Жұма, 29 наурыз, 12:06

  • Қаз
  • Qaz

Бізге жаңалық
жіберіңіз:

+7(702)932-52-25
Жаңа шығарылым
№24(2034)
23.03.2024
PDF мұрағаты

Бейбіткүл Кәрімова: Бүгінгі жастар да Тәуелсіздікті көздің қарашығындай сақтайтынына сенімдіміз

11.05.2022

732 0

Қорқыт ата атындағы Қызылорда университетінде «Елдік те, ерлік те ұрпаққа аманат» атты салтанатты жиын өтті. Шараға Қазақстан Республикасы Парламенті Сенатының депутаттары Бақытжан Жұмағұлов, Нариман Төреғалиев, қоғам қайраткерлері және университеттің профессор-оқытушылары мен білім алушылары қатысты.

Мерекелік шарада Басқарма Төрағасы-Ректор Бейбіткүл Сәрсемханқызы ел дамуында ер азаматтардың орны мен батыр бабаларымыздың ерлігін тілге тиек етті. Жиынға қатысушыларды атаулы күнмен құттықтап, мерекелік лебізін жеткізді.

«Біздің қазіргідей бейбіт күнде бақытты ғұмыр кешуіміз, еліміздің әлемдік деңгейде танылуы – майдангерлер ерлігінің нәтижесі. Бүгінгі буын олардың қаһармандығы мен қайтпас қайсарлығынан үлгі алып, бой түзеп келеді. Қазір ұжымымызда әлемдегі соғыс қимылдары мен ұрыстарға, арнайы бітімгершілік міндеттерді орындау миссияларына, сонымен қатар ядролық сынақ апаты зардабын жоюға қатысқан азаматтар еңбек етеді. Біз олармен мақтанамыз! Елінің ертеңін ойлаған батыр бабалардың ізімен бүгінгі жастар да тәуелсіздікті көздің қарашығындай сақтайтынына сенімдіміз!», – деді Бейбіткүл Кәрімова.

Шара марапаттау рәсімімен жалғасып, оқу орнының қызметкерлері марапат төрінен көрінді. ҚР Ұлттық инженерлік академиясының академигі болып сайлануына байланысты химия ғылымдарының кандидаты, профессор Нұрбол Аппазов арнайы дипломмен және төсбелімен марапатталды. Сондай-ақ, университет ғалымдарына «Қазақстан Республикасындағы инженерлік істі дамытуға сіңірген еңбегі үшін» медалі, білім алушыларға ғылымға қосқан үлесі үшін академияның Алғыс хаты берілді.

Жоғары білікті мамандар даярлауға еңбек сіңіріп, өз саласының кәсіби шебері саналатын университеттің стратегиялық дамуына үлес қосқан бірқатар қызметкер ҚР Парламенті Сенаты Төрағасының марапаты, Қызылорда облысының Құрмет Грамотасы, облыстық маслихат хатшысының Алғыс хаты және Басқарма Төрағасы-Ректордың арнайы марапатын иеленді.
Сонымен қатар, ҚР Парламенті Сенатының депутаты, техника ғылымдарының докторы, профессор, «Қазақстанның еңбек сіңірген қайраткері, ҚР Ұлттық Инженерлік академиясының президенті Бақытжан Жұмағұловқа Қорқыт ата атындағы Қызылорда университетінің «Құрметті профессоры» атағы берілсе, ҚР Парламенті Сенатының депутаты, «Құрмет» орденінің иегері Нариман Төреғалиевке «Қорқыт Ата атындағы Алтын медалі» табысталды.

Шара барысында ғылыми-инновациялық, академиялық саясат және тәрбие беру жұмыстары бойынша университеттің жетістіктері мен жастар ұйымдарының жобалары таныстырылды. Сенаторлар белсенді жастармен кездесіп, ұсыныс-пікірлерін тыңдады. Салтанатты шара патриоттық рухтағы мерекелік концертпен қорытындыланды.

Айта кетейік, университетте алғаш рет 2000-2001 оқу жылында әскери кафедра ашылып, бүгінде 300-ге жуық студент білім алуда. Әскери кафедрада отансүйгіштік рухта тәрбиеленген, әскери білім мен дағдыға ие запастағы офицерлер дайындалады.

 


 

Жылдам ақпарат алу үшін Facebook, Instagram желілері мен Telegram каналымызға жазылыңыз!

Тағы да оқыңыз: