Кеше ғана басталғандай көрінген футбол маусымы бүгінде аяқталуға жақын. Бұл жылғы футбол бұрынғыдан өзгерек болғаны анық. Әлемдік пандемия соңы шуға ұласқан Супер лига. Осы орайда әлемдік клуб қызықты да, қиын да күндерді бастан кешті. Жалпы қорытындылануы жақын әлем футболында қазір қандай елеулі өзгерістер бар?
Мамырдың 23-інші жұлдызында ТОП-5 лигалардың соңғы ойындары аяқталған болатын. Биылғы чемпионаттар интригаға толы қызықты өтті. Клубтар чемпиондық кубокты лига аяқталғанға дейін бөліске сала алмай жүрді. Тиісінше өз чемпионатында жылда атой салатын клубтар өз межесінен сүрінбеді. Жаңа лига чемпиондарын да көрдік. Сенсация жасаған командаларды да байқадық. Көптен бері мақсат қылып жүріп, жеңіске жетіп, титулға қол жеткізген клубтардың қуанышын да сезіне алдық. Рекордтарын еселеп, өзін танытқан футболшылардың ойынына да ризамыз. Бавария шабуылшысы Роберт Левандовски Бундеслигада 41 гол соғып, аңыз ойыншы Герд Мюллердің рекордын жаңартты. Криштиану Роналду Пеленің ресми ойындарда соққан добынан асып түсті. Роналдудың тап қазіргі қоржынында 777 гол. Тағы айтарымыз Чемпиондар лигасы мен Еуропа лигасынан бөлек жаңа лига шымылдығын түргелі отыр. Бұл − Конфедерация кубогы. Аталған лиганың да маңызы орасан зор. Өз чемпионатында 7 орынға иелік еткен клубтар дәл осы лигада өзара мықтыны анықтайды.
Лига кубогы маңыздылығы жағынан Чемпиондар лигасы мен Еуропа лигасынан кейінгі үшінші кубок ретінде сарапқа салынады. Айта кететін жайт, бүгін Чемпиондар лигасының қорытынды матчы болады. Финалдық бәсеке Португалияның «Порту» стадионында өтеді. Оған осы жылдың ағылшын премьер лигасының чемпионы Манчестер Сити мен Англияның үздік 4 командасына кірген Челси ойнайды. Дәл осы ойынның фавориті − Манчестер Сити. Десе де Челси клубының финалға дейінгі жүріп өткен жолын оңай деуге келмейді. Чемпиондар лигасын 13 рет жеңіп алған корольдік клуб Реал Мадридті жарыс жолынан шығарды. Ал Манчестер Сити Францияның ең беделді клубы Париж-Сен-Жерменді жартылай финалдан өз отанына қайтарды.
Футбол жанкүйерлері сүйікті клубына мамырдың 29-нан 30-на қараған түні ойынды көріп қолдау көрсете алады. Осы ретте тағы айта кетер жағдай, өз лигасының жеңімпаздары Испанияда Атлетико Мадрид, Францияда Лилль, Германияда Бавария, Италияда Интер, Англияда Манчестер Сити чемпион атанды. Алда – Еуропа Чемпионаты. Өз елдерінің намысын қорғау үшін чемпионатқа шақырту алған ойыншылар тыңғылықты жаттығу жұмыстарын жасау үстінде. Қысқасы Еуропа Чемпионаты бізге біраз қызық сыйлайын деп тұр…
Нұрдәурен ЖӘРДЕМХАН,
Қорқыт ата атындағы
Қызылорда университетінің
II курс студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!