Өңірде тағы бір қауіп тудырып отырған ауру түрі Конго-Қырым геморрагиялық қызбасы. Жыл сайын облыста алдын алу үшін тиісті шаралар жасалады. Алайда биыл кене шаққан 4 адам қаза тапқан.
Ветеринария саласының мамандары Конго-Қырым геморрагиялық қызбасын аса қауіпті санайды. Көктем, жаз, күз мезгілінде өршитін кесел адамды денесінде ауру қоздырғышы бар кене шаққанда пайда болады. Салдарынан кене шаққан науқасты мүгедектікке, кейде өлімге әкеледі.
Биыл аймақта эпидемиологиялық ахуал өршіп тұр. Себебі былтыр кене шағу дерегі 238 жағдай болса, биыл бұл көрсеткіш 601-ге жеткен. Одан бөлек 116 елді мекен қолайсыз аймақ қатарына енген. Өткен жылы 113 елді мекен болған еді. Сондай-ақ биыл ауру қоздырғышы бар зиянкестерде көбейген. Ал жоғарыда айтып өткен 4 жағдай Жалағаш, Шиелі ауданы мен қалада орын алған.
– Конго-Қырым гемморрагиялық қызбасының жаңа ошағын анықтау мақсатында 40 мыңнана астам кене жинап, зерттедік. Оның бес мыңнан астамы елді мекендерден, 16765-і жануарлардан, 17637-сі табиғаттан, 496-сы ауру ошақтарынан жиналды. Зерттеуге алынған 4527 сынаманың 127-сінен оң нәтиже шықты. Облыстағы медицина мекемелерінде аталған ауру жұқтырған науқастарға ем-дом жасау үшін қажетті вирусқа қарсы препараттар, иммундалған плазма және басқа да дәрі-дәрмек, қорғаныс құралдары жеткілікті, – дейді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова.
Кене шаққанда вирус адам ағзасында 14 күн аралығында белгі бере бастайды екен. Алғашқы белгісі басы солқылдап, қызуы көтеріліп, денесі сырқырап қатты ауырып, әлсіздік басатын көрінеді.
Жалпы жыл сайын аймақта кенеден жұғатын вирусты болдырмау үшін ауру ошақтарын залалсыздандыру жұмыстары жүргізіледі. Мұндай шара биыл да жасалған. Алайда мамандар одан ахуалдың жақсармай тұрғанын айтады. Қазіргі таңда облыста мал иелерінің өз қаржысы есебінен 95,3 мың бас үй жануарына кенеге қарсы ветеринариялық препарат салынған. Мұндай дәрі мал терісіне жабысқан кенемен бірге ішкі құрылысындағы зиянды құрттарды да жоюға мүмкіндік береді.
Ал тұрғындарды сала мамандары барынша сақ болуға шақырады. Осы орайда үйінде мал ұстайтын тұрғындар, егістікте жұмыс істейтін және көкке демалысқа шығуды жоспарлаған жандар қауіпсіздік шарасын қатаң ұстағаны дұрыс. Мәселен, сиыр саууға шықса қалың киініп, етек-жеңді қымтап, басқа міндетті түрде орамал тағып шыққаны абзал. Бұл кеңес жасыл алаңда демалыс ұйымдастырушыларға да арналады. Сондай-ақ олар өздерімен бірге зиянкестерге қарсы жақпа май алуына болады. Кенелер қалың шөптің арасында жасырынуы мүмкін. Сондықтан онда көп отырмауға, орманды жерде гүл, шөптерді жұлмауға кеңес береді. Ал демалыстан соң денені мұқият қарап шыққаны дұрыс. Әсіресе, құлақ артын, шаш арасына мән беріңіз. Кене адам денесіне түскенде жарты сағаттай шағатын орнын іздейді екен. Мұқият болсаңыз бұл аралықта қауіптің алдын алуға болады. Зиянкесті үй жағдайында өзіңіз алсаңыз, орнын спиртпен, йод немесе зеленкамен өңдеу керек. Қолды сабындап жуу қажет. Ал кенені суы бар ыдысқа салып, қақпағын тығыз жауып, зертханалық талдауға берген жөн.
А.СЕЙІЛ
Жылдам ақпарат алу үшін Facebook, Instagram желілері мен Telegram каналымызға жазылыңыз!