«Туған жер» қоғамдық қозғалысы» Қауымдастығының ұйымдастыруымен Қызылорда қалалық қоғамдық даму бөлімінің «Сыбайлас жемқорлыққа қарсы мәдениетті қалыптастыру және құқықтық-ақпараттық түсіндірме жұмыстарын ұйымдастыру» әлеуметтік жобасы аясында сыбайлас жемқорлыққа мүлдем төзбеушілік қағидатын қалыптастыру мақсатында түрлі салаларда жетістікке жеткен спикерлердің қатысуымен С. Ысқақов атындағы көп бейінді инновациялық колледжде TEDx форматында ерекше кездесу өтті.
Бұл іс-шараның басты мақсаты – студенттерге адал бизнес жүргізу, қаржылық сауаттылықты арттыру және өмірде жетістікке жетудің нақты жолдарын көрсету болды. Кездесу заманауи талаптарға сай, еркін форматта ұйымдастырылып, қатысушыларға жаңа идеялар мен мотивация сыйлады.
Іс-шараны ашқан «Туған жер» қоғамдық қозғалысы» Қауымдастығының төрайымы К. Еримбетова кездесудің маңыздылығына тоқталды. Ол қазіргі қоғамда тек білім алып қана қоймай, құқықтық сауатты болу, қаржыны дұрыс басқару, мүмкіндіктерді тиімді пайдалану және адал еңбек ету аса маңызды екенін атап өтті. Сондай-ақ, студенттерді белсенді болуға, сұрақ қойып, пікір алмасуға шақырды.
Кездесудің құрметті қонақтары – өз еңбегімен жетістікке жеткен тұлғалар. Атап айтқанда, «Ақ босаға» қоғамдық ұйымының төрайымы Тажиева Зейнар және кәсіпкер, коуч Бұқарбаев Ұлағат өз тәжірибелерімен бөлісті. Олар бизнесті нөлден бастау, қиындықтарды еңсеру, дұрыс қаржылық шешім қабылдау және адалдықтың маңыздылығы туралы нақты мысалдар келтірді. Қонақтардың сөздері студенттерге ерекше әсер қалдырып, көпшілігін жаңа мақсаттарға ұмтылуға жігерлендірді.
Кездесу барысында сұрақ-жауап бөлімі де өте белсенді өтті. Студенттер өздерін толғандырған сұрақтарын қойып, кәсіпкерлік, табысқа жету жолдары және жеке даму тақырыптарында пайдалы кеңестер алды. Қонақтар әр сұраққа ашық әрі шынайы жауап беріп, өз тәжірибелерінен мысалдар келтірді.
Іс-шара соңында модератор бүгінгі кездесудің маңыздылығын тағы бір мәрте атап өтіп, адал еңбек, табандылық және дұрыс шешімдердің жетістікке жеткізетінін қорытындылады. Сондай-ақ, студенттерді алынған ақпаратты өмірде қолдануға шақырды.
Қорытындылай келе, бұл TEDx форматындағы кездесу студенттер үшін үлкен мотивация мен жаңа мүмкіндіктерге жол ашқан маңызды шара болды. Осындай кездесулер жастардың ой-өрісін кеңейтіп, болашаққа деген сенімін арттырады.
«Туған жер» қоғамдық қозғалысы» Қауымдастығы
Жылдам ақпарат алу үшін Facebook, Instagram желілері мен Telegram каналымызға жазылыңыз!