1 маусым – Халықаралық балаларды қорғау күніне орай 18 жасқа дейінгі балалары бар отбасыларға «Kaspi.kz» мобильді қосымшасындағы әлеуметтік шот арқылы біржолғы жәрдемақы төленетіні туралы ақпарат тарады. Бұл ақпараттың жалған екенін Еңбек және халықты әлеуметтік қорғау министрлігі түсіндіріп, жалған ақпарат жазаға алып келетінін де мәлім етті.
«Азаматтардан жалған ақпараттарға назар аудармауды және ақпаратты тек ресми дереккөздерден пайдалануды сұраймыз. Жалған ақпарат тарату заңмен жазаланады», − деп хабарлады министрлік.
Негізінен «Kaspi.kz» қосымшасы арқылы жәрдемақы алуға болады. Алайда жәрдемақы алу үшін қарастырылған арнайы шарттары бар. Қосымшада республикалық бюджеттен бала туғанда берілетін біржолғы жәрдемақыны рәсімдеу бойынша мемлекеттік қызмет жүзеге асырылған. Сондай-ақ «Kaspi.kz» арқылы азаматтар республикалық бюджеттен жұмыс істемейтін әйелдер үшін бір жасқа дейінгі бала күтімі бойынша жәрдемақы рәсімдей алады.
Жәрдемақы мөлшері отбасындағы балалар санына байланысты сараланады. Биылғы жылы бірінші балаға ай сайын 17 643 теңге (5,76 АЕК), екінші балаға – 20 860 теңге (6,81 АЕК), үшінші балаға – 24 045 теңге (7,85 АЕК), төртінші және одан кейінгі балаға – 27 261 теңге (8,90 АЕК) төленеді. 1 мамырдағы жағдай бойынша бұл жәрдемақыны орта есеппен 46,5 мың адам 4,7 млрд теңге сомаға алған.
Естеріңізге сала кетсек, Қазақстан Республикасының қылмыстық кодексінде жалған ақпарат таратқаны үшін арнайы заң қарастырылған. Қылмыстық кодекстің 274-бабы бойынша қоғамдық тәртіпті бұзу немесе азаматтардың немесе ұйымдардың құқықтары мен заңды мүдделеріне не қоғамның немесе мемлекеттің заңмен қорғалатын мүдделеріне елеулі зиян келтіру қаупін төндіретін көрінеу жалған ақпарат таратса, бір мың айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына не төрт жүз сағатқа дейінгі мерзімге қоғамдық жұмыстарға тартуға не бір жылға дейінгі мерзімге бас бостандығын шектеуге не сол мерзімге бас бостандығынан айыру көзделген. Сондықтан әр ақпаратты таратпас және оған сенбес бұрын ақпараттың растығын тексеріп алған абзал.
А.БІРКЕНОВ
Жылдам ақпарат алу үшін Facebook, Instagram желілері мен Telegram каналымызға жазылыңыз!