Қазақстанда цифрлық активтерден табыс тапқан азаматтар үш жыл бойы жеке табыс салығын төлемейді. Бұл туралы Қазақстанда цифрлық активтер индустриясын ынталандыру және дамыту шараларына арналған баспасөз брифингінде айтылды, – деп хабарлайды KAZINFORM
Жасанды интеллект және цифрлық даму министрі Жаслан Мадиевтің айтуынша, жеңілдік 2026 жылғы 1 қаңтардан 2028 жылғы 31 желтоқсанға дейін қолданылады.
— Мұндай жеңілдік тек цифрлық активтермен жасалған операциялар қазақстандық провайдерлер арқылы жүргізілген жағдайда ғана беріледі. Бұл азаматтарды шетелдік платформалардан қазақстандық провайдерлерге көшуге ынталандыру үшін енгізіліп отыр, – деді министр.
Сонымен қатар 1 қыркүйекке дейін цифрлық активтерді шетелдік платформалардан қазақстандық провайдерлерге көшіруді ынталандыратын қосымша салықтық шаралар әзірленіп жатыр.
– Бұл бюджет шығыны емес. Керісінше, заңды нарықты кеңейтуге салынған инвестиция. Криптоиндустриядан түсетін салық түсімдері 2023 жылғы 9 млрд теңгеден 2025 жылы 15 млрд теңгеден асты, – деді Жаслан Мадиев.
Айта кетейік, Қазақстанда цифрлық активтерді ерікті түрде жария ету тетігі енгізіледі.
Жылдам ақпарат алу үшін Facebook, Instagram желілері мен Telegram каналымызға жазылыңыз!