарға әрдайым ізденіс қажет. Дәрігерлерге біліктілігін арттыру өте маңызды. Осындай халықаралық шеберлік сабағын ұйымдастырған облыстық денсаулық сақтау басқармасына алғыс білдіреміз. Бұл шеберлік сабағы әлбетте акушер-гинеколог дәрігерлердің біліктілігін арттыруға зор үлес қосады деген сенімдемін. Ресейден келіп шеберлік сабағын көрсеткен тәлімгерлерге ризамыз. Алған тәжірибемізді алдағы уақытта іс жүзінде қолданып, медициналық көмек көрсету сапасын одан әрі жақсартуға үлес қосамыз деп сенемін. Біз үшін ең бастысы – ана мен бала денсаулығы. Аналардың аман-есен босанып, бөпесін бауырына басқанынан артық қуаныш жоқ, – дейді «Ана мен бала» перинаталдық орталығының акушер-гинекологы Әйгерім Тұрғанбайқызы.
Өңірде акушер-гинеколог дәрігерлердiң біліктілігін арттыру, симуляциялы жабдықтарда дағдыларды игеру және ана мен балаға көрсетілетін медициналық көмекті жақсартуға басымдық берілген. Мәскеуден келген білікті мамандардың шеберлiк сабағында аймақ дәрігерлері акушерлік жағдайдағы тәжірибелік дағдыларын жетілдіруге мүмкіндік алды.
Жылдам ақпарат алу үшін Facebook, Instagram желілері мен Telegram каналымызға жазылыңыз!