Қазақстанда активтерді сатып алу көздерінің заңдылығын тексеруді тағайындау және жүргізу қағидаларына өзгерістер енгізілді, – деп хабарлайды kursiv.media
Тиісті түзетулер 2026 жылғы 14 сәуірдегі Бас прокурордың бұйрығымен бекітілген.
Жаңартылған нормаларға сәйкес, енді тексеруді уәкілетті органның активтерді қайтару жөніндегі құрылымдық бөлімшесінің басшысы немесе оның орынбасары, сондай-ақ олардың міндетін атқарушы тұлғалар бастамалай алады. Тексеру жүргізудің негізі — уәкілетті орган басшысының лауазымды тұлғаның баянаты негізінде қабылдайтын шешімі.
Құжатта тексерулерге активтерді қайтару бөлімшелерінің қызметкерлері тартылатыны көрсетілген. Қажет болған жағдайда прокуратура органдарының қызметкерлері де қатыса алады. Бас прокурордың немесе оның орынбасарының келісімімен басқа да құрылымдық бөлімшелердің, соның ішінде өңірлік, әскери және көлік прокуратурасы қызметкерлерін тартуға мүмкіндік бар.
Сонымен қатар, құжатта тексеру жүргізетін топ құрамын, тексеру нысанын және мерзімін өзгерту мүмкіндігі қарастырылған. Бұл шешімді уәкілетті лауазымды тұлға қабылдайды.
Тексерушілердің өмірі мен денсаулығына қауіп төнген немесе олардың қызметіне кедергі келтірілген жағдайда қауіпсіздікті қамтамасыз ету үшін құқық қорғау органдарының қызметкерлері тартылуы мүмкін.
Сондай-ақ жедел-іздестіру іс-шараларын жүргізу және сараптамалар тағайындау тәртібі нақтыланған. Атап айтқанда, жедел-іздестіру шараларын жүргізу туралы қаулыларға Бас прокурор немесе оның орынбасары қол қояды, ал сараптама тағайындау туралы шешімді активтерді қайтару жөніндегі уәкілетті орган басшысы қабылдайды.
Бұйрық 2026 жылғы 27 сәуірден бастап күшіне енеді және 2025 жылғы 17 желтоқсаннан бастап туындаған құқықтық қатынастарға қолданылады.
Жылдам ақпарат алу үшін Facebook, Instagram желілері мен Telegram каналымызға жазылыңыз!