Сөзбен айтып жеткізу қиын. Шынын да, кітабы көп үй өзгеше көрінеді екен. Жаныңды нұрға бөлейді. Тіпті қайсысын көреріңді білмей, қобалжисың. Кітап әлемі – ой әлемі. Демек жеке кітапханасы бар үй ормандай ойымен бай, әрі білім теңізіндей терең мағыналы іспеттес. Үйді кітаппен толтыру үлкен еңбектің жемісі деуге болады.
– Әлиасқар Жамалұлы 1957 жылы дүниеге келген. Өте білімді де білікті кісі болды. Ол рухани құндылықты әрқашан биік қойды. Әлиасқар саналы ғұмырын медицина саласына арнаған жан. 1974 жылы Алматы мемлекеттік медицина институтының фармацевтика факультетіне оқуға түсіп, 1979 жылы бітірді. Еңбек жолын Қызылорда қаласында дәріханалар басқармасында инспектор болып бастады. 1980-1981 жылдары облыстық туберкулезге қарсы диспансерінің 61 дәріханасының меңгерушісі қызметін атқарды. Ол жүрген жерінде кітапты насихаттап жүрді. Оны жора-жолдастары «Тірі энциклопедия» деп айтушы еді. Жұбайым 1982 жылдан бастап, кітап жинауды бастады. Баста жаздырып алып, кейін сатып алатын болды. Әлиасқар дүние емес, білім қуып, байлық емес, кітап жинаған жан. Ол ұрпақтарына мұраға құнды кітап қалдырды. Сондай-ақ өзіне ұнаған, әрбір адам оқуға тиіс деген кітапты үйге келген қонаққа сыйлыққа беретін, – деп еске алды жары Фатима Сұлтанова.
Кейде көкейдегі сұрақтың жауабын айналаңыздағы адамдар емес, кітап тауып беретіні жасырын емес. Иә, кез келген адам іздегенін міндетті түрде кітаптан алады. Бір өкініштісі, ғаламтор пайда болғалы қымбат қазынаның құнын түсінбей жүргендер көп. Тіпті аманатқа қиянат жасап, әкесінің өмір бойы жиған-терген кітабын қоқысқа тастағандарды да көз көріп, құлақ естіп жүр.
– Қазіргі кезде бұл кітаптарды жайлап өзім оқып бастадым. Алдағы уақытта оларды көпшілікке оқуға ұсынғым келеді. Бірақ оны қалай жүзеге асыру керегін әлі ойланып жүрмін. Бір сөзбен айтқанда үй кітапханасын дамытып, әрі қарай көпшіліктің қолданысына енгізу ойымда бар, – деді ұлы Абзал.
Бұл бастаманы қалалық орталықтандырылған кітапханалар жүйесіне қарасты №1 кітапхананың кітапханашылары ұйымдастырды. Олардың басты мақсаты – кітап білімнің қайнар көзі екенін ұғындырып, адамдардың кітапқа деген қызығушылығын арттыру. Кітап жинаған қандай керемет. Біз де қатты қызықтық. Кітап сатып алмақ түгілі, кітапханаға жылына бір рет те бас сұқпайтындар да бар. Алайда үй-үй емес, кітапхана болғаны ерекше әсер етті. Кітап жинауға деген құлшынысым артып, екінші тынысым ашылғандай болды. Тіпті кітапханашылар мұндағы кейбір кітаптардың кітапханада жоқ екенін де айтып қалды. Осылайша үй иесі Абзал Әлиасқарұлы Дінмұхамед Қонаевтың кітабын кітапхана қорына сыйға тарту етті.
Расында, бұл жерден барлық жанрда жазылған туындыларды кезіктіре аласың. Атап айтсақ, кітап қорында медициналық, көркем әдебиет, балалар кітабы, түрлі ертегілер, діни кітаптар мен энциклопедиялар бар.
Ақмарал ҚАДЫРХАНҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!