«Еліміз аман, жұртымыз тыныш болсын» деген тілек жаттанды сөзге айналып кеткендей, кейде байыбына бара бермейтініміз шындық. Күн сайын осы сөзді мың рет қайталасақ та тыныштықтың қадіріне ештеңе жетпейтініне көзіміз жетті. Елдегі орын алған жағдай ешкімге де оңай тиген жоқ. Елдің бейбіт шеруі содырлардың теріс пиғылын жүзеге асыруға жалғасып, тыныштығымыз бұзылды. Қаншама өрімдей жас қыршыннан қиылды, қаншама отбасы қара жамылды. Осы сәтте бізде «Ел иесіз қалмаса екен» деген бір ғана тілек болды. Ел басына күн туған сәтте Мемлекет басшысының батыл шешім қабылдағанына, ұстамдылық танытқанына тәнті болдық. Халқына оқ жаудырмай, елдің де назын айтуға мүмкіндік берген ел Президенті Қасым-Жомарт Тоқаев лаңкестердің озбыр іс-әрекетінен елді қорғау үшін батыл шешімдерге барды.
Тәуелсіздіктің алғашқы жылдарында қиындықты бастан өткерген біздер әрбір кішкентай жетістіктің өзіне қуанамыз, тәубе етеміз. Ал қазір халық жалақының бір күн кешіккеніне де шыдай алмайды. Себебі тоқшылыққа, жақсы өмірге үйреніп қалды. Дегенмен бұл жағдай тыныштықтың бәрінен қымбат екенін түсіндірді. Тағы бір айта кетерлігі, кешегі күні жарық, су, жылу өшпеді. Менің айтар ұсынысым, осындай нысандарды алдағы уақытта мемлекет меншігіне алса екен. Ел жемқорлықтан тазарса екен. Мұндай қиындық енді қайталанбасын деп тілеймін. Қиын сәтте ел тәуелсіздігін сақтауға, мемелекетімізді қорғауға батыл шешім қабылдаған Мемлекет басшысы Қасым-Жомарт Кемелұлының барлық шешімдеріне ризамын, қолдаймын.
Әзия Қыстаубаева,
қоғам қайраткері
Жылдам ақпарат алу үшін Facebook, Instagram желілері мен Telegram каналымызға жазылыңыз!