Өңір экономикасының маңызды тірегінің бірі – құрылыс болса, бүгінде Қызылорда қаласы қарқынды құрылыс алаңына айналып, экономиканың алға жылжуына үлес қосуда. Көрікті шаһардың сол жағалауындағы 16 тұрғын үйдің құрылысы облыс орталығының ажарын ашып тұр. Ондағы 6 тұрғын үй жеті қабатты болса, қалғаны 5 қабатты үйлер.
– Бұл тұрғын үйлердің барлығы заманауи үлгіде және жаңа технология көмегімен салынуда. Құрылысы жүріп жатқан 7 қабатты үй 84 пәтерлі болса, 5 қабатты үйлер 470 пәтерлі. Бұл зәулім үйлер келер жылы ел игілігіне беріледі деп жоспарланған. Оның инженерлік желісіне жобалық-сметалық құжат толық әзірленіп, сараптаманың оң қорытындысы алынды, – деді қалалық құрылыс бөлімінің басшысы Айдын Әнуар.
Қаланың сол жақ жағалауында салынып жатқан көпқабатты тұрғын үйлердің жалпы ауданы – 37 284 шаршы метр болса, бір тұрғын үйдің ауданы – 6 213,9 шаршы метрді құрайды.
«Орион ЛТД» ЖШС директорының орынбасары Асхат Жаңабаевтың айтуынша, көпқабатты тұрғын үйлердің құрылысы сәуір айында басталған. Қазір бригадалық топ құрылыс жұмысын жүргізуде. 7 қабатты тұрғын үй аймағымызда алғаш рет салынуда. Әрбір пәтерде жедел саты болады. Құрылысқа жергілікті өнім пайдаланылып жатыр.
Сондай-ақ қалада спорт нысанын салуға айрықша көңіл бөлінуде. Сөзімізге дәлел ретінде Тасбөгет кентінде салынып жатқан дене шынықтыру-сауықтыру кешені. Бұл спорт кешенінің жалпы ауданы – 1 655,1 м2 құрайды. Спорт нысаны жылдың соңында ашылады деп жоспарлануда. Жұмысқа жауапты мердігер мекеме – «Интегрострой» ЖШС.
– Спорт кешенінің құрылысы сәуір айында басталды. Құрылыста 50 шақты жұмысшы еңбек етуде. Алдағы уақытта қосымша жұмыс күші тартылатын болады. Мұнда 100 адам бір мезгілде дене шынықтыра алады. Сондай-ақ кешенде футбол, баскетбол және әмбебап спорт залдары бар. Бұл кешен металл құрылымымен жабдықталуда. Сыртқы қабаты толық жылу панелімен қапталады. Жоспар бойынша кешеннің құрылысы жыл соңында бітіп, пайдалануға беріледі , – деді учаске шебері Талғат Маушев.
Гауһар ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!