…Лена жеңгеймен әңгіме-дүкен құрғанда расымен қазақтың қызы екен деп қаласыз. Әңгімесіне бір «бөтен» сөз араластырмай, келген қонағына қазы-қартасын, жал-жаясын ұсынатын жеңгейді қоғалыкөлдік Бақтияр ағамның босағасын аттағанына да қырық жылға таяды. Бүгінде ол – бес уақыт намазын қаза қылмай, Алладан дұға-тілек тілеген қазақы шаңырақтың ақ жаулықты анасы. Қоғамда ер мен әйелдің орны туралы көп сөз айтып, қырық пышақ болып жүрген жұртшылықты сабасына түсірер бір-ақ мысал – осы. Ерін өзінен бір саты жоғары қойып, келген қонағының асты-үстіне түсіп, бәйек болып жүр. Міне, керемет.
Ресейдің сонау Киров облысына қарасты Афанасьев ауданының Митроково деревнясында туып-өскен сары қызды Сырдарияның Қоғалыкөліне келін болады деп кім ойлапты?! Арман қуып, оқуға аттанған екі жасты тағдыр Киров облысында табыстырды. 1986 жылы шаңырақ көтеріп, екі жылды сонда өткізді.
– Осында келгенде «арқасүйер ағаң болайын» деген құрдасымыз Зият мені әлі күнге қарындасым дейді. Содан найман атанып кеттім, қорасан қожаның келінімін. Отағасым салт-дәстүрді санама сіңірді, үлкендердің тәрбиесін көрдік, – деген Елена Алексеевна содан бері туған жеріне бірде-бір рет бармапты.
Заман жаңарып, технология дамыған уақытта бауырларымен телефон, интернет арқылы хабарласып тұрады. Отыз жылдан бері сіңісіп кеткен әулетінің той-томалағында келін болып қызмет қылған оның бос уақыты да жоқ. Айтпақшы, Елена жеңгей кейінгі алты жылдан бері бес уақыт намазды қаза қылмай келеді. «Мені бөтен көрмей, ақ батасын берген анамызға алғыс. Халқыма рақмет» дейді ақ жүрегінен алғысы төгілген ана.
Бірде Лена жеңгей құдайыға барады ғой. Сөйтсе, барған қырық ер азаматтың ішінде бірде-біреуі аят білмейтін көрінеді. Абыр-дабырда молда іздеп кетіпті. Лена жеңгей осы сәтте «Мен оқысам бола ма?» дегенде жұрт қуанып кетіпті. Құдай біледі, содан кейін әлгі жердегі ер азаматтардың бірқатары ұялғаннан аят жаттап кеткен шығар…
Үйіне қанша барсақ та, қонақ қылып күтетін әдетімен тағы да шәй қамына кірісіп кетті. Дастарқаны жиылмайтын үйге бақ тұрақтайды деуші еді… Тағы бір мәрте іштей сүйсіндім. Мен үшін ол кісі мемлекеттік деңгейде емес, ұлттық деңгейде еңбек етіп жүрген тұлға.
Дәулет ҚЫРДАН
Жылдам ақпарат алу үшін Facebook, Instagram желілері мен Telegram каналымызға жазылыңыз!