Өміршең туынды  жарық көрді

Қорқыт Ата атындағы универ­си­теттің OPEN SPACE кітапхана­сында «Әлемді ғылым құтқарады» атты ғылым айы іс-шарасы ая­сында Қазақстан­ның еңбек сіңір­ген қайрат­кері, философия док­торы(PhD), қауымдастырылған профессор Мүсілім Әмзенің «Қазақстанның дирижерлік өне­рі» монографиялық еңбегінің тұ­саукесер рәсімі өтті. Тағылымды шараға өңірімізге белгілі ғалымдар мен өнер қайраткерлері қатысты.

Айта кетейік, жалпы дирижер­лік өнердің ғылыми зерттелуі кемшін қалғаны рас. Көбінде ғылыми еңбектер орыс тілінде жарық көрген.  Осы олқылықтың орнын толтыратын  бұл монография еліміздегі дирижерлік өнер тари­хына қосылған   елеулі еңбек. 

География ғылымдарының кан­дидаты, доцент, университеттің бас редакторы Қали Омаров бұл моно­графиялық еңбектің әсіресе өнер өкілдері, дирижерлік салада жүрген кәсіби мамандар мен студенттер үшін, жалпы оқырман үшін олжалы туынды екенін тілге тиек етті.

– Сілтемеге қарасаңыз, 200-ге жуық әдебиеттер мен архивтік ма­териалдар­ды пайдаланған. Шығар­машылық қыз­метпен қатар архивті аралап, жүйелі еңбек жасаған. Менің байқағаным, кітаптың зерт­теуіндегі 3-ші кезең 2010 жылмен аяқталып тұр екен. Қалған жылдар 1 монографияға жүк болады деп ойлаймын. Бүгінгі 336 беттік монографияға қыруар мақаланы сыйғызған. Стилі қатып қалған ғылы­ми емес, публицистикалық стилмен еркін жазылған. Жаңа туынды қалың оқырманның көз­айымына айналсын, – деді ол.

Мұнан соң сөз алған  «Қоғамдық келісім» мекемесінің директорының орын­басары Асылбек Теңелұлы, Қорқыт ата атын­дағы уни­верситеттің «Дәстүрлі музыка өнері және хореография» білім беру бағдарламасының профессоры, бел­гілі дирижер Кеулімжай Ботабаев, дирижерлер Гүлдәрі Ізбанова, Мақсат Мұхамеджанов, Руслан Балмасов монография туралы пікірін білдірді.

Шынында,  автор дирижерлік са­ла­ның тарихи бастауы, алғы­шарты, қа­лыптасуы мен даму жолын терең зерделеп, оның өнер әлеміндегі рөлі, кәсіби құзіретіне көркем құбылыс ретінде арнайы назар аударған.

Бұл туынды облыстық симфония оркестрінің көркемдік жетекшісі және бас дирижері Мүсілім Әмзенің екінші зерттеу жұмысы. Бұған дейін автордың «Мәлік Жаппасбаевтың музыка мұрасы» атты оқу құралы жарық көрген болатын.

Кеш соңы әйгілі дирижер-ком­позиторлар Ахмет Жұбанов, Латиф Хамиди, Нұрғиса Тілендиев және Қапан Мусиннің ән-күйіне ұласты.

Гауһар Қожахметова

Жылдам ақпарат алу үшін Facebook, Instagram желілері мен Telegram каналымызға жазылыңыз!