Елде жанар-жағармай өнімдерін шекара арқылы заңсыз шығару жағдайлары жиілеп кетті. Қазіргі таңда мұндай жағдайлардың алдын алуға бағытталған кешенді шаралар жүзеге асырылып жатыр. Бұл туралы Үкіметте өткен брифингте Энергетика вице-министрі Қайырхан Тұтқышбаев айтты, – деп хабарлайды kursiv.media
Вице-министрдің айтуынша, қолданыстағы шаралардың бірі – шекаралас мемлекеттерден келетін көліктердің кіруіне шектеу қою.
«Қазіргі уақытта шекаралас мемлекеттердің жүк және жеңіл көліктері Қазақстан аумағына тәулігіне бір реттен артық кіре алмайтын тәртіп орнатылған. Қазір негізгі жұмыс жанар-жағармайды заңсыз тасымалдау үшін қосымша отын бактары орнатылған көліктерді анықтауға бағытталған. Бұл іспен Ішкі істер министрлігі, Қаржылық мониторинг агенттігі, Шекара қызметі және кеден органдары бірлесіп айналысып жатыр», – деді Қайырхан Тұтқышбаев.
Оның айтуынша, шекаралас аймақтарда отынды заңсыз шығармақ болған құқық бұзушылар жиілеп кеткен.
«Қазір Қазақстаннан жанар-жағармайды заңсыз шығарудың алдын алуға бағытталған кешенді шаралар іске асып жатыр», – деп қорытындылады вице-министр.
Бұған дейін Энергетика вице-министрі көрші елдерге заңсыз кеткен бензин көлемін нақты айта алмады.
Жылдам ақпарат алу үшін Facebook, Instagram желілері мен Telegram каналымызға жазылыңыз!