«Ауырдың үстімен, жеңілдің астымен жүруді» көздейтіндердің заманы өтті. Бүгінде жұмысшы мамандықтары сұранысқа ие.
«Сен де бір кірпіш дүниеге, кетігін тап та бар қалан» деп Абай атамыз айтқандай, бүгінгі кейіпкеріміз еңбек адамы ретінде өмірден өз орнын тапқан жан. «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Біз қарапайым еңбек адамына құрмет көрсетуіміз керек», – деп Президент Қасым-Жомарт Тоқаев айтқандай, біздің кейіпкеріміз осындай құрметке лайық жан.
Қоғам алдындағы азаматтық борышын атқарумен бірге өзіне жүктелген жауапкершілікті орындау адамның кісілік келбетін қалыптастырып, іскерлігін шыңдайды. Өз ісіне үлкен жауапкершілікпен қарайтын Гүлнар Төлегенова нағыз еңбек адамының үлгісі.
– Кранды үйренуге ойда-жоқта барып қалдым. Үйде бала күтімімен отырған едім. Оған дейін дүкенде, асханада жұмыс істедім. Газет бетінен «Қызылорда Строй» мекемесі алты айлық курска кран мамандығы бойынша оқуға шақырып жатыр екен. Айына 72 сом стипендия беретіні де жазылған. Соған қызығып, құжат тапсырдым. Алты ай сабаққа барып, үйрендім. Бітіргеннен кейін тәжірибе жинау үшін кран тізгіндеуге КБИ-дағы бетон зауытына тәжірибелік жұмысқа жіберді. Алғашқы барған күні жетекшім кран жүргізіп үйретті. Екінші күні түске дейін болды да, түстен кейін келмеді. Жетекшім жоқ болса да, жұмыс жүруі тиіс, бетон құйып жатқандар «айдай бер» деді. Жастықтың әсерінен тез үйреніп кеттім. Кран айдау оңай көрінді. Осы зауытта кран тізгіндеп алғашқы еңбек жолымды бастадым, – дейді Гүлнар Төлегенова.
Осылайша кран тізгіндеуді тез арада үйренген Гүлнар апа жұмыстың қиындығына қарамады.
– «Кран айдағаны несі» деп көпшілікке ұнамайтын. Енем де қарсы болды. Алайда өзіме ұнады. Осы жұмысты істеймін деп бекіндім. Бетон құю оңай емес. Сақ отыру қажет. Үлкен жауапкершілікті талап етеді. Жауапкершілік жағы қиын демесең, техниканы тізгіндеп отырудан қиналған емеспін, – дейді ол.
Алайда 1995 жылы зауыт жабылып қалады. Дегенмен қайсар анаға бұл қиындық әсер етпеген. Өзінің қолынан келетін ісі бойынша сауда жасайды. Біраз жыл өткен соң 2004 жылы «Құрылыс» АҚ мекемесіне барады. Сол жылдан бастап 15 жыл тұрақты түрде кран тізгіндеп, зейнетке шығады.
Кейіпкеріміз кәсіпке адалдық өзінің өмірлік ұстанымы болғанын айтады.
– Еңбектен бақытымды таптым. Мен ол кезде 22 жаста едім. Жалпы адам шыдамды болу керек қой. Не нәрсе болсын, қандай жұмыс болса да өзінің қиындығы болады. Сондықтан оның барлығына шыдау керек. Оны меңгеру қажет. Кранды айдау кезінде қауіпсіздік ережесін қатаң сақтау маңызды. Әр істе мұқият болу қажет. Шалт қимылыңның кері әсері не өзіңе, не жаныңдағыларға тиюі мүмкін. Жұмысшылар дайындаған қоспаны алдымен қалыпқа құйып, кейін салмағы ауыр бетонды қайта шетке шығарып, оны тиеу кезінде ағаттық жасауға болмайды, – дейді ол.
Гүлнар Ибадуллақызы «Құрылыс» АҚ мекемесінде маңдай термен адал еңбек еткен білікті маман. Өзінің еңбексүйгіштігінің арқасында бел жазбай еңбек етіп, бір ұжымның мақтанышына айналған Гүлнар Төлегенова сынды жанды қанша насихаттасақ та артық емес.
Сан салада ерлермен иық тірестіре жұмыс істеп жүрген нәзік жандыларды көргенде, демімізді ішке тартып, таңырқай қарайтынымыз рас. Бүгінгі кейіпкеріміздің әңгімесінен-ақ неткен ерлік деп отырдым.
Кейіпкеріміз бүгінде зейнет жасында. Ол биыл «Жұмысшы мамандықтар жылы» болғанына қатты қуанғанын айтты.
– 24 жыл кран тізгіндедім. Бұл осы жұмысқа деген адалдығымнан деп ойлаймын. Жастарда жұмысшы мамандығын насихаттай берсе, қоғамда жұмысшының беделі артса деймін. Президенттің жұмысшы мамандықтарға көңіл бөліп жатқанына қуанып отырмыз. Әрбір адамның еңбегі бағалануы тиіс, – дейді Гүлнар Төлегенова.
Айтолқын БАТЫРБАЙҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!