Осыдан бірнеше күн бұрын қазақстандық танымал кәсіпқой боксшы Геннадий Головкин жапониялық Риота Муратадан басым түсіп, екі чемпиондық белбеуін қорғап қалды.
9 сәуірде Жапонияның Сайтама қаласында өткен кәсіпқой бокс кеші небәрі 9 раундқа созылды. Алғашқы раундтарда екі боксшы тең дәрежеде бокстасқанымен, төртінші раундтан бастап Головкин басымдықты өз қолына алды. 8 раундта GGG жиі шабуылдады да, Мурата қорғанумен әлек болды. Ал 9 раундта Головкиннің қатты соққылары тіпті күшейіп, Муратаның ешқандай шабуыл жасауға мүмкіндігі болмады. Раунд ортасында Мурата рингте тәлтіректеп құлап, отандасымыз жеңіске жетті.
Жекпе-жектен кейін Головкин Муратаға, жанкүйерлерге, бокс кешін ұйымдастырғандарға алғыс айтты. Бұған қоса, Головкин Муратаға рингке киіп шыққан шапанын сыйға тартты. Головкин осы жеңісінен соң IBF, IBO нұсқасы бойынша чемпиондық атағын қорғап қалды. Ал Мурата өз иелігіндегі WBA Super белдігін отандасымызға берген. Бұдан бөлек, Головкин бұл жекпе-жек үшін 5 млн доллар және ақылы телетрансляциядан түскен қаржының 70 процентін алады. Мурата 500 мың доллар және трансляциядан түскен ақшаның 30 процентін иеленеді.
Сонымен Головкин 44 кездесу өткізіп, 42-рет жеңіске жетіп отыр. Ол бұрын мексикалық Сауль Алвареспен бір рет тең түсіп, бір рет жеңілген еді.
Жылдам ақпарат алу үшін Facebook, Instagram желілері мен Telegram каналымызға жазылыңыз!