5 қыркүйек – Қазақстан халқы тілдері күні мерекесін облыста ерекше атап өту жоспарлануда. Осыған орай арнайы іс-шаралар жоспары бекітілген. Биыл ұлт ұстазы Ахмет Байтұрсыновтың туғанына – 150 жыл қатар келген маңызды күнге орай қала мен аудандарда Ахмет Байтұрсынұлының мұрасын насихаттауға бағытталған іс-шаралар ұйымдастырылуда. Бұл туралы өңірлік коммуникациялар қызметінде өткен баспасөз конференциясында облыстық қоғамдық даму басқармасының тілдерді дамыту және ономастика бөлімінің басшысы Ләззат Есімова баяндады.
– 2018 жылдан бастап бұл мереке қазақ тіл білімі мен әдебиеттану ғылымдарының негізін салушы, ағартушы Ахмет Байтұрсынұлының туған күніне орай 5 қыркүйекте аталып өтуде. Президент Қасым-Жомарт Тоқаев «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауында: «Қазақ тілі шын мәнінде білім мен ғылымның, мәдениет пен іс жүргізудің тіліне айналуда. Ата заң бойынша Қазақстанда бір ғана мемлекеттік тіл бар. Бұл – қазақ тілі», – деп атап өткен болатын. Қазақстан халқы тілдері күні 1-10 қыркүйек аралығында атап өтіледі деп жоспарлануда. Атап айтсақ, балабақшаларда «Тілді сүю – талбесіктен» акциясы және жоғары сынып оқушылары арасында «Ахаңның айшықты ойлары» тақырыбында жалпы облыстық диктант жазу шарасы өтеді. Жастар ресурстық орталықтарында «Ұлт ұстазы – Ахмет» атты кинофильмі көрсетіледі. Сондай-ақ, 5-9 қыркүйек аралығында облыстық «Қызылорда» телеарнасынан «Тіл білімінің атасы» атты бейнеролик көрсетіліп, әлеуметтік желілерде «Ұлт ұстазымен үндесу» атты челлендж ұйымдастырылады. «Рухани болмысты жаңғырту – ұрпақ ұлағаты» атты облыстық ділмар шешендер байқауы мен этнос өкілдерінің қатысуымен «Поэзия және мен», «Ұлт тілін ұлықтаған» атты облыстық көркемсөз оқу шеберлері байқауы ұйымдастырылады, – деді облыстық қоғамдық даму басқармасының тілдерді дамыту және ономастика бөлімінің басшысы Ләззат Жұмаханқызы.
Мемлекеттік тілдің қолданыс аясын кеңейту бағытындағы шаралар тек тілдер мерекесі қарсаңында емес жыл бойы жүргізілмек. Тіл – ұлттың тұғыры, ұрпақтың ғұмыры. Қазақ тілі қазақты әлемге танытатын төлқұжаты.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!