Сенбі күні Мемлекет басшысы Қасым-Жомарт Тоқаев Қазақстан Республикасы Үкіметінің кезекті кеңейтілген отырысын өткізді. Бірқатар мәселелер талқыланып, арнайы тапсырмалар жүктелген жиын бейнебайланыс режимінде өтті. Отырысқа Премьер-Министр Асқар Мамин, Президент әкімшілігінің басшысы Ерлан Қошанов, Үкімет мүшелері, облыстар мен Нұр-Сұлтан, Алматы, Шымкент қаласының әкімдері, орталық мемлекеттік органдар мен ұлттық компаниялар жетекшілері қатысты.
Жиында ең бірінші биылғы бірінші жартыжылдықта атқарылған жұмыстар жайы қорытындыланып, алдағы міндеттер туралы айтылды. Президент пандемияға қарамастан ел экономикасы жарты жылда 2,2 процентке өскенін айтты. «Бұл қуанатын жайт. Былтыр пандемияның салдарынан ішкі жалпы өнім 2,6 процентке төмендеді. Біз оны тезірек қалпына келтіруіміз керек. Дағдарысқа қарсы қабылданған шаралармен және карантиндік шектеулермен бірге әлемдік экономиканың жандануы іскерлік белсенділіктің қалпына келуіне септігін тигізді. Біздің міндетіміз – екінші жартыжылдықта экономика қарқынын арттыру, – деді Қасым-Жомарт Кемелұлы.
Сондай-ақ Президент коронавирустың жаңадан пайда болып жатқан штамдары індеттің біздің өмірімізге енгенін, ендігі кезекте осындай ахуалға бейімделіп, өмір сүруді үйрену қажет екенін айтты. Ол күрделі жағдайлар мен өлім-жітімді азайту, ауыр халдегі науқастарға баса мән беруді тапсырды. Коронавирусқа қарсы тұру үшін тек медициналық аспектілерге ғана емес, бизнестегі шектеу шараларына да өзгеріс енгізу маңызды. Сондықтан Президент «Ashyq» секілді цифрлық шешімдерді белсенді пайдалану қажет екенін айтты.
Мемлекет басшысы вакциналауға қатысты жалған құжаттар жасауға баса назар аударып, оның қоғам үшін аса қауіпті екенін айтты. Оның пікірінше, азаматтар өздерінің және жақын туыстарының денсаулығын ойлап, саналы түрде шешім қабылдауы керек.
Президент антиваксерлердің қауесет әңгімелеріне сенбеу керектігін, сондықтан екпе салу науқаны жалғасатынын айтты. Сондай-ақ кейбір жекелеген салада екпе салдыру міндеттелетінін, ол заңнамалық және конституциялық негізде дұрыс екені айтылды. «Турасын айтсақ, бұл (вакциналау) – әркімнің өз отандастары алдындағы міндеті, парызы», – деді Мемлекет басшысы.
Президент пандемия кері әсерін тигізген білім беру саласындағы кемшіліктерді жойып, жаңа оқу жылында көштен қалмау керектігін айтты. Ол оқудың бұрынғы форматына көшу керектігін айтып, оқушылар мен студенттердің дәстүрлі оқуға көшіруді тапсырды. Жаңа штамдар пайда болған кезде бұл оңайға түспейтінін тілге тиек етіп, оқушылар мен мұғалімдерге барынша қорғайтын кешенді жоспар әзірлеуді тапсырды.
Ел ішіндегі азық-түліктің қымбаттауы, дағдарысқа қарсы шараларға тым көп салынған қаржы саяси инфляция науқанын күшейткенін де айтты. Ауылшаруашылығының мәліметі бойынша, азық-түліктің әлемдік бағасы 40 процентке өсіп, он жыл ішіндегі ең жоғарғы көрсеткішке жеткен. Азық-түліктің қымбаттауы өзекті мәселеге айналып, пандемия азық-түлік қауіпсіздігінің тұрғысынан еліміздің осал тұсын айқындап бергенін айтты.
– Отандық ауыл шаруашылығы саласының ішкі нарықты негізгі азық-түлік өнімдерімен қамтамасыз ете алмауына қатысты айтылып жатқан сын өте әділ. Өндірістік шығындардан бөлек, маусымдық қымбатшылық пен делдалдық әрекеттердің ашық болмауы баға белгілеудің негізгі факторлары болып табылады. Аты айтып тұрғандай, тасымалға маусымдық болжам жасауға болады. Демек оны реттеуге де болады деген сөз. Аталған мәселені шешудің жолы – келесі маусымға дейін өнім сақтайтын заманауи әрі қолжетімді инфрақұрылым қалыптастыру. Көкөніс сақтайтын қоймалар салу және жаңғырту жөнінде бірнеше рет тапсырма берілді. Бірақ жағдай жақсарған жоқ. Бұл проблеманы жүйелі шешу керек. Үкіметке әкімдермен бірлесіп, көкөніс сақтайтын қоймалар салу және жаңғырту жоспарын әзірлеуді тапсырамын. Осы мақсатты қолдау үшін біздің бағдарламаларымыздан қаржы бөліңіздер, – деп Президент нақты тапсырмалар жүктеді.
Сондай-ақ Үкіметке «Атамекен» ұлттық кәсіпкерлер палатасымен бірлесіп, әлеуметтік маңызды деген азық-түлік тауарларының бағасын ұстап тұрудың қазіргі тетіктерінің тиімділігін бағалау және жаңа әрі тиімді шаралар топтамасын ұсыну тапсырылды. Нарықты өзіне ыңғайлап, пайда көретін делдалдардың көбеюіне жол берілмей, өңірлерде делдалдарды тексеретін комиссия құру керек екені де айтылды.
Ал малдың қырылуын Президент ауа-райының қолайсыздығынан және болжам жасау жұмысының тиімсіздігінен ахуал ушығып кеткен деп бағалады. Қасым-Жомарт Тоқаев әкімдіктер мен ауылшаруашылығы министрлігі тарапынан дұрыс шешім қабылданбағанын, соның кесірінен фермерлердің шаруасы тығырыққа тірелгененін ашып айтты.
«Фермерлер көмек сұрап, тікелей маған өтініш айтуда. Әрине, қуаңшылық – табиғи жағдай. Дегенмен бұл – мәселенің бір жағы ғана. Ең алдымен осындай күрделі кезеңде тиісті министрлік шұғыл және батыл шешімдер қабылдауы қажет еді. Бірақ министрлік бұл жұмысты тиімді ұйымдастыра алған жоқ. Сондықтан осы салаға бірден-бір жауапты тұлға ретінде министр Сапархан Омаровтың отставкаға кеткені дұрыс деп есептеймін», – деп Президент Тоқаев кесіп айтты.
Мемлекет басшысы зейнетақы, жәрдемақы мен стипендия сияқты трансферттер артса да, еңбек табысы азайғанын айтты. Сол үшін жауаптыларға осы бағытта шұғыл түрде шара қабылдап, көлеңкелі экономиканың ауқымын азайтуды тапсырды. Ол әсіресе ауылдағы ахуалға баса назар аудару керек екенін айтып, өз тапсырмасы бойынша Жамбыл облысында пилоттық жоба ретінде жүзеге асқан тұрғындар табысын арттыру жобасын мысалға келтірді. Аталған жоба бойынша ауылшаруашылығы өнімін арттыру екі есе артып, мал басы 24 процентке өскен. Жұмыссыздар тіркелмей, өзін-өзі жұмыспен қамтығандар саны артқан. Сол үшін де Үкіметке бұл жобаның ауқымын кеңейтуді қарастыруы керектігі айтылды.
Президент энергетика министрлігі мен «Самұрық Қазына» қорына, «Қазмұнайгаз» компаниясына жанармай нарығына ықпал ететін мұнай өңдеу зауыттарындағы ахуалды қатаң бақылауға алуды және Атырау мұнай өңдеу зауытының жоспардан тыс тоқтауына байланысты кінәлілерді жауапқа тартуды тапсырды.
Отырыс соңында Қасым-Жомарт Тоқаев мемлекеттік аппарат осындай сын сағатта жұдырықтай жұмылып, батыл қадамдарға барып, өздерінің қарым-қабілетін көрсетіп, шұғыл шешім қабылдауы керек екенін айтты.
Жылдам ақпарат алу үшін Facebook, Instagram желілері мен Telegram каналымызға жазылыңыз!