Бүгінде табиғи өнімдерге деген сұраныс артып, келеді. Кәсіптің көзін тауып, айналасына қуаныш сыйлап жүргендер көп. Солардың бірі – шығармашылық пен ұстаздықты қатар алып жүрген Сағыныш Қадрияқызы. Ол №267 орта мектептің көркем еңбек пәні мұғалімі, қолөнер шебері. Сабын жасауды хоббиден кәсіпке айналдырған шебермен сұхбаттасудың сәті түсті.
– Сабын жасауды қалай бастадыңыз?
– Бұл істі шығармашылыққа деген қызығушылығымның арқасында бастадым. Соңғы жылдары табиғи өнімдерге сұраныс артып, химиялық қоспасыз, пайдалы заттардан жасалған бұйымдарға сұраныс артуда. Алғашында жай ғана хобби ретінде бастап, сабыннан түрлі пішіндер мен иістерді тәжірибе жүзінде жасап көрдім. Уақыт өте келе бұл мені шабыттандыра түсті.
– Ұстаздық пен шығармашылықты қалай ұштастырып жүрсіз?
– Ұстаздық пен шығармашылық – бір-бірін толықтыратын бағыт. Сабақ барысында оқушылардың шығармашылық қабілетін дамытуға мән беремін. Қолөнер элементтерін енгізіп, өз жұмысымды үлгі ретінде көрсетемін. Мұғалім – өз саласының шебері болуы керек. Сабақ өтумен, бір күндік жоспармен ғана шектелмеуі керек. Қазіргі таңда балалар алғыр. Мен бұл кәсібімді оқушыларыма көрсету арқылы олардың қызығушылығын арттырып, жаңа нәрсе үйренуіне ықпал еткім келеді.
– Сабыннан түрлі композиция жасауға идея мен шабытты қайдан аласыз?
– Шабытты көбіне табиғаттан аламын. Гүлдердің нәзіктігі, табиғаттың алуан түрлі бояуы мен пішіні әрбір туындыма әсер етеді. Кейде оқушыларымның тың идеялары да жаңа дүниелер жасауға жетелейді. Жай ғана пікір алмасудың өзі маған ерекше серпін береді.
– Бір сабын композициясын жасауға қанша уақыт кетеді?
– Бұл оның күрделілігіне байланысты. Қарапайым түрі 1-2 сағатта дайындалса, бірнеше элементтен тұратын күрделі жұмыстарға 3-5 сағат, кейде одан да көп уақыт қажет болады.
– Сабын жасауда қандай материалдар қолданасыз? Олар қаншалықты қауіпсіз?
– Негізінен арнайы сабынды, табиғи және эфир майларын, сапалы бояғыштарды қолданамын. Хош иіс беру үшін табиғи хош иістердіргіш пен шөп қоспаларын пайдаланамын. Барлық материалдар теріге зиянсыз. Қолдан жасалған сабындардың ерекшелігі табиғилығы мен бірегейлігі. Әр сабын қолдан жасалғандықтан, оның пішіні, түсі, иісі қайталанбайды. Сонымен қатар тұтынушының талғамына сай жеке тапсырыспен дайындауға мүмкіндік бар.
– Оқушылардың қызығушылығы қалай?
– Оқушылар өз қолымен әдемі әрі пайдалы бұйымды ынтамен жасайды. Кейбір оқушылар ғылыми жобаларда, түрлі байқауларда жүлделі орындарға ие болды.
– Бұл істі табыс көзіне айналдыра алдыңыз ба?
– Ең алдымен тәжірибе жинап, өнім сапасын арттыруға көңіл бөлдім. Кейін тұтынушыларға таныстырып, сенім қалыптастырдым. Қазір тұрақты тапсырыс берушілер бар. Бұл хоббиім қосымша табыс көзіне айналды.
– Тұтынушылар көбіне қандай өнімге тапсырыс береді?
– Көбіне сыйлыққа арналған әсем композициялар сұранысқа ие. Гүл, жүрек пішінді және мерекелік тақырыптағы сабындар, сондай-ақ балаларға арналған жануарлар бейнесіндегі өнімдерге жиі тапсырыс түседі.
– Қолөнермен айналысқысы келетін жандарға қандай кеңес берер едіңіз?
– Ең бастысы, қызығушылық пен шыдамдылық. Қателіктен қорықпай, үнемі ізденіп, тәжірибе жасап көру қажет. Кез келген істі сүйіспеншілікпен атқарса, нәтиже болады.
– Сұхбатыңызға рахмет.
Айдана БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!