Қазіргі жаһандану дәуірінде ағылшын тілі халықаралық қарым-қатынас, ғылым, технология және білім беру салаларындағы негізгі тілдердің бірі болып табылады. Сондықтан мектепте ағылшын тілін сапалы оқыту – заман талабына сай білім берудің маңызды бағыттарының бірі. Оқушылардың тілдік құзыреттілігін қалыптастыру үшін мұғалім әртүрлі тиімді әдіс-тәсілдерді қолданып, оқытуды оқушының жас ерекшелігіне, қызығушылығына және қабілетіне қарай ұйымдастыруы қажет.
Ағылшын тілін оқытудың ең тиімді жолдарының бірі – коммуникативтік әдіс. Бұл әдістің басты мақсаты – оқушылардың тілді күнделікті өмірде еркін қолдана білуіне жағдай жасау. Сабақ барысында оқушылар жұптық және топтық жұмыстарға қатысып, бір-бірімен диалог құрады, пікір алмасады, сұрақтарға жауап береді. Мұндай жұмыстар оқушылардың сөйлеу дағдысын дамытып қана қоймай, өз ойын еркін жеткізуіне және сенімділігін арттыруға ықпал етеді.
Сонымен қатар, ойын технологияларын қолдану да бастауыш және орта буын оқушылары үшін өте тиімді. Әртүрлі тілдік ойындар, сөзжұмбақтар, рөлдік ойындар, викториналар мен жарыстар оқушылардың пәнге деген қызығушылығын арттырады. Ойын арқылы білім алған оқушы жаңа сөздерді оңай есте сақтап, грамматикалық құрылымдарды табиғи түрде меңгереді. Әсіресе бастауыш сыныптарда ән айту, тақпақ жаттау және қимыл-қозғалыс ойындары ағылшын тілін үйренуді қызықты әрі жеңіл етеді.
Ақпараттық-коммуникациялық технологияларды пайдалану – қазіргі білім берудің ажырамас бөлігі. Интерактивті тақта, компьютер, планшет және интернет ресурстары сабақтың мазмұнын байытып, оқушылардың белсенділігін арттырады. Бейнесабақтар, анимациялық фильмдер, онлайн жаттығулар және білім беру платформалары оқушылардың тыңдалым, оқылым, жазылым және айтылым дағдыларын жан-жақты дамытуға мүмкіндік береді. Сонымен қатар, цифрлық құралдарды пайдалану оқушылардың өздігінен білім алу қабілетін қалыптастырады.
Ағылшын тілін оқытуда төрт тілдік дағдыны қатар дамыту ерекше маңызға ие. Олар – тыңдалым, айтылым, оқылым және жазылым. Сабақ барысында оқушылардың шетелдік аудиомәтіндерді тыңдауы, қысқа мәтіндерді оқуы, өз ойын ауызша және жазбаша жеткізуі жүйелі түрде ұйымдастырылуы тиіс. Осылайша оқушылар тілді жан-жақты меңгеріп, оны өмірлік жағдайда қолдануға үйренеді.
Сабақта көрнекілік әдісін қолданудың да пайдасы зор. Суреттер, кестелер, карточкалар, бейнематериалдар мен нақты заттар арқылы жаңа тақырыпты түсіндіру оқушылардың есте сақтау қабілетін жақсартады. Әсіресе жаңа сөздерді суретпен байланыстырып үйрету олардың сөздік қорын тез әрі тиімді толықтыруға мүмкіндік береді.
Жобалық жұмыс әдісі де ағылшын тілін меңгертуде маңызды орын алады. Бұл әдіс арқылы оқушылар белгілі бір тақырып бойынша ақпарат жинап, оны ағылшын тілінде таныстырады. Мысалы, «Менің отбасым», «Қазақстан», «Менің сүйікті мамандығым» немесе «Қоршаған ортаны қорғау» тақырыптарында жоба дайындау барысында оқушылар ізденеді, шығармашылық қабілетін дамытады және тілдік білімін тәжірибеде қолданады.
Мұғалімнің кәсіби шеберлігі мен шығармашылығы оқу үдерісінің табысты болуына тікелей әсер етеді. Мұғалім оқушыларды ынталандырып, олардың жетістіктерін бағалап, әр баланың жеке ерекшелігін ескеруі қажет. Сонымен қатар, сабақта қолайлы психологиялық ахуал қалыптастыру оқушылардың еркін сөйлеуіне және қателесуден қорықпауына мүмкіндік береді.
Қорытындылай келе, мектепте ағылшын тілін тиімді оқыту үшін дәстүрлі және заманауи әдістерді үйлестіре пайдалану қажет. Коммуникативтік тәсіл, ойын технологиялары, ақпараттық-коммуникациялық құралдар, жобалық жұмыстар және тілдік дағдыларды кешенді дамыту оқушылардың білім сапасын арттырады. Осындай тиімді әдістерді жүйелі қолдану арқылы ағылшын тілін меңгерген, бәсекеге қабілетті, жан-жақты дамыған тұлғаны тәрбиелеуге болады.
Мөлдір ҚАЛДАРОВА,
№47 М.В.Ломоносов атындағы мектеп-лицейдің ағылшын тілі пәні мұғалімі
Шиелі ауданы
Жылдам ақпарат алу үшін Facebook, Instagram желілері мен Telegram каналымызға жазылыңыз!