Жадыраған жаздың алғашқы күніне тұспа-тұс келетін төл мереке – халықаралық балаларды қорғау күні. Бұл мереке әлемнің барлық елінде аталып өтеді. Баланың күлкісі бәрінен қымбат. Оларға жыл он екі ай қуаныш сыйласақ та артық етпейді. Осыны ескерген «Фарматека» ЖШС-ның атқарушы директоры Равиль Гайниев балаларға қуаныш сыйлады. Ол көпбалалы отбасылардың балаларына 10 велосипедті тегін таратып, мәрттігін көрсетті.
Қайырымдылық – ізгіліктің нақты көрінісі, адамның асыл қасиеттерінің бірі. Адам өз ұрпағына қайырымдылықты жастайынан үйретіп, адамгершілік қасиеттерге баулуға ұмтылады. Мұқтажы өтелген жанның қуанышын көру, батасын алып, ризашылығына бөлену шынында керемет сезімге бөлейтіні де рас.
– Жер бетіндегі әр сәби, әр бала бақытты болуға лайықты. Әрқашан бейбіт күн нұрын төгіп, ашық аспан астында балалардың сыңғырлаған күлкісі естіліп тұрсын. Барлық балалар азат елдің құшағында отаншыл, арманшыл, бақытты болып ғұмыр кешсін! Балалар – біздің болашағымыз. Бастаған ізгі істеріміздің жалғастырушысы, үкілеп ұшырған үміт-құсымыздың қанаты. Бүлдіршіндерді мерекемен құттықтаймын, – деді «Фарматека» ЖШС-ның атқарушы директоры Равиль Гайниев.
Балғындар велосипед алғанда ерекше қуанышқа бөленді. Оларға велосипедпен қоса доп, басқа да спорттық заттар табысталды. Тізімдегі балалардың бәрі көпбалалы отбасыдан шыққан бүлдіршіндер. Ата-аналар мен балалар естен кетпес мереке ұйымдастырғаны үшін өз ризашылықтарын білдірді.
– Бала – адам өмірінің жалғасы, тіршілігінің мағынасы, ата-ананың дүниедегі ең басты қазынасы. Жарық әлемдегі әрбір сәби ата-ананың жүрегінің бір бөлшегі, көңілінің күні. Ата-ана биік бәйтерек болса, перзенттері оның жайқалған жапырағы іспетті. Расында да, ұрпақ өрбітіп, тіршілікте тамыр жаюды ниет қылған адамзат үшін бақыт пен қуаныш ұғымдары өзінің жанынан жаратылған баламен байланысты болып мәңгі қала беретіні ақиқат. Бүгінгі балаларға қуаныш сыйлап отырған кәсіпкерге айтар алғысымыз шексіз, – деді 9 бала тәрбиелеп отырған алтын құрсақты ана Шолпан Саимова.
Қайырымдылық қоғамға қажетті құндылық. Жақсы істің жаршысы болып келетін қайырымды жандардың бірі Равиль мұнымен тоқтап қалмақ емес. Алдағы уақытта да балаларға қуаныш сыйлауға дайын.
«Жерде бір бала қуанса, көкте жүз періште қуанады» дегендей, төл мерекелерінде бөбектер үлкендердің көрсеткен қамқорлығына мәз мейрам болды.
Жарасхан Қуанышбайұлы
Жылдам ақпарат алу үшін Facebook, Instagram желілері мен Telegram каналымызға жазылыңыз!