Қазіргі заманда адамдардың көбі уақытын телефонмен өткізеді. Әлеуметтік желілерде отырып, сағаттардың қалай өткенін байқамай да қаламыз. Бірақ сол уақыттың бір бөлігін кітап оқуға бөлсек, ол бізге әлдеқайда пайдалы болар еді.
Себебі, кітап оқу – адамды жан-жақты дамытатын ең жақсы әдеттердің бірі. Кітап оқу арқылы адам жаңа ақпарат алады, ой-өрісін кеңейтеді. Әр кітаптың ішінде бір өмір, бір тағдыр, бір тарих бар. Оларды оқи отырып, біз басқа адамдардың өмірін түсінуге тырысамыз. Бұл өз кезегінде біздің ойлау қабілетімізді дамытады және дүниеге деген көзқарасымызды өзгертеді. Сонымен қатар, кітап оқу адамның қиялын дамытады. Әсіресе көркем әдебиет оқығанда, біз кейіпкерлерді, оқиғаларды өзіміз елестетеміз. Бұл біздің шығармашылық ойлауымызға жақсы әсер етеді. Кейде кітаптағы оқиғалар шынайы өмірден де әсерлі болып көрінеді, сол арқылы біз жаңа идеялар ойлап табуға үйренеміз. Тағы бір маңызды жағы – кітап адамға дұрыс бағыт береді. Көптеген кітаптарда өмірлік кеңестер, тәжірибелер жазылған. Басқа адамдардың қателіктерін оқи отырып, біз оларды қайталамауға тырысамыз. Бұл да – кітаптың үлкен пайдасы. Қазір кітап оқуға мүмкіндік өте көп. Кітапты тек дүкеннен немесе кітапханадан ғана емес, телефоннан да оқуға болады. Сондықтан «уақытым жоқ» деген сылтау айтудың қажеті жоқ. Күніне 10–15 минут болса да оқу әдетін бастауға болады. Әр адам өзіне ұнайтын кітап жанрын табуы керек. Біреуге фантастика ұнаса, енді біреуге мотивациялық немесе тарихи кітаптар қызық болуы мүмкін. Ең бастысы – оқудан ләззат алу. Кітап оқу сөздік қорды көбейтіп, ойды анық әрі дұрыс жеткізуге көмектеседі. Мысалы, мектепте шығарма жазғанда немесе ауызша жауап бергенде, кітап оқитын оқушылардың сөйлеуі әлдеқайда анық және әсерлі болады. Кітап оқу тек білім ғана беріп қоймайды, ол адамды сабырлы болуға да үйретеді. Телефондағы қысқа видеоларға қарағанда, кітап оқу шыдамдылықты талап етеді. Бір кітапты соңына дейін оқу арқылы біз өзімізді тәртіпке үйретеміз.
Кітап оқу – әр адамға қажет маңызды әдет. Ол бізді ақылды, білімді және ойлы адам болуға көмектеседі. Сондықтан күн сайын аз болса да кітап оқуға уақыт бөлген дұрыс. Бұл болашақта үлкен пайдасын тигізеді.
Ақтоты Жұмабекова
Қорқыт ата атындағы Қызылорда университетінің 4-курс студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!