Қызылорда қаласында облыс әкімінің орынбасары Б. Жахановтың төрағалығымен ерекше қауіпті шегіртке зиянкестері мен карантиндік объектілерге қарсы жүргізілетін фитосанитариялық іс-шараларды ұйымдастыру және химиялық өңдеу жұмыстарын атқаратын техникалардың дайындығына арналған облыстық семинар отырысы өтті.
Жиын барысында 2026 жылға жоспарланған фитосанитариялық іс-шаралардың негізгі бағыттары мен дайындық деңгейі жан-жақты талқыланды. Атап айтқанда, биыл Азиялық шегірткеге қарсы – 33 350 гектар, италиялық прусқа қарсы – 31 830 гектар, саяқ шегірткеге қарсы – 55 540 гектар аумақта химиялық өңдеу жұмыстарын жүргізу жоспарланып отыр.
Семинар отырысында зиянкестерге қарсы күрес шараларын тиімді ұйымдастыру үшін тартылатын техникалардың дайындығы да қаралды. Биылғы науқанда 6 арнайы жер агрегаты, 2 жеңіл ұшақ, 1 аса жеңіл ұшақ, 6 пилотсыз авиация құралы (дрон) және 1 аэрозольды генераторды пайдалану көзделуде.
Күн тәртібіндегі мәселелер бойынша бірқатар сала басшылары баяндама жасады. Облыстық аумақтық инспекция басшысы М. Оразбаев ерекше қауіпті зиянды организмдер мен карантиндік объектілерге қарсы жүргізілетін фитосанитариялық іс-шаралар туралы мәлімет берді.
Ал облыстық ауыл шаруашылығы және жер қатынастары басқармасының басшысы Т. Дүйсебаев зиянды организмдерге қарсы жүргізілетін жұмыстардың ұйымдастырылуы мен жоспарлары жөнінде баяндады.
«Республикалық фитосанитарлық диагностика және болжамдар әдістемелік орталығы» мемлекеттік мекемесінің Қызылорда облыстық филиалының басшысы А. Айтбаев өңір аумағындағы зиянды және ерекше қауіпті организмдерге қатысты жүргізіліп жатқан зерттеу жұмыстарының барысына тоқталды.
Сонымен қатар, фитосанитариялық іс-шараларды жүзеге асыратын мердігер мекемелердің техникалық дайындығы да кеңінен қаралды. Бұл бағытта «АВИАКОМПАНИЯ «ДЕЛЬТА-ЮГ» ЖШС өкілі А. Уалиханов, «Бағжан» ЖК және «Защита растений-К» мекемесінің облыс бойынша өкілі Т. Қалшораев, сондай-ақ «Фитосанитария» республикалық мемлекеттік кәсіпорнының Қызылорда облыстық филиалының директоры Ж. Дүзелбаева тиісті баяндамаларын ұсынды.
Жиын қорытындысында алдағы фитосанитариялық науқанды сапалы әрі уақытылы жүргізу, техникалардың толық дайын болуын қамтамасыз ету және жауапты мекемелердің өзара үйлесімді жұмысын күшейту қажеттігі атап өтілді.
Жылдам ақпарат алу үшін Facebook, Instagram желілері мен Telegram каналымызға жазылыңыз!