Қазақстанның жоғары оқу орындарына жаңа міндеттер қойылды. Отандық білім беру орындарында өнеркәсіп инженерлерінің жаңа буынын тәрбиелеу, техникалық мамандарды дайындау қажеттілігі басты назарға алынды. Мемлекет басшысы Қасым-Жомарт Тоқаев бизнес өкілдерімен кездесуде «Қазір біз техникалық бағыттағы мамандықтарға көбірек назар аударуымыз қажет» деп мәлімдегені белгілі.
Алдағы уақытта өзекті болатын мамандықтардың атауларын біліп отыру бүгінгі күнде өте маңызды. Себебі халықаралық дамуға сай еңбек нарығындағы жaғдай екпіндей ауысып отырады. Сондықтан да қазіргі заманғы экономикалық нарықтың ерекшеліктерін ескеру аса маңызды.
Қазақстан Республикасында білім беруді және ғылымды дамытудың 2020-2025 жылдарға арналған мемлекеттік бағдарламасына сай, Қазақстандағы білім беру реформаларының ортақ мақсаты білім беру жүйесін жаңа әлеуметтік-экономикалық ортаға бейімдеу болып табылады. Тез өзгеретін әлемде бейімделе алатын техникалық озық, өнімді жұмыс күшін құру үшін адам капиталына инвестициялар өте қажет. Білімге, дағдыға және тұрғындардың қабілеттеріне инвестициялаушылар болашақтың табысты экономикасын іске асырушылар болатыны анық. Білімге жұмсалған инвестицияларды жай ғана әлеуметтік қажеттіліктерге кеткен шығын деп емес, экономикалық маңызды іс деп түсіну қажет.
Жоғары оқу орнынан кейінгі білім бағдарламасы бойынша негізгі міндеттің бірі оқу орны елді индустриалды-инновациялық дамуының қажеттіліктеріне сәйкес келетін жоғары және жоғарыдан кейінгі білімді кадрлармен қамтамасыз ету болып табылады.
Осыған қарап қазір ғана емес, болашақта да қажет етілетін мамандықтарды ескеріп, талдау қажеттігі туралы қорытынды шығаруға болады.
Қазіргі білім беру жүйесінде бәсекеге қабілетті маман дайындау, жастарға жан-жақты білім беру, теория мен практиканы ұштастыра білу мен техникалық, кәсіптік маман даярлауға басымдық берілуде. Жастар тек білім алып қана қоймай, білікті де тәжірибелі маман болу үшін өздеріне артылған жауапкершілікті ақтай білгендері жөн.
Инженерлі-технологиялық маман даярлауды аймақтағы оқу орындары да жүзеге асыратынын ұмытпау керек. Бұл қатарда Қорқыт ата атындағы Қызылорда университеті бар екенін біз мақтанышпен айтамыз.
Мамандардың болжамы бойынша алдағы уақытта өнеркәсіптік өндіріске байланысты инженерлік мамандықтар жоғары беделге ие болады. Бүгінгі күнде ең қажет мамандар қатарында инженерлер, химик-технологтар, технологиялық машиналар мен техникаларды жабдықтаушылар, кен орындарын іздеу және барлау, мұнай және газ саласының, өнеркәсіп өнімдерінің технологиясы мен құрастыру саласы, тау-кен ісі, пайдалы қазбаларды байыту саласының мамандары тұрады.
Химиялық инженерия саласының мамандары энергетика саласында ерекше қажеттілікке ие. Энергияның баламалы көздері болашақта аса қажет болады деп болжануда. Химияның инновация мен болашақтың ғылымы ретіндегі мәнін ешқашан да жоймайтыны анық. Бұдан кейінгі жақын болашақтың біршама талап етілетін мамандықтары нанотехнологиялармен байланысты. Нанотехнология – молекулалармен және атомдармен жұмысқа негізделген технология. Бұл – біршама заттың жасырын және бағалы қасиеттерін пайдаланатын технология. Нанотехнология – үлкен сала, оны үш бөлікке бөлуге болады: микросұлбаларды жасау, наноөлшемдегі роботтарды жасау, сонымен қатар атомдық деңгейдегі инженерия.
Пайдалы қазбаларды өндіру, байыту және өңдеу біздің еліміздің экономикасында жетекші орын алатыны белгілі. Сондықтан жер қойнауын тиімді пайдалану әрқашан біліктілігі жоғары мамандарды қажет ететіні сөзсіз.
Н.СҮЛЕЙМЕНОВ,
Қорқыт ата атындағы Қызылорда университеті, Инжинирингтік технологиялар кафедрасының меңгерушісі, т.ғ.к
Жылдам ақпарат алу үшін Facebook, Instagram желілері мен Telegram каналымызға жазылыңыз!